Mpiin 36 - Uwumbɔr aagbaŋ

Esɔ aamaal aabɔr

¹ Esɔ aah nan ma mbim bi na aabɔr sɔ; bi nan ki yin Esɔ ke Edom la.

² Esɔ nan yoor Kanaann aanib aapiibim la. Bi nan yin ubaa ke Ada, u nan ye Hef aanii Elonn aabisal na, ki yin uken mu ke Oholibama, u nan ye Ana aabisal na la. Ana aate nan ye Sibeonn u nan ye Hif aanii na la.

³ Le bi yin uken mu ke Basemaf, u nan ye Ismael aabisal aan uninja ye Nebayof na.

⁴ Le Ada nan ma Elifas, le Basemaf mu ma Rewel;

⁵ le Oholibama mu ma Jeus, ni Jalam, ni Kora. Esɔ nan ma waabim bee mɔmɔk Kanaann aatiŋ ni la.

⁶ Le Esɔ yoor upuutiib ni waabim, ni waadichal ni aanib mɔmɔk, ki kpee waawakor ni waawan mɔmɔk ni u nan kan ni Kanaann aatiŋ ni na, le ki nyan unaal Jakob chee, ki buen kitiŋ kibaa ni.

⁷ Baah nan bi nin chee na aa nan ŋeer bimɔk kpaan ki li bi, kina pu le Esɔ nan nyan u chee; baawakor nan pɔr ti nyaŋ, le timoor aa ki fuu ti mɔmɔk.

⁸ Kina pu le Esɔ nan buen ti bi Edom, ŋigongon aatiŋ ni.

⁹ Esɔ, u nan ye Edom aatiŋ aanib aayaaja na aayaabitiib sɔ:

^10-13 Esɔ aapuu Ada le nan ma Elifas, le Elifas mu ma mbijabim biŋmu. Bi nan yin bi ke Temann, ni Omar, ni Sefo, ni Gatam, ni Kenas. Le upuu u bi yin u ke Timna na mu nan ki ma Amalek tii u. Esɔ aapuu Basemaf le nan ma Rewel, u mu nan ma mbijabim binaa. Bi nan yin bi ke Nahaf, ni Sera, ni Sama, ni Misa.

¹⁴ Le Esɔ aapuu Oholibama, u nan ye Ana aabisal ki mu ye Sibeonn aayaabil na, mu nan ma mbijabim bitaa, bi yin bi ke Jeus, ni Jalam, ni Kora.

¹⁵ Ŋinibol ŋi paa na le ye Esɔ aayaabitiib. Le Esɔ aajapɔpol Elifas ye ŋinibol ŋi aayimbil paa na aayaaja: Temann, ni Omar, ni Sefo, ni Kenas,

¹⁶ ni Kora, ni Gatam, ni Amalek. Esɔ aapuu Ada aayaabitiib le na.

¹⁷ Le Esɔ aajapɔɔn Rewel ye ŋinibol ŋi aayimbil paa na aayaaja: Nahaf, ni Sera, ni Sama, ni Misa. Esɔ aapuu Basemaf aayaabitiib le na.

¹⁸ Le ŋinibol ŋi mu aayimbil paa na ye Esɔ aapuu Oholibama u nan ye Ana aabisal na aayaabitiib: Jeus, ni Jalam, ni Kora.

¹⁹ Ŋinibol ŋee mɔmɔk nan ye Esɔ aayaabitiib la.

Uja u bi nan yin u ke Seir na aamaal aabɔr

^20-21 Mpiin na, Edom aatiŋ aanib nan yakr ŋinibol aabɔŋ aabɔŋ la, le bi mɔmɔk aayaaja nan ye Seir, u ye Hori aanii ubaa na. Seir aajapɔtiib nan ye Lotann, ni Sobal, ni Sibeonn, ni Ana, ni Disonn, ni Eser, ni Disann. Bi mɔmɔk nan ye bibɔrb la.

²² Hori ni Hemann nan ye binibaam la, le Lotann ye biyaaja. Lotann aaninkpan le nan ye Timna.

²³ Alfann, ni Manahaf, ni Ebal, ni Sefo, ni Onam nan ye binibaam la, le Sobal ye biyaaja.

²⁴ Sibeonn nan kpa mbijabim bilee, Aya ni Ana. Ana ngbaan le nan ti kan inyunbun i aanyun ton na ibaa, waah nan joo ute aabon timoor ni buyoonn na.

^25-26 Ana nan ye Disonn aate la, uma le nan ye Hemdann, ni Esbann, ni Itrann, ni Kerann aayaaja. Le Ana nan ki kpa bisal ubaa bi yin u ke Oholibama.

²⁷ Bilhann, ni Saafann, ni Akann nan ye binibaam la, le Eser nan ye biyaaja.

²⁸ Us ni Arann nan ye binibaam la, le Disann nan ye biyaaja.

^29-30 Hori yaab aanibol bi nan bi Edom aatiŋ ponn ni na le paa na: Lotann, ni Sobal, ni Sibeonn, ni Ana, ni Disonn, ni Eser, ni Disann.

Edom aatiŋ aabɔrb aabɔr

^31-39 Bibɔrb bi aayimbil paa tɔb pu na le nan pue joo Edom aatiŋ, le Israel yaab nan nin kaan bibɔrb. Bi nan jin nnaan ki paa paa tɔb pu kina la: Beor u nan nyan ni Dinhaba aatiŋ ni na aajapɔɔn Bela. Sera u nan nyan ni Bosra aatiŋ ni na aajapɔɔn Jobab. Husam u nan nyan ni Temann aatiŋ ni na. Hadad u nan ye Bedad u nyan ni Afif aatiŋ ni na aajapɔɔn. Bedad le nan to butɔb ki nyaŋ Midiann yaab, Moab aatiŋ ni na. Samla, u nan nyan ni Masreka aatiŋ ni na. Saul, u nan nyan ni Rehobof, kitiŋ ki bi limɔɔl chee na. Akbor aajapɔɔn Baal Hanann. Hadad u nan nyan ni Pau aatiŋ ni na. Upuu Mehetabel nan ye Matred aabisal la, le u nan ye Mesahab aayaabil.

^40-43 Le Esɔ nan ye Edom aanibol ŋi paa na aayaaja: Timna, ni Alfa, ni Jetef, ni Oholibama, ni Ela, ni Pinonn, ni Kenas, ni Temann, ni Mibsar, ni Magdiel, ni Iram. Nin chee ŋinibol ŋimina mɔmɔk bi na, bi di baayimbil le yin ŋipepel ngbaan.