Mpiin 21 - Uwumbɔr aagbaŋ

Sara aah ma Aisak pu na aabɔr

¹ Uwumbɔr nan ŋa tinyoor ŋa Sara pu, waah nan puu ke u ga ŋa pu na,

² le u dek lipuul ki ma ubijabo tii uchal Abraham, waah nan pɔr sakpen buyoonn na. U nan ma u buyoonn Uwumbɔr nan len ke bi ga nan maa u na la.

³ Abraham nan yin u ke Aisak,

⁴ le ubopɔɔn ngbaan aah nan ti saa iwiin iniin na, le ute Abraham gii uchakpaln, Uwumbɔr aah nan tuk u ke u ŋa pu na.

⁵ N‑yoonn ngbaan Abraham nan ye ŋibin nkub le ki nin ma Aisak.

⁶ Sara nan bui ke, “Uwumbɔr tii mi mpopiin, le ni mu ki kpa tilaar, le unii umɔk ŋun tibɔr tee na ga laa.”

⁷ Le u ki len ke, “Ŋma ga ŋmaa bui Abraham ke upuu Sara ga ki maa ubo ki joo u? M ma ubijabo buyoonn u por na.”

⁸ Aisak nan muun, le waah nan lii libiil na, Abraham nan ŋa njim sakpiin.

Abraham aah nan nyan Hagar ni waabo pu na aabɔr

⁹ Daalbaadaal le Ismael, u Ijipt yaab aapiibo Hagar nan ma u Abraham chee na, nan bi ŋani Aisak mbɔnyun.

¹⁰ Le Sara kan bi, le naa mɔɔr u, le u bui uchal Abraham ke, “Nyan unaagbiipii wee ni waabo aado. Unaagbiipii wee aabo aa kpa nsan u ji lifaal li maabo Aisak ga ji na.”

¹¹ Le ni bii Abraham aasui pam, ba pu? Ismael mu nan ye waabo la.

¹² Tɔ, Uwumbɔr nan bui Abraham ke, “Taa cha ubo ngbaan ni una aabɔr li muk si sakpen. Ŋa Sara aah len ke aa ŋa pu na. Ni ye mbamɔn ke Aisak pu le m puu ke aa ga kan yaabitiib.

¹³ M ga cha Ismael mu maa pam, aan bi mu ŋa litimbokpaan. U mu ye aajapɔɔn la.”

¹⁴ Ni woln kichakpiik ni le Abraham ban tijikaar, le ki ban nnyun ŋa ntuun ni, ki di baln Hagar aabɔgbiln pu, le ki di waabo ngbaan tii u, le ki bui u ke u li cha. Hagar nan chuun le ki yenni Beerseba aateersakpiin ni.

¹⁵ Waah nan joo nnyun mu na nan ti doo, le u di waabo Ismael di bil kitiŋ, busub bubaa taab,

¹⁶ le ki buen ti kal nibaa chee ni daa siib ki cha ubo ngbaan. U nan bui ke, “Maan ŋmaa li ka ki kan maabo aah ga kpo pu na.” Le u nan ka nima ki wii.

¹⁷ Uwumbɔr nan ŋun ubo ngbaan aah wii pu na, le upii ngbaan nan ŋun Uwumbɔr aaneel nyan ni paacham ki baa u ke, “Hagar, ba muk si? Taa san ijawaan, Uwumbɔr ŋun saabo aah wii pu na.

¹⁸ Fiin, ki buen ti yoor ubo ngbaan ki sɔŋ usui. M ga cha uyaabitiib ŋa litimbokpaan.”

¹⁹ Le Uwumbɔr cha unimbil likr, le u kan nnyunbun nima chee. Le u san buen ti lun nnyun nan tii waabo ngbaan, u nyun, le ki lun nnyun gbiin ntuun na mu.

²⁰ Ubo ngbaan aah nan bi muun ni na, Uwumbɔr nan bi u chee. U nan bi Parann aateersakpiin ni, le ki ŋa ukpakpaan.

²¹ Una nan yoor Ijipt yaab aapiibo le tii u.

Abraham ni Abimelek aah nan ŋa kimɔbaan pu na aabɔr

²² N‑yoonn ngbaan le Abimelek ni waajab aaninkpel u bi nan yin u ke Fikol na, nan buen Abraham chee ki ti bui u ke, “M nyi ke Uwumbɔr bi aa chee ki ter si n‑yoonn mɔmɔk.

²³ Nima pu na, puu Uwumbɔr aanimbiin ni ke saan ŋmann mi, bee maabim, bee n‑yaabitiib. M si aachaŋ ni pam, aa mu puu ke aa ga li si nchaŋ ni, ni kitiŋ kimina aanib pu.”

²⁴ Abraham nan giin bui u ke, “M puu.”

²⁵ Abraham nan tuk Abimelek waanaagbiib aah jenn uma Abraham aanib ki gaa nnyunbun mubaa pu na.

²⁶ Abimelek nan bui ke, “Maa nyi unii u ŋa kina na. Saa tuk mi tibɔr ngbaan, dandana wee le m laa ŋun ti.”

²⁷ Le Abraham nan tii Abimelek ipiih, ni inaa, le bima bilee ngbaan ŋa kimɔbaan.

²⁸ Abraham nan yakr ki nyan ipiih i laa diin na ilole, waapiih ponn ni,

²⁹ le Abimelek baa u ke, “Ba ŋa aa ŋa kina?”

³⁰ Abraham nan bui Abimelek ke, “Gaa ipiih ilole yee. Aa yaa gaa ipiih ngbaan kan, ni ga mɔk ke mi Abraham le gbii nnyunbun ngbaan.”

³¹ Nima pu na, bi nan yin nima chee ke Beerseba, ba pu? nima chee le Abraham ni Abimelek nan puu tii tɔb.

³² Baah nan ti ŋa kimɔbaan Beerseba aanyunbun ngbaan chee doo na, le Abimelek ni Fikol nan gir buen Filistia aatiŋ ni.

³³ Beerseba aanyunbun ngbaan chee le Abraham nan ŋum busub bu aafar aa gbaar n‑yoonn mɔmɔk na, le ki doon Tidindaan Uwumbɔr u bi kaa kpa ndoon na.

³⁴ Abraham nan bi Filistia aatiŋ ni ki yunn pam.