Mpiin 16 - Uwumbɔr aagbaŋ

Hagar ni ujapɔɔn Ismael aabɔr

¹ Abram aapuu, u bi nan yin u ke Sarai na, aa nan ma ubo tii u. Tɔ, Ijipt aapiibo ubaa nan bi Sarai chee, ki ye waanaagbiipiibo, bi nan yin u ke Hagar.

² Sarai nan bui uchal Abram ke, “Uwumbɔr aa tii mi ubo. Saan di maanaagbiipiibo ngbaan, ki di ŋa aapuu, ki kpee m pu uu? Nibaakan, u ga maa ubo tii mi.” Abram nan kii tii upuu Sarai aah len pu na.

³ Nima pu na, Sarai nan di Hagar tii uchal Abram, le u di u ŋa upuu. Nimina nan ŋa buyoonn Abram nan bi Kanaann aatiŋ ni ki ti saa ŋibin kipiik na la.

⁴ Abram nan doon Hagar chee, le u dek lipuul. Hagar aah kan ke u kpa lipuul na, le waa ki lik pak udindaan Sarai.

⁵ Sarai nan bui uchal Abram ke, “Ni ye saataani pu le Hagar aa ki lik pak mi. Min le nan di u tii si, le waah bee ke u kpa lipuul na, waa ki pak mi. Uwumbɔr le ga lik ki bee m ni si u aabɔr ŋan na.”

⁶ Le Abram nan bui ke, “Mbamɔn, u ye saanaagbiipiibo la. Sin le joo u. Aa ga ŋmaa ŋa u saah ban pu na.” Le Sarai nan piin ki ŋani Hagar mbiin, le u ti san u chee.

⁷ Uwumbɔr aatuun nan ti kan Hagar nnyunbun mubaa chee, mu nan bi kipɔɔk ni, ki dɔ Sur aasan chee,

⁸ le ki bui u ke, “Hagar, Sarai aanaagbiipii, aa nyan ni la, aan ki cha la?” U nan giin bui u ke, “M san ni ndindaan Sarai chee la.”

⁹ Le Uwumbɔr aatuun ngbaan nan bui u ke, “Gir buen Sarai chee, ki ti li ye waanaagbiipii.”

¹⁰ Le u ki bui Hagar ke, “M ga cha saamaal pɔr pam, ubaa aan ŋmaa kahn bi.

¹¹ Aa ga maa ubijabo, ki yin u ke Ismael; ba pu? Uwumbɔr ŋun saah wii limukl ponn ni pu na.

¹² Le saabo ngbaan ga li bi ke timoor ni aabon na; u ni biken aan li mɔ tɔb. U ni udo yaab aan ŋmaa kpaan koo tɔb chee.”

¹³ Hagar nan baa ubaa ke, “M sil kan Uwumbɔr, le ki beenin bi limɔfal ni, ki ga ŋmaa tuk binib maah kan u pu na aa?” Le u nan yin Uwumbɔr u nan len u chee tibɔr na ke, “Sin le ye Uwumbɔr u waa mi na.”

¹⁴ Nima pu le binib yin nnyunbun mu dɔ Kades ni Bered aakaasisik ni na ke, “U bi ki waa mi na aanyunbun.”

¹⁵ Hagar nan ma ubijabo tii Abram, le Abram yin u ke Ismael.

¹⁶ Abram nan ye ŋibin imonko inaa ni ŋiloob le n‑yaayoonn ngbaan.