Mpiin 35 - Uwumbɔr aagbaŋ

Uwumbɔr aah ŋa tinyoor ŋa Jakob pu Betel aatiŋ ni pu na aabɔr

¹ Uwumbɔr nan bui Jakob ke, “Li cha Betel aatiŋ ni, ki ti li bi nima. Aa maa kitork aabimbiln nima chee ki tii mi Uwumbɔr u nan dan aa chee buyoonn aa nan san aakpel Esɔ chee na.”

² Le Jakob bui waamaal, ni binib bimɔk nan bi u chee na ke, “Chuu nyan ŋiwaa ŋi mɔmɔk ni kpa na ki di mee man; ki ŋa nibaa chain aan ki kpeln nimi aawanpeenkaan man.

³ Ti ga nya do ki buen Betel aatiŋ ni, nin chee m ga ti maa libimbiln ki toor kitork tii Uwumbɔr u ter mi maamukl mɔmɔk ponn ni, ki bi m chee ni kookoo na.”

⁴ Nima pu le bimɔk nan nyan ni baawaa mɔmɔk, ni tafajɔn tiib bi bi nan too na di tii Jakob. Le u di nimɔk sub likpaln aasub bubaa taab, Sekem aatiŋ chee.

⁵ Nee aapuwɔb le Jakob ni udo yaab nan piin ki nyan cha, le ijawaan sakpiin chuu binib bi aatim nan bi gbɔk nima chee na, le baa kaa bi paan bi pu.

⁶ Le Jakob ni waanib nan ti fuu Lus aatiŋ ni; dandana bi gur yin kitiŋ ngbaan ke Betel la, ki bi Kanaann aatiŋ ni.

⁷ Le u maa kitork aabimbiln nima chee, le ki yin kitiŋ ngbaan ke Betel Aawumbɔr; ba pu? Uwumbɔr nan di ubaa mɔk Jakob nima chee, n‑yoonn mu u nan san ukpel chee na.

⁸ Le Rebeka aanaagbiipii u bi nan yin u ke Debora na nan kpo, le bi di u sub likpaln aasub na taab, Betel aaŋangii wɔb. Nima pu le bi yin likpaln aasub ngbaan ke “Iwiil Aakpaln.”

⁹ Jakob aah nan gir nyan ni Mesopotamia aatiŋ ni ki cha kina na, le Uwumbɔr nan ki dan u chee ki nan ŋa tinyoor ŋa u pu,

¹⁰ ki bui u ke, “Bi yin si Jakob la, tɔ, yoor din ki joo cha bi ga li yin si ke Israel la.” Kina le Uwumbɔr nan yin u ke Israel.

¹¹ Le Uwumbɔr nan bui u ke, “Min le ye Uwumbɔr Mpɔɔnsakpiindaan. Maa, ki pɔr, ki li kpa mbim. Aayaabitiib le ga li ye ŋitimbol pam, le aa ga li ye bibɔrb aayaaja.

¹² M ga di kitiŋ ki m nan di tii aayaaja Abraham ni aate Aisak na di tii si, ni aayaabitiib bi ga paan ni aapuwɔb na.”

¹³ Uwumbɔr aah len kina doo na, le u siir buen ki cha u.

¹⁴ Nima chee, libuul li ni Uwumbɔr nan len u chee tibɔr na, le Jakob di litakpateerkaan di ŋum nima, le ki di ŋisubil aadaan, ni nkpan kpir li pu, ki ŋa li Uwumbɔr yaal,

¹⁵ le ki yin nima chee ke Betel.

Rachel aakun aabɔr

¹⁶ Jakob ni waamaal nan nyan Betel aatiŋ ni ki cha, kaa kee fuu Efraf aatiŋ ni, le imalween chuu Rachel, ki ye imalween i pɔɔ ti nyaŋ na.

¹⁷ Buyoonn ni ti moo pɔɔk, u ti labr nkun na, le umamaan bui u ke, “Rachel, taa san ijawaan. U mu ki ye ubijabo la.”

¹⁸ Rachel mu nan labr nkun a, le waah ti fuur kookoo ki ban u kpo na, le u yin ubo ngbaan ke Benoni, le ute nan yin u ke Benjaminn.

¹⁹ Rachel aah nan kpo na, bi nan di u sub gbaŋ Efraf aasan chee, dandana bi yin nima chee ke Betlehem.

²⁰ Le Jakob di litakpateerkaan libaa ŋum nima chee, le litakpal ngbaan beenin ŋub ki mɔk Rachel aakaakul chee ki nan saa din wee.

²¹ Le Jakob fii nima chee, le ki ti kal Eder aadifɔfɔŋ aapepel libaa.

Jakob aajapɔtiib aabɔr

²² Buyoonn Jakob nan laa bi kitiŋ ngbaan ni na, le ujapɔɔn Rubenn doon Bilha chee, u nan ye ute Jakob aapuutiib na ponn ni ubaa la. Jakob aah nan ŋun kina na, le usui fii, le liŋuul chuu u pam. Jakob nan kpa mbijabim kipiik ni bilee la.

²³ Lea aabim le nan ye Rubenn, Jakob aajan aabijabo, ni Simeonn, ni Liifai, ni Juda, ni Isakar, ni Sebulunn.

²⁴ Rachel aabijabim mu le nan ye Josef ni Benjaminn.

²⁵ Rachel aanaagbiipii Bilha aabim le nan ye Dann, ni Naftali.

²⁶ Le Lea aanaagbiipii Silpa aabim nan ye Gad, ni Aser. Jakob nan ma mbijabim ngbaan mɔmɔk Mesopotamia aatiŋ ponn ni la.

Aisak aakun aabɔr

²⁷ Le Jakob fuu ute Aisak chee Mamre aatiŋ ni, ki bi gbɔk Hebronn chee la, nin chee Abraham ni Aisak nan bi n‑yoonn mubaa na.

²⁸ Aisak nan bi ki ti saa ŋibin nkub ni imonko inaa.

²⁹ U nan por pam le ki nin kpo; le ujapɔtiib Esɔ ni Jakob di u sub.