Mpiin 2 - Uwumbɔr aagbaŋ

¹ Kina le Uwumbɔr nan naan kitaapaak, ni kitiŋ, ni tiwan mɔmɔk doo.

² Winlole daal, le Uwumbɔr nan tun lituln mɔmɔk doo, ki kal fuur.

³ Uwumbɔr nan ŋa tinyoor ŋa winlole daal pu ki ŋa mu chain, ba pu? waah nan naan dulnyaa aawan mɔmɔk doo na, liyaadaal ngbaan le u kal ki fuur.

⁴ Uwumbɔr nan naan dulnyaa aawan mɔmɔk kina la. Buyoonn Tidindaan Uwumbɔr nan naan dulnyaa aawan mɔmɔk na,

Edenn Aasaak aabɔr

⁵ tiwanpunnkaan ni nwanbim aa nan kee punni, ba pu? Uwumbɔr aa nan kee cha utaal nu, uja mu aa nan bi ki ga ko kisaak;

⁶ limaln le nan lir kitiŋ pu le ki soon.

⁷ Uwumbɔr nan di titan ki di naan uja, le ki fuur libuln ŋa umɔfal ni, le u kpaln unibɔn.

⁸ Uwumbɔr nan ŋa isui i lu ŋisubil na aasaak, liwipuul wɔb, Edenn aatiŋ ni, le ki di waah naan uja u na ŋa ki ponn ni.

⁹ Uwumbɔr nan cha isui i lu ŋisubil nyaan na aabɔŋ punn kisaak ngbaan ni, ŋisubil ngbaan ŋan linimbil chee, ki mɔ lijil. Kisaak ngbaan aakaasisik ni, busub bubaa nan bi, ki ye limɔfal aasub, buken mu nan bi ki ye mbeem aasub, unii yaa jin bu kan, u ga bee ni ŋan na, ni ni kaa ŋan na.

¹⁰ Limɔɔl libaa nan bi Edenn aatiŋ ngbaan ni, ki puu lir kisaak ngbaan ni. Limɔɔl ngbaan aah nyan kitiŋ ngbaan ni na, le li yakr ki ŋa ŋimɔɔ ŋinaa.

¹¹ Bi yin njan aapaln ke Pisonn, li nan puu dii Hafila aatiŋ ni la.

¹² Salmaa nyaan, ni tulalee, ni ŋitakpanyaan le nan bi nima.

¹³ Bi yin lelee aapaln ke Gihonn, li nan puu dii Kus aatiŋ ni la.

¹⁴ Bi yin taataa aapaln ke Tigris, li nan puu dii Asiria aawipuul wɔb la; le bi yin linanar ke Yufrates.

¹⁵ Uwumbɔr nan di uja ngbaan ŋa kisaak ngbaan ni, ke u li ko, ki li lik kisaak ngbaan.

¹⁶ Uwumbɔr nan bui u ke, “Aa ga ŋmaa ji ŋisubil ŋi mɔmɔk bi kisaak kee ponn ni na,

¹⁷ see busub bu aasubil cha unii beer ni ŋan na, ni ni kaa ŋan na. Aa taa ji busub ngbaan aasubil. Aa yaa jin kan, see aa kpo.”

¹⁸ Tidindaan Uwumbɔr nan ki bui ke, “Naa ŋan ke uja li bi ubaa. M ga naan uŋeer u ga li ter u na ki tii u.”

¹⁹ Uwumbɔr nan di titan le ki di naan tiwakor, ni ipeel, ni inyoon, ni tiwan nimɔk fu na. Le u di ni mɔmɔk dan uja ngbaan chee, le uja ngbaan tii ni ŋiyimbil. Waah yin ni mɔmɔk pu na, naayimbil le na.

²⁰ Le uja ngbaan nan yin tiwakor, ni ipeel, ni inyoon, ni tiwan nimɔk fu na aayimbil; tɔ, tiwan ngbaan mɔmɔk ponn ni nibaa aa nan ye uŋeer, ki ga ŋmaa ter u.

²¹ Uwumbɔr nan cha uja ngbaan doon geen, ke linikpol na. Waah geen kina na, le u chuu nyan uja ngbaan aasikaakpab mubaa, ki ki giin ŋeeb.

²² Uwumbɔr nan di nsikaakpab na, ki di naan upii. Uja ngbaan aah finn na, le Uwumbɔr di upii ngbaan dan u chee.

²³ Le uja ngbaan bui ke, “Aa ye unii le ke maah ye pu na, likpabl li nyan ni maakpab ni na, ni tiwon ti ye maawon na. M ga yin si ke upii, ba pu? aa nyan ni mi uja ni la.”

²⁴ Nima pu le ni ŋan ke uja ni upuu nya cha bitetiib ni binatiib, ki kpaan tɔb chee, ki ŋa unibaan.

²⁵ Le uja ni upii nan chuun biŋmeen, kaa san inimɔɔn.