Mpiin 33 - Uwumbɔr aagbaŋ

Jakob ni Esɔ aah ton tɔb nsan ni pu na aabɔr

¹ Tɔ, Jakob kan ke Esɔ ni waajab ikui inaa ngbaan choo; nima pu le u chuu yakr waabim ki tii Lea, ni Rachel, ni binaagbiipiib bilee na.

² U nan di binaagbiipiib ngbaan ni baabim le di loln nsan, le Lea ni waabim mu paa, le Rachel ni Josef gbeln kookoo,

³ le Jakob loln bi pu nsan. Waah pii ukpel Esɔ chee na, le u gbaan kitiŋ nfum mulole.

⁴ Esɔ ma nan san ni, le ki nan bub chuu u, le ki moor utakpiln, le bimɔk bilee nan wii tɔb pu.

⁵ Esɔ aah kan bipiib ni mbim na, le u baa ke, “Binib bee nyan ni la chee?” Le Jakob bui u ke, “Uwumbɔr aah ŋa tinyoor ŋa m pu ki tii mi bipiib ni mbim bi na le na.”

⁶ Le binaagbiipiib na fuu ni ki nan doon Esɔ,

⁷ le Lea ni waabim mu paan ni ki nan doon u, kookoo yaan le Josef ni una Rachel mu fuu ni ki nan doon u.

⁸ Le Esɔ ki baa ke, “Tiwakor ti m ba puen ton ti na nyan ni la?” Le Jakob bui ke, “Ipiin i m tii si na le bi na.”

⁹ Le Esɔ bui u ke, “Nna aabo, maah kpa pu na ŋeer a; li joo sin yaan.”

¹⁰ Le Jakob bui u ke, “Ayii, aa yaa sil di cha pinn mi kan, gaa maapiin ngbaan. Saah gaa mi ki cha m kan aanimbil wɔb na, ni naahn ke maah kan Uwumbɔr aanimbil wɔb le na.

¹¹ Pɔɔn aabaa ki gaa ipiin ngbaan. Uwumbɔr ŋa mi tiŋann le ki tii mi tiwan nimɔk m ban na.” Jakob nan gaŋ u le u ti gaa ipiin ngbaan.

¹² Le Esɔ bui u ke, “Ti li cha, m ni maanib ga loln nsan ki buen la.”

¹³ Le Jakob bui ke, “Dandana wee, mbim ngbaan diŋ pam, kaan ki ŋmaa chuun woween, le tiwakor ni naabim mu diŋ kina. M yaa ban mala mala kan, tiwaatiir na ga kpo la.

¹⁴ Loln nsan ki li cha, ti ni tiwakor ga li chuun suusuu, taah ga ŋman pu na, ki pii ni si Edom aatiŋ ni.”

¹⁵ Le Esɔ bui ke, “Kina kan, cha maajab bee ngem bee aan ki cheen ni sin.” Jakob nan giin bui u ke, “Saah di cha pinn mi pu na, ni ŋeer a, cha saajab ngbaan li cha.”

¹⁶ Liyaadaal ngbaan le Esɔ nan ki gir buen Edom aatiŋ ni.

¹⁷ Jakob ma nan buen Sukof aatiŋ ni, ki ti maa lidichal, ki ŋa tiwakor mu aaboo nima. Nima pu le bi yin kitiŋ ngbaan ke Sukof.

¹⁸ Kina le Jakob nan nyan ni Mesopotamia ki cha le ki ti fuu Sekem aatiŋ, ni laafee; kitiŋ ngbaan nan bi Kanaann aapepel ni la, le u kal nkpaakon mubaa ni, kitiŋ ngbaan chee,

¹⁹ le ki di tikunabr aamombil nkub daa nkpaakon ngbaan, Hamor u nan ye Sekem aate na, aayaabitiib chee.

²⁰ Le Jakob maa libimbiln ki toor kitork ki doon Uwumbɔr nima chee, le ki yin nima ke, El Elohe Israel.