Mpiin 29 - Uwumbɔr aagbaŋ

Jakob aah nan ti fuu uweeja Labann do pu na aabɔr

¹ Jakob nan fii Betel aatiŋ ni, le ki nab waasachuln pu ki cha liwipuul wɔb.

² Waah cha na, le u ti kpaan nyan nnyunbun mubaa pu, le ki kan ipiih ŋiker ŋitaa pu dɔ mann goln nnyunbun ngbaan. Bipihkpaab bi nan joo ipiih ngbaan na nan lu nnyunbun ngbaan aanyun le tii ipiih ngbaan le i nyu, le bi nan di litakpasakpeln libaa di biin nnyunbun ngbaan aamɔb.

³ Bipihkpaab ngbaan mɔmɔk yaa nan ti joo ni baapiih kan, le bi chuu biln litakpal ngbaan le ki lu nnyun tii i, le ki ki giin litakpal na di biin mu pu.

⁴ Jakob nan baa bipihkpaab ngbaan ke, “Njɔtiib, ni nyan ni la chee?” Le bi bui ke, “Ti nyan ni Harann aatiŋ ni la.”

⁵ Le u baa bi ke, “Ni nyi Labann, u ye Nahor aajapɔɔn na aa?” Le bi bui u ke, “Een, ti nyi u.”

⁶ Jakob nan ki baa bi ke, “U pɔɔ ɔɔ?” Le bi bui u ke, “U pɔɔ. Ubisal Rachel le joo ute aapiih choo na.”

⁷ Le Jakob bui ke, “Nwiin aah laa wiir sakpen, kaa kee ŋeer ni di ipiih kunn na, ba ŋa naan piir nnyunbun aan ki lu nnyun tii ipiih ki ki giin i buen timoor ni?”

⁸ Le bi giin bui u ke, “Taan ŋmaa ŋa kina, see ipiih ngbaan mɔmɔk fuu ni waahr le ti nin piir ki tii i nnyun.”

⁹ Buyoonn Jakob nan bi len bi chee tibɔr ngbaan na, le Rachel fuu ni ki joo ni ute aapiih. U nan ye upihkpaal la.

¹⁰ Jakob aah nan kan Rachel joo ni uweeja Labann aapiih na, le u buen nnyunbun na chee, ki ti chuu piir litakpal ngbaan ki lun nnyun tii ipiih ngbaan.

¹¹ Le u buen ti moor Rachel aatakpiln ki piin ki kaani mpopiin pu.

¹² U nan tuk Rachel ke, “M ye aate aamaal ni aanii la, Rebeka le ye nna.” Rachel nan san buen ti tuk ute;

¹³ le ute aah ŋun uweeja Jakob aabɔr na, u nan san tooh u nsan pu ki ti bub chuu u ki moor utakpiln, le ki di u buen udo. Jakob nan tuk u naah ŋa pu, u ti dan u chee na.

¹⁴ Le uma Labann bui u ke, “Een, mbamɔn, aa sil ye maawon, ni maasin ni aanii la.” Le Jakob nan bi u chee ki ti saa uŋmal ubaa.

Jakob aah nan yoor Rachel ni Lea pu na aabɔr

¹⁵ Labann nan bui Jakob ke, “Naa mɔ ke aa li tun lituln tii mi dafir, ke saah ye maanii na pu. Aa ban ke m pa si iŋa?”

¹⁶ Labann nan kpa bisatiib bilee, bi nan yin upol ke Lea, ki yin uwaatiir ke Rachel.

¹⁷ Lea aanimbil nan ŋan pam, Rachel mu nan tee ŋan sakpen ki jer u.

¹⁸ Jakob nan gee Rachel sakpen, nima pu le u bui ke, “Aa yaa ga di Rachel tii mi kan, m ga tun lituln ki ti saa ŋibin ŋilole tii si.”

¹⁹ Le Labann bui u ke, “M yaa di u tii si kan, ni ŋan ki jer m di u tii unii ubaa, kina pu na, li bi m chee ki tun tii mi.”

²⁰ Le Jakob nan tun ki ti saa ŋibin ŋilole ngbaan ke u gaa Rachel, le waah nan gee Rachel sakpen pu na, ŋibin ŋilole ngbaan aa nan yunn u chee.

²¹ N‑yoonn ngbaan aah fuu na, le Jakob bui Labann ke, “N‑yoonn ngbaan fuu a, di aabisal tii mi.”

²² Le Labann nan siin nwiin mu daal bi ga kpaan tɔb chee na, le ki chɔi binib ke bi dan, le ki ŋa njim.

²³ Kinyeek ngbaan le Labann nan di Lea koon Jakob aadiik ni ti tii u, le bi kpaan tɔb chee.

²⁴ Labann nan di waanaagbiipiibo Silpa di tii ubisal Lea, u li tun waatuln.

²⁵ Naah woln kichakpiik ni na, le Jakob bee ke ni ye Lea le u ni u fe kpaan kinyeek na. Le u buen Labann chee ki ti bui u ke, “Ba ŋa aa ŋa mi kina? M nan choon si ki ban Rachel la. Ba ŋa aa ŋmann mi?”

²⁶ Le Labann nan bui u ke, “Ni ye timi aakaal le ke see ti pue di upiibopol tii tichal, le ki nin paan uwaatiir.

²⁷ Cha likpaakool libaa jer waahr, aan saah yoor Lea pu na aasariyaa yaa jer kan, m ki di Rachel mu tii si; le aa ga ki tun lituln tii mi ŋibin ŋilole u mu pu.”

²⁸ Jakob nan kii tii u, le likpaakool libaa ngbaan aah jer na, Labann nan di Rachel mu di tii u, le u di Rachel ŋa upuu.

²⁹ Labann nan ki di waanaagbiipiibo Bilha mu tii ubisal Rachel, u li tun lituln tii u.

³⁰ Jakob nan ki yoor Rachel mu u li ye upuu, le u nan gee u ki jer Lea. Rachel pu na, u nan ki tun lituln ki ti saa ŋibin ŋilole ki tii Labann.

Jakob aah nan ma mbim pu na aabɔr

³¹ Uwumbɔr aah nan kan ke Jakob gee Rachel ki jer Lea na, le u nan cha Lea pue ma mbim, le Rachel nan chuun kaa maa.

³² Lea nan dek lipuul, le ki ma ubijabo. Le u bui ke, “Uwumbɔr kan maamukl. Maah ma ubijabo wee na, nchal ga li gee mi.” Nima pu na, u nan yin ubo ngbaan ke Rubenn.

³³ U nan ki dek lipuul ki ki ma ubijabo, ki bui ke, “Uwumbɔr ŋun ke nchal aa gee mi, le u ki tii mi ubijabo wee mu.” Nima pu na, u nan yin u ke Simeonn.

³⁴ Le u nan ki dek taataa ki ki ma ubijabo uken. U ki bui ke, “Dandana wee, maah ki ma ubijabo tatar tii nchal na kan, u ga moo joo mi mbamɔm.” Nima pu na, u nan yin u ke Liifai.

³⁵ Le u nan ki dek lipuul ki ki ma ubijabo uken. U nan ki bui ke, “N‑yoonn mue, m ga pak Uwumbɔr sakpen.” Nima pu na, u nan yin u ke Juda. Le Uwumbɔr nan laa cha u di cha kina kaa ki ma.