Mpiin 37 - Uwumbɔr aagbaŋ

Josef ni ukpetiib aabɔr

¹ Jakob nan beenin bi Kanaann aatiŋ ponn ni nin chee ute Aisak nan bi na la.

² Jakob aamaal aabɔr sɔ: Ujapɔɔn Josef nan ye ŋibin kipiik ni ŋilole aanachipɔnbo la, le u ni ukpetiib kpaa bite aawakor, u ni ute aapuutiib Bilha ni Silpa aabim le nan kpaa tiwakor ngbaan. U nan joo ni ukpetiib aabɔr ti kaa ŋan na le ki nan tuk ute.

³ Jakob nan gee Josef sakpen ki jer ujapɔtiib biken, ba pu? waah nan por buyoonn na le u ma u. Le u nan ŋal libɔkul li aaŋaal fɔk ki ŋan na tii u.

⁴ Josef aakpetiib aah kan ke bite gee u ki jer bi na, le bi nan u, kaa ki len tibɔnyaan u chee.

⁵ Kinyeek kibaa daal, le Josef nan daŋ tidaŋ, le ki tuk ukpetiib tidaŋ ngbaan aabɔr. Waah tuk bi na, le bi moo nann u sakpen.

⁶ U nan bui bi ke, “Li pel maadaŋ ngbaan aabɔr man.

⁷ Ti mɔmɔk nan bi kisaak le ki chee ipui, le buyoonn m di maapuijaal di bil na, le li fii sil chob, le nimi aapuijaan mu fii sil, le ki goln n‑yaal ki gbaan linimbiin ni.”

⁸ Le ukpetiib baa u ke, “Aa dak ke sin le ga li ye timi aabɔr ki lik timi ii?” Le waadaŋ ngbaan aabɔr ni waah len pu na nan cha liŋuul moo chuu ukpetiib, le bi nan u sakpen.

⁹ Josef nan ki daŋ tidaŋ tiken, le ki bui ukpetiib ke, “M ki daŋ tidaŋ tiken, ki kan nwiin, ni uŋmal, ki kpee iŋmabi kipiik ni ubaa gbaan nnimbiin ni.”

¹⁰ U nan tuk ute mu tidaŋ ngbaan aabɔr, le ute nan sur u tibɔr ngbaan pu, le ki baa u ke, “Ba aadaŋ aaboln le aa daŋ kina? Aa dak ke aana, ni aakpetiib, ki kpee min, ti ga nan gbaan aanimbiin ni ii?”

¹¹ Le Josef aakpetiib nan kpa lipiipoln u pu; ute ma nan bi dakl tibɔr ngbaan pu n‑yoonn mɔmɔk.

Baah di Josef kooh bi di u buen Ijipt aatiŋ ni pu na aabɔr

¹² Daalbaadaal le Josef aakpetiib di bite aawakor buen Sekem aatiŋ ni, timoor ponn ni.

¹³ Le bite Jakob bui Josef ke, “M ban ke aa buen Sekem aatiŋ ni, aakpetiib aah bi nin chee ki kpaa tiwakor na.” Le Josef bui u ke, “M gor ke m buen.”

¹⁴ Le ute bui u ke, “Buen ki ti lik ke aakpetiib ni tiwakor ngbaan kpa laafee aan baa kpa, ki gir nan bui mi.” Le ute tun u, le u nyan Hebronn aafataŋ ni ki buen. Le Josef ti fuu Sekem aatiŋ ni,

¹⁵ ki chuun yenni kitiŋ ngbaan aapɔɔk ponn ni, le uja ubaa ti kan u ki baa u ke, “Aa chuun ban ba?”

¹⁶ Le u bui uja ngbaan ke, “M chuun ban nkpetiib bi joo tiwakor timoor ni do na la. Aa ga ŋmaa tuk mi baah bi nin chee na aa?”

¹⁷ Le uja ngbaan bui u ke, “Bi nyan do ki buen a. M ŋun bi len ke bi cha Dotann aatiŋ ni la.” Le Josef di paan bi pu, le ki ti kan bi Dotann aatiŋ ni.

