Mpiin 19 - Uwumbɔr aagbaŋ

Sodom yaab aatunwanbir aabɔr

¹ Uwumbɔr aatuuntiib bilee ngbaan nan ti fuu Sodom aatiŋ ni, kijook wɔb la, le Lot mu nan ka mbisamɔb nin chee bi diir koo kitiŋ ni na. Lot aah kan bi na, u fii tooh bi nsan pu, le ki ti doon bi,

² le ki bui bi ke, “Ndindatiib, taa jer ndo man. M bi do ke m chann nimi tichann la. M gaŋ nimi, dan ndo man, aan ki nan finn nitaa, ki doon kinyeek kee ndo man. Ni yaa fe woln kichakpiik ni kan, ni ki nab nimi aasachuln.” Le bi nan bui Lot ke, “Aayii, ti ga ti doon lipaal, kinyaŋ ponn ni la.”

³ U nan bi ki gaŋni bi, le bi ti kii tii u, le ki buen udo. Lot nan cha bi ŋa tijikaar nyaan tii bi, le bi jin.

⁴ Waahr aan bicham ngbaan koo ti doon na, Sodom aatiŋ ni aajab, binachipɔm, ni bininkpiib mɔmɔk, nan dan ki nan mann goln Lot aadichal.

⁵ Bi nan tar, le ki baa Lot ke, “Bijab bi bi aado kinyeek kee na bi la chee? Nyan bi tii ni timi. Ti ban ti doon bi chee la.”

⁶ Le Lot nan nyan ki piin leŋ bicham ngbaan pu,

⁷ le ki bui Sodom aajab ngbaan ke, “Njɔtiib, m gaŋ nimi, taa tun bakaa ngbaan aaboln kina man.

⁸ Lik man, mbisatiib bilee mɔk le bi, kaa nyi uja. Cha m nyan bi tii nimi aan ni ŋa bi naah ban pu na. Tɔ, bijab bee ye maacham la, nima pu na, see m kii bi pu. Taa ŋa bi nibaa man.”

⁹ Le Sodom aajab ngbaan nan bui Lot ke, “Siir nima, uwɔwɔnja wee. Aa ye ŋma ki si tuk timi taah ga ŋa pu na. Siir nima, lik suuna, ni yaa kaa ye kina kan, taah ga ŋa si pu na ga jer bi yaan.” Bijab ngbaan nan tur Lot, ke bi foor u jaaleŋ chee, aan ki gbaa wii jaaleŋ ki koo bicham ngbaan chee.

¹⁰ Le bicham bilee ngbaan laan chuu Lot, le ki daa u koon ni bibaa chee kidiik ni, le ki piin jaaleŋ.

¹¹ Bi nan cha Sodom aajab ngbaan jɔb, le baa ki waa mbisamɔb chee.

Lot aah nan nyan Sodom aatiŋ ni pu na aabɔr

¹² Bijab bilee ngbaan nan bui Lot ke, “Nibaakan, aa ga ki li kpa japɔtiib, ni bisatiib, ni chootiib, bee aado yoo ubaa yaa bi kitiŋ kee ni kan, yin bi mɔmɔk, bi san nya kitiŋ kee ni,

¹³ ba pu? ti ban ti bii kitiŋ kee din wee la. Uwumbɔr kan binib bee aatunwanbir aah wiir pu na, le u tun ni timi ke ti nan bii Sodom aatiŋ ngbaan.”

¹⁴ Le Lot san buen uchootiib bilee bi nan ban bi yoor ubisatiib na chee, ki ti bui bi ke, “Ŋa mala ki san nya do man. Uwumbɔr ban u bii kitiŋ kee la.” Le bi nan dak ke Lot ŋmanni bi la.

¹⁵ Naah woln kichakpiik ni na, le bijab bilee ngbaan bui Lot ke, “Ŋa mala ki yoor aapuu ni aabisatiib bilee na, ki san ŋmar man, nima kan, Uwumbɔr yaa bii kitiŋ ngbaan kan, naan kpo.”

¹⁶ Lot aa nan ŋa mala. Le Uwumbɔr nan san u kinimbaak, le bijab bilee ngbaan nan chuu u ni upuu, ni ubisatiib bilee na aaŋaal, le ki dar bi nyan kitiŋ ngbaan ni.

¹⁷ Le bijab ngbaan ubaa bui bi ke, “Li san mala ki ŋmar man. Ni taa fenn lik nipuwɔb, ki mu taa sil nsan ni, kifataŋ kee ni. Ni li san cha ŋijoo ŋee paab, nima kan, naan kpo.”

