Mpiin 3 - Uwumbɔr aagbaŋ

Unibɔn aah yii Uwumbɔr aamɔb ki tun titunwanbir pu na

¹ Uwumbɔr aah nan naan ipeel imɔk na, uwaa le nan kpa nlan ki jer i mɔmɔk. Le u baa upii ngbaan ke, “Uwumbɔr sil bui ke ni taa ji kisaak ngbaan ni aasub bubaa aasubil aa?”

² Le upii ngbaan bui u, “Ti ga ŋmaa ji ŋisubil ngbaan mɔk,

³ see busub bu si kaasisik ni na, le Uwumbɔr bui ke ti taa ji bu aasubil, hali ti yaa meeh ŋi kan, ti ga kpo.”

⁴ Le uwaa bui ke, “Naa ye mbamɔn, naan kpo.

⁵ Uwumbɔr nyi ke ni yaa jin ŋi kan, ninimbil le ga woln, le ni ga bee ni ŋan na, ni ni kaa ŋan na, ki ga li bi ke waah bi pu na.”

⁶ Le upii lik ŋisubil ngbaan, ki kan ŋaah ŋan pu na, ki dakl ke unimbil yaa woln kan, ni ga li ŋan sakpen, le ki neen ŋi, le ki ker ŋi ki moo, le ki di ŋiken tii uchal mu, le u mu moo.

⁷ Baah moo ŋi doo na, le binimbil daa woln, le bi bee ke bi chuun biŋmeen la, nima pu na, le bi bar tifar ki di doŋ binimbiin ni.

⁸ Kijook ngbaan le bi ŋun Tidindaan Uwumbɔr chuun kisaak ni, le bi san ti bɔr isui aakaasisik ni.

⁹ Le Tidindaan Uwumbɔr yin uja ngbaan ke, “Aa bi la?”

¹⁰ Le uja bui u ke, “M ŋun saah chuun kisaak ni pu na; le maah chuun ŋŋmeen na, ijawaan chuu mi, le m bɔr.”

¹¹ Le Uwumbɔr baa u ke, “Ŋma tuk si ke aa chuun aaŋmeen? Maah bui si ke aa taa ji ŋisubil ŋi na, le aa jin aa?”

¹² Le uja bui u ke, “Saah di upii u tii mi ke u li bi m chee na, uma le tii mi ŋisubil ngbaan, le m moo.”

¹³ Le Uwumbɔr baa upii ngbaan ke, “Ba ŋa aa ŋa kina?” Le upii bui u ke, “Uwaa le ŋmann mi, le m moo.”

Uwumbɔr aah daa uwaa, ni upii, ni uja aatafal pu na

¹⁴ Le Uwumbɔr bui uwaa, “Saah ŋa kina na, ipeel mɔmɔk ni, m puun lii sin baanja le pu. Din ki joo cha, aa ga li baar titan ni, ki li ji titan, saamɔfal mɔmɔk ni.

¹⁵ Aa ni upii ngbaan ga li ye tɔb aadim la. Saabim ni waabim mu ga li ye tɔb aadim la. Uyaabil ga faa wii aayil, le aa mu ga gaa utaagbeln.”

¹⁶ Le Uwumbɔr bui upii ke, “Aa ga kan falaa pam timal ponn ni. Ni ki kpee na, aa ga li ban ke aachal li gee si, le u ga li ye saayidaan.”

¹⁷ Le Uwumbɔr bui uja ngbaan ke, “Saah ŋun tii aapuu ki yii maamɔb ki jin ŋisubil ngbaan na, m puun lii kitiŋ pu. Aa ga tun ki kan falaa le ki nin kan tijikaar ji.

¹⁸ Kitiŋ ga pa ikokon ni ichakpeejagar; le aa ga li ji timoor ni aasufar.

¹⁹ Aa ga ko le kitotoŋ naa si waahr, le aa nin kan tijikaar ki ji, ki ti saa saakundaal. Le aa ga ki gir koo titan ni; ba pu? aa nyan titan ni la. M nan di titan le naan si, le aa ga ki kpaln titan.”

²⁰ Adam nan yin upii ke Iif; ba pu? uma le ye binib mɔmɔk aana.

²¹ Le Uwumbɔr di tiwakor aagban ki di jab, ki ŋa tiwanpeenkaan ki di peen bi.

Uwumbɔr aah nan jenn nyan Adam ni upuu kisaak ngbaan ni pu na

²² Tidindaan Uwumbɔr nan bui ke, “Dandana, uja ngbaan ŋa ke timi aah bi pu na, ki bee ni ŋan na, ni ni kaa ŋan na. Taan ki cha u ji limɔfal aasub aasubil mu, aan ki li bi cha n‑yoonn mu kaa kpa ndoon na.”

²³ Le Uwumbɔr jenn nyan u Edenn aasaak ngbaan ni, le ki cha u ko waah nyan ni titan ti ponn ni na,

²⁴ le ki di tiwanfuurkaan ni kpa ifeen na, ki di siin kisaak ngbaan aawipuul wɔb, le ki di mmiigaal mu naahn kijuk ki fenni ŋipepel mɔmɔk na, ki kiir kisaak ngbaan. Nima kan, unii ubaa aan ki pii limɔfal aasub chee.