Mpiin 30 - Uwumbɔr aagbaŋ

¹ Tɔ, Rachel aa nan ma ubo tii Jakob, nima pu na, u nan kpa ukpel Lea pu lipiipoln, le ki bui uchal Jakob ke, “Aa yaa kaa tii mi mbim kan, m ga kpo.”

² Jakob aaŋuul nan fii Rachel pu pam, le u bui u ke, “Maa ye Uwumbɔr ki gaa waatuln tun tii u. Uma le aa tii si mbim.”

³ Le Rachel nan bui uchal ke, “Maanaagbiipii Bilha sɔ. Doon u chee, nima kan, u ga maa ubo tii mi. Aa yaa ŋa kina kan, u ga maa ubo tii mi, le m li kpa mbim.”

⁴ Nima pu na, u nan di Bilha tii uchal, le u doon u chee.

⁵ Le Bilha nan dek lipuul ki ma ubijabo tii Jakob.

⁶ Rachel nan bui ke, “Uwumbɔr le toor maabɔr tii mi. Uma le ŋun maameel le ki tii mi ubijabo.” Nima pu na, u nan yin u ke Dann.

⁷ Le Bilha nan ki dek lipuul, le ki ki ma ubijabo uken tii Jakob.

⁸ Rachel nan ki bui ke, “M pɔɔn mbaa ki mee Uwumbɔr ki kan mbim ke nkpel aah kan pu na.” Nima pu na, u nan yin u ke Naftali.

⁹ Le Lea kan ke waa ki maa, le u di waanaagbiipiibo Silpa ki di tii uchal Jakob u di u ŋa upuu.

¹⁰ Le Silpa nan ma ubijabo tii Jakob.

¹¹ Lea nan bui ke, “M kpa liyimɔɔn.” Nima pu na, u nan yin u ke Gad.

¹² Silpa nan ki ma ubijabo uken tii Jakob.

¹³ Le Lea bui ke, “M kpa mpopiin pam. Dandana wee, bipiib biken ga yin mi ke mpopiindaan.” Nima pu na, u nan yin u ke Aser.

¹⁴ Lidicheel yoonn nan fuu, le Rubenn buen tisar ponn ni ki ti ban ni ŋisubil ŋibaa, bi yin ŋi ke ngeehm aasubil, le ki joo ni ŋi nan tii una Lea. Le Rachel bui Lea ke, “Tii mi aajapɔɔn aasubil ngbaan ŋibaa.”

¹⁵ Lea nan giin bui u ke, “Saah gaa m chee nchal pu na aa ŋeer aa? Dandana wee aa ki pɔɔni aabaa ke aa gaa njapɔɔn aasubil mu la aa?” Rachel nan bui u ke, “Aa yaa kii ki ga tii mi ŋisubil ngbaan kan, m ga di nchal tii si kinyeek kee, aa ni u doon.”

¹⁶ Tɔ, buyoonn Jakob nan nyan ni kisaak ki kun ni kijook wɔb na, le Lea buen u chee ki ti bui u ke, “Kinyeek kee, aa ga koo ni maadiik ni la; ba pu? m di njapɔɔn aasubil pan n‑yɔnn, aa pu a.” Nima pu na, Jakob nan koo Lea aadiik ni kinyeek ngbaan, le ki doon u chee.

¹⁷ Uwumbɔr nan ŋun Lea aameel pu, le u dek lipuul ki ki ma ubijabo ŋmuŋmur tii Jakob.

¹⁸ Le Lea bui ke, “Uwumbɔr pan mi maapar a, ba pu? m di maanaagbiipiibo tii nchal.” Nima pu na, u nan yin waabo ngbaan ke Isakar.

¹⁹ Le Lea nan ki dek lipuul liken ki ma ubijabo loloob tii Jakob,

²⁰ ki nan bui ke, “Uwumbɔr tii mi ipiin nyanyaan. Dandana wee, nchal ga nyuŋ mi, ba pu? m ki ma ubijabo loloob tii u.” Nima pu na, u nan yin u ke Sebulunn.

²¹ Le ni joo cha, le u nan ki ma upiibo mu, le ki yin u ke Daina.

²² Tɔ, Uwumbɔr aa ki suln Rachel aabɔr, u nan ŋun waameel le ki cha ni ŋaŋ u chee, le u ma mbim.

²³ U nan dek lipuul le ki ma ubijabo. Le u bui ke, “Uwumbɔr chuu nyan maanimɔɔn le ki tii mi ubijabo.

