Mpiin 13 - Uwumbɔr aagbaŋ

Abram ni Lot aah yakr tɔb chee pu na

¹ Abram, ni upuu, ni waawan mɔmɔk nan nyan Ijipt aatiŋ ni, ki cha ŋŋangan wɔb, le ki buen Kanaann ŋŋangii wɔb, le Lot mu nan dii u, le bi ti kal nibaa chee.

² Abram nan kpa liwangol pam: u nan kpa ipiih, ni iŋoob, ni inaa, ki kpee ŋimombil pam.

³ U nan ki fii nima chee, le ki chuun ki doo nsan ni, ki ti ki fuu Betel ni Ai aakaasisik ni, waah nan ti kal nin chee,

⁴ ki maa kitork aabimbiln na. Le u doon Uwumbɔr nima.

⁵ Lot mu nan kpa ipiih, ni iŋoob, ni inaa, ki kpee waamaal, ni waanaagbiib.

⁶ Nima pu na, timoor aa nan fuu baawakor ngbaan mɔmɔk aan bimɔk li kpaan bi lipepel libaa, ba pu? baawakor nan wiir ki ti nyaŋ.

⁷ Nima chee, le Abram aanib ni Lot aanib bi nan kpaa baawakor ngbaan na piin ki jaa. N‑yoonn ngbaan, Kanaann yaab ni Peris yaab nan beenin bi kitiŋ ngbaan ni.

⁸ Abram nan bui Lot ke, “Ti ye mmaal mbaa aanib la, naa ŋan ke timi aanib ngbaan li jaa.

⁹ Cha ti yakr tɔb chee. M tii si nsan, pue lee saah gee lipepel li wɔb na. Nima kan, aa ni saanib ga li bi nibaa wɔb, aan m mu ni maanib li bi niken wɔb.”

¹⁰ Lot nan lik mann gonn, le ki kan ke Jɔɔdann aafataŋ wɔb, ki ti saa Soar aapepel, kpa nnyun sakpen, ke Uwumbɔr aasaak, ni Ijipt aatiŋ na. Nimina mɔmɔk nan laa bi le Uwumbɔr nan nin bii Sodom ni Gomora aatim.

¹¹ Nima pu na, Lot nan lee Jɔɔdann aafataŋ wɔb, le u ni waanib mɔmɔk buen liwipuul aapepel wɔb. Binib bilee ngbaan aah nan yakr tɔb chee pu na le na.

¹² Abram nan bee Kanaann aatiŋ aapepel, le Lot mu nan kal kifataŋ ni, ntim aakaasisik ni, Sodom chee.

¹³ Ntim ngbaan aanib nan ye titunwanbirdam la, le ki tun ni kaa ŋan na Uwumbɔr aanimbiin ni.

Abram aah nan buen Hebronn aatiŋ ni pu na

¹⁴ Buyoonn Lot nan yakr Abram chee ki buen waah gee ni wɔb na, le Uwumbɔr nan bui Abram ke, “Lik ŋipepel mɔmɔk mbamɔm.

¹⁵ M ban ke m di saah waa kitiŋ kimɔk na ki di tii aa ni saamaal, aan ki li ye nimi aatiŋ n‑yoonn mu kaa kpa ndoon na.

¹⁶ M ga cha aa maa ki pɔr pam, le unii ubaa aan ŋmaa kahn saamaal aanib; bi ga li wiir jer dulnyaa wee aatanbol mɔmɔk aah wiir pu na.

¹⁷ Tɔ, chuun ki mann kitiŋ ngbaan mɔmɔk; ba pu? m ga di kitiŋ ngbaan mɔmɔk ki di tii si.”

¹⁸ Le Abram buen ti kal isui sakpiin i bi yin i ke Mamre aasui na chee, Hebronn aatiŋ ni, le ki maa kitork aabimbiln, le ki doon Uwumbɔr nima chee.