Mpiin 25 - Uwumbɔr aagbaŋ

Abraham aamaal muken aabɔr

¹ Abraham nan ki yoor upii u bi yin u ke Ketura na, ki di ŋa upuu.

² Ketura mu nan ma Simrann, ni Joksann, ni Medann, ni Midiann, ni Isbak, ni Sua, ki tii Abraham.

³ Joksann le nan ye Seba ni Dedann aate, le Dedann aayaabitiib nan ye Asur tiib, ni Letus tiib, ni Leum tiib.

⁴ Midiann aajapɔtiib le nan ye Efa, ni Efer, ni Hanok, ni Abida, ni Eldaa. Bimina mɔmɔk nan ye Ketura aayaabitiib la.

⁵ Abraham nan di waawangol mɔmɔk tii ujapɔɔn Aisak u Sara nan ma tii u na.

⁶ Waah nan laa beenin fu na, u nan ki di ngem mu tii upuutiib biken aah nan ma mbim mu tii u na mu. U nan yakr ujapɔtiib ngbaan di buen liwipuul wɔb aatiŋ kibaa ni, ki cha ujapɔɔn Aisak.

Abraham aah nan kpo, ni baah sub u pu na aabɔr

^7-8 Abraham nan por pam, u nan saa ŋibin nkub ni imonko itaa ni kipiik ni ŋiŋmu le ki nin kpo.

⁹ Le ujapɔtiib Aisak ni Ismael nan di u sub Makpela aatakpaluŋ aakaakul li bi bukpaab bu bi Mamre aawipuul wɔb na ponn ni. Sohar aajapɔɔn Efronn u ye Hef aanii ubaa na le nan yeh bukpaab ngbaan.

¹⁰ Bukpaab ngbaan le Abraham nan daa Hef yaab chee na, le bi nan di Abraham sub upuu Sara chee.

¹¹ Abraham aah nan kpo na, le Uwumbɔr nan ŋa tinyoor ŋa Abraham aabo Aisak pu, le u nan bi nnyunbun mu bi nan yin mu ke “U bi ki waa mi na aanyunbun” chee.

Ismael aamaal aabɔr

¹² Abraham le nan ma Ismael mu, una le nan ye Hagar, u nan ye Ijipt yaab aapiibo la, le ki nan ye Sara aanaagbiipii.

¹³ Ismael aabim aah paa tɔb pu pu na aayimbil sɔ: Nebayof, ni Kedar, ni Adbeel, ni Mibsam,

¹⁴ ni Misma, ni Duma, ni Masa,

¹⁵ ni Hadad, ni Tema, ni Jetur, ni Nafis, ni Kedema.

¹⁶ Bijab kipiik ni bilee ngbaan le aanib nan ŋa ŋitimbol kipiik ni ŋilee, ki di biyaajatiib ngbaan aayimbil yin baatim.

¹⁷ Ismael nan saa ŋibin nkub ni piitaa ni ŋilole le ki nin kpo.

¹⁸ Ismael aayaabitiib nan bi Hafila ni Sur aakaasisik ni, ki cha Ijipt aawipuul wɔb ki bi Asiria aasan chee na. Bi ni Abraham aamaal biken aa nan kpaan bi tɔb chee.

Aisak aah nan ma Esɔ ni Jakob pu na aabɔr

¹⁹ Abraham aajapɔɔn Aisak aabɔr sɔ:

²⁰ Aisak nan ye ŋibin imonko ilee le ki yoor upuu Rebeka u nan ye Betuel aabisal na. Betuel nan ye Aram aatiŋ aanii, kitiŋ ki bi Mesopotamia ni na. Rebeka nan ye Labann aaninkpan la.

²¹ Rebeka aah nan bi ki yunn kaa ma pu na, le uchal Aisak nan mee Uwumbɔr tii u. Le Uwumbɔr nan ŋun waameel ngbaan ki cha Rebeka dek lipuul.

²² U nan dek bijaam aapuul la, le bi nan bi uponn ni ki leer tɔb. Rebeka nan bui ke, “Ba ŋa mbimbin kina aaboln dan m pu?” Le u nan mee Uwumbɔr ke u cha u bee mbimbin ngbaan aatataa.

²³ Le Uwumbɔr nan bui u ke, “Ŋinibol ŋilee le bi aaponn ni; saah ga maa bijaam bi na ga li ye ŋinibol ŋilee aanib la, le ubaa ga li pɔɔ jer uken, upol le ga nan li tun tii uwaatiir.”

²⁴ Naah nan ŋeer ke u maa na, le u ma mbijabim bi ye bijaam.

²⁵ Njan aabo nan man le ki kpa tikor, nima pu na, bi nan yin u ke Esɔ.

²⁶ Ubo u nan paa na nan nyan ni le ki joo Esɔ aataagbeln, nima pu na, bi nan yin u ke Jakob. Aisak nan ye ŋibin imonko itaa le ki ma bijaam ngbaan.

Esɔ aah nan kooh waaninkpir tii Jakob pu na aabɔr

²⁷ Mbim ngbaan nan muun ki ŋa binib, le Esɔ nan nyi kikpaŋ aatuln pam, le ki nan gee chaa timoor ni sakpen, le Jakob nan ye unii u bi suuna na, le ki nan gee u li bi linampal.

²⁸ Esɔ aah nan ye ukpan ki ku ipeel tii ute Aisak pu na, le u nan gee u pam, le Rebeka mu nan gee Jakob.

²⁹ Daalbaadaal le Jakob nan bi ŋaa ŋituun aakpin, le Esɔ nyan ni kikpaŋ, le nkon joo u sakpen,

³⁰ le u bui Jakob ke, “M ga kpo nkon, tii mi saakpimann ngbaan siib m wub.” Nima pu le bi nan ki yin u ke Edom.

³¹ Jakob nan giin bui u ke, “Di tininkpir tii mi aan m mu tii si tikpin ngbaan.”

³² Esɔ nan bui u ke, “Tɔ, nkon ban mu ku mi la, tininkpir na ga ŋa mi ba?”

³³ Jakob nan bui u ke, “Pue puu tipuur ke aa ga di tininkpir ngbaan tii mi.” Esɔ nan puu tii Jakob le ki di tininkpir ngbaan kooh tii u.

³⁴ Le Jakob mu di tijikaar ni tikpin ngbaan tii Esɔ. U nan jin ki nyun le ki fii buen. Nima le mɔk ke Esɔ aatafal aa nan bi tininkpir ni.