Mpiin 38 - Uwumbɔr aagbaŋ

Juda ni Tamar aabɔr

¹ N‑yoonn mue na, Juda nan nyan ute aabim biken chee, ki buen ti bi uja ubaa chee, bi yin u ke Hira, u nan ye Adulam aatiŋ aanii la.

² Nima chee le Juda nan kan Kanaann aatiŋ ni aapiibo ubaa, bi yin ute ke Sua. Le u din u,

³ le u ma ubijabo tii u, le u yin u ke Er.

⁴ Le u nan ki dek lipuul ki ma ubijabo uken, le ki yin u ke Onann.

⁵ Le u ki dek ki ma ubijabo uken ki yin u mu ke Sela. Juda aah nan bi Aksib aatiŋ ni buyoonn na, le u nan ma ubo ngbaan.

⁶ Juda nan din upiibo, u bi yin u ke Tamar na, ki tii ujapɔpol Er.

⁷ Le Er nan tun titunwanbir sakpen, le kaa piir Uwumbɔr aasui, nima pu na, Uwumbɔr nan ku u.

⁸ Le Juda bui Er aanaal Onann ke, “Di aakpel aapuu kpan aan ki maa mbim tii aakpel, u mu li kpa mmaal.”

⁹ Le Onann aah nan bee ke mbim ngbaan aan li ye waabim na, u yaa nan doon Tamar chee ki ban u gaa ubaa kan, le u chuu nyan uchakpaln, le tijar lir kitiŋ, nima kan upii ngbaan aan dek ki maa mbim tii ukpel.

¹⁰ Waah nan ŋa pu na aa nan piir Uwumbɔr aasui, le u ku u mu.

¹¹ Le Juda bui ubipuu Tamar ke, “Gir buen aate do ki ti li bi nima, ki li ye ukpopii, ki li kii njapɔɔn Sela aah ga nan ŋa unii buyoonn na.” U nan dak ke Sela mu ga kpo ke ukpetiib na la. Nima pu na, Tamar nan kun ute do.

¹² Ni nan bi cha, le Juda aapuu mu kpo. N‑yoonn mu u toor upuu aakpuul doo na, le u ni ujɔ Hira, u ye Adulam aatiŋ aanii na, nan buen Timna aatiŋ ni, bi ti chee waapiih aakor pu.

¹³ Le unii ubaa tuk Tamar ke uchooja Juda ga buen Timna aatiŋ ni, u ti chee waapiih aakor.

¹⁴ Le Tamar fii ki kpeln tikpopiir aawanpeenkaan, le ki di tiwanyaan peen, ki di likekeln liken biin unimbil pu, le ki ti kal Enayim aatiŋ aabisamɔb chee, kitiŋ ngbaan ni le aa ga dii ki buen Timna aatiŋ ni. Tamar nan bee ke Juda aajapɔɔn Sela muun ki ŋa unii a, le uchooja aa di u tii ujapɔɔn ngbaan.

¹⁵ Juda nan ti kan Tamar ka kitiŋ ngbaan aabisamɔb chee. Waah nan di likekeln biin unimbil wɔb pu na, le u nan dak ke u ye lipiiyal la.

¹⁶ Le u buen u chee nsan aagbaan ki ti baa u ke, “Tɔ, aa gaal iŋa?” Juda aa nan bee ke ubipuu le na. Le u mu baa u ke, “Aa ga tii mi iŋa?”

¹⁷ Le u gar ke, “M ga chuu ni maaŋobo ubaa le nan tii si.” Le Tamar bui u ke, “Tɔ, ni ŋeer, nibaakan aa yaa ba tii mi tiwan nibaa dandana wee aan ki nan li joo ni uŋobo ngbaan n‑yoonn mbaa kan, ni ba ŋan.”

¹⁸ Le Juda baa u ke, “Aa ban ke m tii si ba aan ni li ye tipuur?” Le u giin bui u ke, “Di saabɔmbik, ni nkuŋmin, ni saah joo kijaangbeek ki na tii mi.” Le u di ni mɔmɔk tii u. Le bi kpaan, le Tamar dek lipuul.

¹⁹ Tamar nan gir kun ute do, le ki chuu peer likekenyaan na, ni waah ba di li biin unimbil wɔb na, le ki ki di tikpopiiwan peen.

²⁰ Le Juda di uŋobo tii ujɔ Hira u ti pa lipiiyal na waapɔln aan ki gaa ni waawan na mɔmɔk; le ujɔ Hira aa ti ki kan lipiiyal na.

²¹ Le u baa Enayim aatiŋ ni aajab bibaa ke, “Upiiyal ubaa ba ka nsan aagbaan do. U bi la?” Le bi bui u ke, “Upiiyal ubaa aa bi do.”

²² Le u gir buen Juda chee ki ti bui u ke, “Maa ti kan lipiiyal ngbaan, le kitiŋ ngbaan ni aajab bui ke upiiyal ubaa aa bi nima.”

²³ Le Juda bui ujɔ ke, “Cha u li joo maawan ngbaan mɔmɔk. Taa ban ke binib laa timi. M pɔɔn mbaa ke m pa waapar la, le saah kaa kan u na, ni ŋeer a.”

²⁴ Naah ti saa iŋmal itaa aayoonn na, le unii ubaa tuk Juda ke, “Aabipuu Tamar goor kidagook ki kpa lipuul.” Le Juda tii bi nsan ke, “Ni nyan u lipaal ki see mmii ku u man.”

²⁵ Baah nan joo u bi ti see u mmii na, le u tun uchooja chee ke, “Unii u aawan bi joo ni aa chee na, uma le tii mi lipuul ngbaan. Lik ke ŋma yeh kibɔmbik, ni nkuŋmin, ni kijaangbeek ngbaan.”

²⁶ Libuul ngbaan ni, le Juda bee ke uma le yeh tiwan ngbaan mɔmɔk, le ki bui ke, “Upii ngbaan kpa mbamɔn, min le galn, ni ba ŋeer m di u tii njapɔɔn Sela, u kpan u.” Juda aa nan ki doon u chee.

²⁷ Naah ŋeer buyoonn ke u maa na, bi nan bee ke u ga maa bijaam la.

²⁸ Buyoonn imalween nan joo u na, le bijaam ngbaan ubaa di uŋaal mbaa pue loln ni nsan ki nyan ni, le umamaan chuu uŋaal ngbaan ki di kikokomaŋ gbin mu, le ki bui ke, “Umina le puen nyan ni lipaal.”

²⁹ U nan ki daa uŋaal ngbaan kɔn una aaponn ni, le uken na tee ki puen u nyan ni. Le umamaan ngbaan bui ke, “Aa ber mpɔɔn ki puen aakpel ki nyan ni mala kina la aa?” Nima pu na, bi nan yin u ke Peres.

³⁰ Le ubo u ba di uŋaal pue nyan ni na mu nyan ni, le kikokomaŋ gbin uŋaal, le bi nan yin u mu ke Sera.