²⁴ Cha Uwumbɔr ki tii mi ubijabo.” Nima pu le u yin u ke Josef.

Jakob ni Labann aah nan kpokl pu na aabɔr

²⁵ Rachel aah nan ma Josef na, le Jakob bui Labann ke, “Cha m li chaa kun, ki gir buen ndo.

²⁶ Di mpuutiib ni maabim bi m tun tii si bi pu na tii mi aan m kun. Aa nyi maah tun litunyaan pu ki tii si na.”

²⁷ Le Labann nan bui u ke, “Cha m len tibɔr tee. M baal, ki ŋun ke si pu le Uwumbɔr ŋa m pu tinyoor.

²⁸ Tuk mi saapar aah ye pu na aan m pa si.”

²⁹ Le Jakob bui ke, “Aa nyi maah tun lituln tii si pu, ki joo saapiih i pɔr sakpen pu na.

³⁰ Saapiih siib i aa nan kpa aan m fuu ni na, aa kan ke i pɔr sakpen, le m yaa di i buen nimɔk na kan, Uwumbɔr ŋani tinyoor ŋani i pu. Dandana wee, n‑yoonn fuu ni ke m mu ban mbaa yaan.”

³¹ Le Labann baa u ke, “Aa ban ke m pa si ba?” Le Jakob bui u ke, “Maa ban tipar tibaa. M ga li beenin kpaa saapiih ngbaan, see aa ti kii maah ban m kpokl si pu na.

³² Cha m lik saapiih ngbaan ponn ni, ki nyan ipiih imɔk kpa mbɔm na, ni imɔk kpa mpem ni mbɔm na, ni iŋoob imɔk kpa mpem ni mbɔm na. Maah ban tipar ti na le na.

³³ Ni yaa bi cha kan, aa lik ke m ye unibamɔnn aan maa ye. Buyoonn aa ga nan lik i na, aa yaa kan ipiih i kaa kpa mbɔm, bee iŋoob i kaa kpa mpem ni mbɔm na i ponn ni kan, aa bee ke m sun i la.”

³⁴ Le Labann bui u ke, “M kii kina. Ti ga ŋa saah kpokl mi pu na la.”

³⁵ Tɔ, liyaadaal ngbaan le Labann nan nyan iŋoja i ye ichachal na, ni iŋoninkpel i mu ye ichachal, bee i kpa mpem i pu na ibaa. U nan ki nyan ipihbɔn mu mɔmɔk le ki di i mɔmɔk ŋa ujapɔtiib aaŋaal ni,

³⁶ ki cha bi chuun iwiin itaa ki buen timoor ni, nin chee daa na. Le Jakob nan gaa Labann aapiih i gur na ki joo i.

³⁷ Jakob nan ban isui ibaa aaboln aabon, le ki ban isui i aawon joon na mu aabon, le ki chuu puur tidapɔr i pu.

³⁸ U nan di ibon ngbaan le ki bil tiwakor ngbaan aah nyu nnyun nin chee na. U nan di ibon ngbaan di bil nnyun chee, ba pu? buyoonn tiwakor dan ti nan nyu nnyun na kan, le ija dur isal pu.

³⁹ Waah di ibon ngbaan bil pu na le ye ke tiwakor yaa lik kani ibon ngbaan kan, i ga maa i kpa mbɔm ni mpem na.

⁴⁰ Jakob nan ki yakr iŋoob ni ipiih tɔb chee, le ki cha ti sil toŋ Labann aawakor ti ye tichachal ni tibɔmbɔnn na wɔb. U nan ŋa kina ke uma aawakor pɔr kpee, le ki yakr ti Labann yaar chee.

⁴¹ Tiwakor ti nan kpa laafee na yaa ti ban ti dur tɔb pu kan, le Jakob di ibon ngbaan di bil yaah nyu nnyun nin chee na, nima kan, i ga maa ibɔnbɔn ni ichachal,

⁴² le kaa nan di ibon ngbaan di bil i kaa kpa laafee na aanimbiin ni. Nima pu le Labann aawakor ti nan gur na mɔmɔk aa kpa mpɔɔn, le Jakob yaar mɔmɔk ma nan kpa mpɔɔn.

⁴³ Kina le Jakob nan ŋa mpɔɔndaan ki kpa tiwakor, ni binaagbiib, ni laakumii tiib, ni ibon sakpen.