¹⁸ Bi nan si le ki waa u dandar u choo, le bi bi kpokl ke bi ku u, le u nin fuu ni bi chee.

¹⁹ Le bi bi ki len tɔb chee ke, “Lik, u ŋmaa daŋni tidaŋ na le ti choo na.

²⁰ Cha ti ku u ki di waawon ŋa nnyunbunkuun mubaa ponn ni. Ti ga ti bui ke kipeewanbiik kibaa le ku u. Le ti ga lik ke waadaŋ ngbaan ga doo kinye.”

²¹ Rubenn nan ŋun baah len pu na, le ki pɔɔn ubaa ke u ba gaa Josef lii. U nan bui bi ke, “Taa cha ti ku u.

²² Cha ti di u lii nnyunbun mubaa ni, timoor tee ponn ni, ki taa ku u man.” U nan len kina ki dakl waah ga ŋa pu ki gaa u lii ki di u ti tii ute na la.

²³ Le Josef aah fuu ni ukpetiib chee na, le bi chuu peer waabɔkunyaan na,

²⁴ le ki chuu u di lii nnyunbunkuun ponn ni.

²⁵ Nee aapuwɔb, le bi ka ji tijikaar, le ki kan Ismael yaab bibaa choo ki nyan ni Gilead, ki jer cha Ijipt aatiŋ ni. Bi nan joo laakumii tiib ki di tulalee aabɔŋ aabɔŋ, ni iween aanyɔk pam bi pu.

²⁶ Le Juda bui biken ke, “Ti yaa ku tinaal ki di bɔr kan, ni ga li kpa ba aanyoor?

²⁷ Cha ti di u kooh Ismael aanib bee pu. Nima kan, taan tii u iween; ba pu? u ye tinaal la, le ti ni u kpaa tiwon ni nsinbaan.” Le biken na mu kii kina.

²⁸ Le Midiann yaab bi chuun tiir kitiirk na nan fuu ni bi chee, le bi chuu nyan Josef nnyunbun ni, ki di u kooh tii bititiirb ngbaan tikur aamombil moninko, le bi mu di u buen Ijipt aatiŋ ni.

²⁹ Tɔ, Rubenn nan dan nnyunbun ngbaan chee ki lik, kaa kan Josef mu ponn ni, le u chuu waawanpeenkaan daa kar mpombiin pu,

³⁰ le ki buen biken chee ki ti bui ke, “Tinaal ngbaan aa ki bi nnyunbun ni. M ga ŋa kinye?”

³¹ Le bi chuu bite aaŋoob ubaa ku, ki di Josef aabɔkunyaan na ŋa uŋoob ngbaan aasin ni.

³² Le bi gir buen linampal ki ti di Josef aabɔkul ngbaan di mɔk bite, le ki bui u ke, “Ti pii libɔkul lee la. Naa ye aajapɔɔn aabɔkul aa?”

³³ Le bite bee libɔkul ngbaan le ki bui ke, “Mbamɔn, waabɔkul ye. Kina upeel ubaa le ku u. Upeel le chuu maabo Josef ki dar par u kina.”

³⁴ Le Jakob aasui bii, le u chuu waawanpeenkaan daa kar mpombiin pu, le ki di tiwanpeenkaan ni saak kuub na di peen. U nan wii waabo ngbaan aakun pu ni yunn pam.

³⁵ Le ujapɔtiib ni ubisatiib mɔmɔk nan dan bi nan sɔŋ usui, le u nan yii baasurm ki bui ke, “Hali, m ga di ti kpo, maan suln maabo ngbaan aakun bɔr.” Nima pu na, n‑yoonn mɔmɔk u nan wii Josef aakun aabɔr pu la.

³⁶ Tɔ, Midiann yaab ngbaan aah ti fuu Ijipt aatiŋ ni na, bi mu nan ki di Josef kooh tii Potifa, u nan ye nima chee aabɔr aajab bi kii waadichal na aaninkpel na la.