Mpiin 34 - Uwumbɔr aagbaŋ

Ubɔr aajapɔɔn Sekem ni upiibo Daina aabɔr

¹ Jakob ni waamaal aah nan bi Sekem aatiŋ ni na, daalbaadaal le Jakob ni Lea aabisal Daina buen u ti doon kitiŋ ngbaan aapiib bibaa.

² Ubɔr Hamor u nan ye Hif aanii na aajapɔɔn Sekem nan kan Daina, le ki chuu u mpɔɔn ki doon u chee.

³ U nan gee Daina sakpen a, le ki ban ke Daina mu li gee u.

⁴ Le u bui ute ke, “M ban ke aa tun tichandann upiibo wee aate chee, u tii mi nsan m yoor u.”

⁵ Le Jakob ŋun ke Sekem jinn ubisal inimɔɔn, le ujapɔtiib aah nan buen timoor ni, kaa bi linampal na, le waa len tibaa.

⁶ Le Sekem aate Hamor buen Jakob chee;

⁷ n‑yaayoonn ngbaan le Jakob aajapɔtiib mu nyan ni timoor ni ki kun ni. Baah ŋun ke Sekem ŋa kina na, le ni tii bi mpobiyuk, ki cha baaŋuul fii Sekem pu sakpen, ke waah ŋa pu na, u lik seen Israel yaab sakpen a.

⁸ Le Hamor bui Jakob ke, “Njapɔɔn Sekem kan aabisal Daina ki gee u pam; ke aa tii u nsan u yoor u ki di ŋa upuu.

⁹ Cha ti ŋa kimɔbaan ki li yoor tɔb aabisatiib.

¹⁰ Nima le ga cha ni li bi do, ki maa ŋidichal naah gee nin chee na, ki li chuun tiir kitiirk nibaa pu, aan ki li kpa nibaa aatiŋ.”

¹¹ Sekem mu nan bui Daina aate ni uninjatiib ke, “Ni yaa cha m yoor Daina kan, m ga pa nimi naah ban tipar ti na mɔmɔk.

¹² Ni yaa di u tii mi kan, ni bui mi naah ban tichoowan pu na, hali ni yaa wiir pu na kan, m ga pa nimi.”

¹³ Sekem aah nan jinn Daina inimɔɔn pu na, le Jakob aajapɔtiib nan ŋmann Sekem ni ute Hamor,

¹⁴ ki nan bui bi ke, “Taan cha tininkpan mɔn uja u kaa gii uchakpaln na, ni ga li ye inimɔɔn le ti chee.

¹⁵ Ni yaa kii ke ni ga geei ni mɔmɔk aachakpan ke taah geei pu na kan, ti mu ga kii ke u mɔn si,

¹⁶ ki cha ti li yoor tɔb aabisatiib, ki li ka ni chee, aan ti ŋa unibaan.

¹⁷ Ni yaa kaa kii kina kan, ti ga gaa tininkpan la, aan ki fii.”

¹⁸ Hamor ni ujapɔɔn Sekem nan kii tii bi.

¹⁹ Le Sekem aah gee Daina pu na nan cha u kii ke u ŋa mala baah len pu na. U mu nan ye uninyuun le waamaal ni.

²⁰ Le Hamor ni ujapɔɔn Sekem nan buen bido yaab aaninkpiib aah kaa nin chee ki kpokl tibɔr na, le ki ti tuk bi Jakob ni ujapɔtiib aah len pu na mɔmɔk.

²¹ Bi nan bui bi ke, “Binib bee ye bininyaam sakpen; cha bi li bi ti chee ki li chuun baageehn. Timi aatiŋ ngbaan kpa mpaan bi mu ga ŋmaa kal ti chee. Cha ti li yoor tɔb aabisatiib man.

²² Binib ngbaan bui ke ti yaa kii ki gii tichakpan ke baah geei pu na kan, bi ga kii ki li bi ti chee, aan ti ŋa unibaan.

²³ Ti yaa ŋa baah len pu na kan, baawakor ni tiwan nimɔk bi kpa na aan li ye timi yaan aa? Nima pu na, cha ti kii ki gii ŋichakpan man, aan bi li bi ti chee.”

²⁴ Kitiŋ ngbaan ni aanib mɔmɔk nan ŋa kimɔbaan ki kii tii Hamor ni ujapɔɔn Sekem aah kpokl bi pu na, le bijab mɔmɔk nan gii ŋichakpan.

²⁵ Iwiin itaa aah fuu aan bichakpan aabuun moo ŋoor na, le Jakob aajapɔtiib bilee, Simeonn ni Liifai, bi ye Daina aaninjatiib na, nan yoor baajawan, le ki koo kitiŋ ngbaan ni, kaa faa ikuun, le ki ti ku bijab ngbaan mɔmɔk,

²⁶ ki kpee Hamor ni ujapɔɔn Sekem mu, le ki nyan Daina, Sekem do, ki di buen.

²⁷ Baah ku bijab ngbaan doo na, le Jakob aajapɔtiib bi gur na koo kitiŋ ngbaan ni, ki ti yoor baawan mɔmɔk ki teen bininkpan aanimɔɔn pu.

²⁸ Bi nan chur tiwakor mɔmɔk, ki yoor tijikaar mu ki kpee.

²⁹ Bi nan yoor tiwan nimɔk ŋan na, ki chur bipiib ni mbim, ki yoor tiwan mɔmɔk baadir ni buen.

³⁰ Le Jakob bui Simeonn ni Liifai ke, “Ni ban tibɔr tii mi; dandana wee, Kanaann yaab, ni Peris yaab, ni binib bimɔk bi kitiŋ kee ni na aan ki li gee timi aabɔr. Maajab aa wiir, nibaakan bi ga kpokl tɔb, ki dan nan lir ti pu ki ku ti mɔmɔk.”

³¹ Le bi nan giin bui bite ke, “Taan li ka lik aan bi jinn tininkpan inimɔɔn ke waah ye upiidagoor le na.”