Mpiin 39 - Uwumbɔr aagbaŋ

Josef ni Potifa aapuu aabɔr

¹ N‑yoonn mu Ismael aanib na nan di Josef fuu Ijipt aatiŋ ni na, bi nan di u kooh tii Potifa, u nan ye ubɔrkpaan Faro aachiln ni aajab aaninkpel na la.

² Le Uwumbɔr nan bi Josef chee ki cha u tun lituln mbamɔm. Le u nan bi Ijipt aaninkpel ngbaan do,

³ le uninkpel ngbaan kan ke Uwumbɔr le bi Josef chee ki cha u ŋani tiwan mɔmɔk deedee, kaa kpa ngalm.

⁴ Potifa aanimbil nan gbiin waatuln, le u di u ŋa ubaa aanaagbiija, nima pu na, u nan di waachiln, ni tiwan mɔmɔk, le ki di ŋa Josef aaŋaal ni.

⁵ Josef pu na, ki nyan n‑yoonn ngbaan ki joo cha, Uwumbɔr nan ŋa tinyoor ŋa uninkpel ngbaan do, ni waawan, ni waasar mɔmɔk pu.

⁶ Nima le cha Potifa di waawan mɔmɔk ki di ŋa Josef aaŋaal ni, ki kan lifuur, kaa ki tun nibaa see waah ji tijikaar ti na baanja. Josef nan muun ki kpa tiwon le ki ŋan mu,

⁷ le naa yoor n‑yoonn, le waaninkpel aapuu aakpeek fii u pu, le u ban ke Josef doon u chee.

⁸ Le u yii ki bui u ke, “Lik, m pu le maaninkpel di waachiln ni aawan mɔmɔk, ki di ŋa ŋŋaal ni, le utafal aa ki bi nibaa ponn ni. U bui mi ke m li lik waawan ngbaan mɔmɔk.

⁹ M kpa mpɔɔn lichiln limina ponn ni ke m ŋa maah ban pu na, see sin upuu baanja le maa ŋmaa ŋa nibaa aa chee. Ba ŋa aa ban ke m tun kidagook aatuln li ye titunwanbir na Uwumbɔr aanimbiin ni?”

¹⁰ Idaa mɔmɔk, upii ngbaan nan muk Josef ke u doon u chee, le u ti yii.

¹¹ Daalbaadaal le Josef nan koo waaninkpel aadiik ni u ti tun lituln. N‑yoonn ngbaan binaagbiib biken mu aa nan bi lichiln ni.

¹² Le upii ngbaan chuu Josef aabɔkul le ki bui u ke, “Dan nan doon m chee.” Le u nan daa gaa ki san nyan lipaal, le waabɔkul bee upii ngbaan aaŋaal ni.

¹³ Waah kan ke Josef aabɔkul bee u chee na,

¹⁴ le u yin binaagbiib biken, ki nan bui bi ke, “Lik man, nchal aah joo ni Hiibru yaab aanachipɔɔn u na, uma le koo ni m pu, ki ban ke u chuu mi mpɔɔn ki doon m chee, le m faa nkuun.

¹⁵ Buyoonn u ŋun m faa nkuun na, le u san nyan lipaal ki cha waabɔkul m chee.”

¹⁶ Upii na nan di libɔkul ngbaan bil le uchal nan fuu ni.

¹⁷ Le u tuk uchal ke, “Hiibru aanaagbiija u aa joo ni na, uma le koo ni u nan chuu mi mpɔɔn ki doon m chee.

¹⁸ Le maah faa nkuun na, u san nyan, ki cha waabɔkul m chee.”

¹⁹ Le Josef aaninkpel ngbaan aaŋuul fii,

²⁰ le u cha bi chuu Josef ki di u ŋa kiyondiik ni, ubɔrkpaan aanaagbiib aah bi nin chee na; le u bi nima.

²¹ Tɔ, Uwumbɔr mu nan bi Josef chee ki ŋa u pu tinyoor; nima pu na, unaagbiijool u nan joo bi na nan gee Josef aabɔr pam,

²² le ki di u ŋa kiyondiik ngbaan ni aaninkpel ke u li lik lituln limɔk biken ŋani na.

²³ Uwumbɔr aah nan bi Josef chee aan u tun lituln mbamɔm pu na, unaagbiijool ngbaan aa ki muk ubaa lituln li u di ŋa Josef aaŋaal ni na pu.