¹⁸ Lot nan giin bui bi ke, “Maaninkpiib, aayii, m gaŋ nimi, taa siin timi dandar kina.

¹⁹ Ni ŋa timi tiŋann ki gaa timi lii a, ŋijoo ŋee paab daa sakpen a, nibaakan, taan kee fuu nima le tibɔbir ga pii timi, le ti kpo.

²⁰ Naa waa kitiwaatiir kimina aa? Ti peen kima la. Ni waa ki, cha ti san buen nima. Ki ye kitiwaatiir la, le ti yaa fuu nima kan, ti ga ŋmar.”

²¹ Le Uwumbɔr aatuun ngbaan giin bui u ke, “Tɔ, ni ŋan, m kii kina. Maan bii kitiŋ ngbaan ma.

²² Ŋa mala ki li san man. Ni yaa kaa fuu kitiwaatiir ngbaan ni kan, maan ŋmaa tun maah ban m ŋa pu na.” Lot aah nan yin kitiŋ ngbaan ke kitiwaatiir na, le bi yin ki ke Soar.

Uwumbɔr aah bii Sodom ni Gomora aatim pu na

²³ Nwiin aah bi puur buyoonn na, le Lot fuu Soar aatiŋ ni.

²⁴ N‑yoonn ngbaan le Uwumbɔr cha mmiigaal ni chirbil lir Sodom ni Gomora aatim ngbaan pu.

²⁵ Mu nan bii ntim ngbaan, ni itingbaan mɔmɔk doo, le binib mɔmɔk, ni timoor, ni isui, ni tiwan nimɔk nan bi ntim ngbaan ni na kpo doo.

²⁶ Tɔ, baah nan san cha na, le Lot aapuu nan fenn lik upuwɔb, le ki kpaln n‑yaan aatakpal.

²⁷ Naah ki woln kichakpiik ni na, le Abraham buen nin chee u ni Uwumbɔr fe sil ki gbaa tibɔr na,

²⁸ le ki yaar lik Sodom ni Gomora aatim ngbaan, ni kifataŋ ngbaan mɔmɔk, le ki kan iŋmanyuu feei mu ni, ki naahn kimosakpeŋ aaŋmanyuu aah feei pu na.

²⁹ Tɔ, Uwumbɔr aah nan bii kifataŋ aatim mu Lot nan koo na, u nan teer Abraham bɔr, le ki gaa unaal aajapɔɔn Lot lii.

Moab yaab ni Amonn yaab aah piin pu na

³⁰ Lot nan san ijawaan ke u li koo Soar aatiŋ ni, le ki nan di ubisatiib bilee na di san buen ŋijoo ŋibaa paab, le ki nan ti koo kitakpaluŋ kibaa ni.

³¹ Le ubisal upol nan bui unaal ke, “Tite bi por cha la, bijab mu aa bi ki ga yoor timi aan ti maa mbim.

³² Cha ti nyunn tite ndaan u gbii aan ti doon u chee ki dek ki maa mbim tii u.”

³³ Kinyeek le bi nan di ŋisubil aadaan tii bite le u nyun gbii, le ubisal upol na doon u chee. Tɔ, waah nan nyun ndaan gbii ti nyaŋ na, waa nan nyi tiwan ni ubisal nan ŋa na.

³⁴ Naah woln kitaak na, le upol ngbaan bui unaal ke, “M fe doon tite chee kinyeek na; cha ti ki tii u ndaan aan u gbii, nima kan, aa mu ga ŋmaa doon u chee kinyeek kee, aan ti mɔmɔk dek ki maa mbim tii tite.”

³⁵ Nima pu na, bi nan ki nyunn bite ndaan kinyeek ngbaan le u gbii, le ubisal uwaatiir mu doon u chee. Waah nan ki nyun ndaan gbii ti nyaŋ na, waa nan nyi tiwan ni ubisawaatiir mu ki ŋa na.

³⁶ Lot aabisatiib mɔmɔk bilee ngbaan nan ŋa kina le ki dek ŋipuu.

³⁷ Upol nan ma ubijabo, le ki yin u ke Moab. Uma le ye Moab yaab aayaaja.

³⁸ Le uwaatiir mu nan ma ubijabo, le ki yin u ke Ben‑Ami. U mu le ye Amonn yaab aayaaja.