Mpiin 11 - Uwumbɔr aagbaŋ

Babiloŋ aadifɔfɔŋ na aabɔr

¹ Njan na, dulnyaa aanib mɔmɔk nan len iliinbaan la.

² Baah nan chuun liwipuul wɔb na, bi nan ti fuu kitiŋ ki kaa kpa ŋigongon na ni, Babiloŋ aatiŋ ni, le ki kal nima chee.

³ N‑yoonn ngbaan le bi kpokl, ki bui tɔb ke, “Cha ti gii ŋitanbil ki ŋa ŋi, ŋi li pɔɔ.” Nima pu na, bi nan ŋa ŋitanbil, le ki kan kootaal, aan bi di maa,

⁴ le ki bui ke, “Cha ti maa kitiŋ aan ki maa kidifɔfɔŋ ki ponn ni, ki ti pii paacham, nima kan, ti ga li bi tɔb chee ki taa yaa, ki li kpa liyimbil dulnyaa wee ni.”

⁵ Le Uwumbɔr nan dan u nan lik baah maa kitiŋ ki na, ni kidifɔfɔŋ ngbaan.

⁶ Le u bui ke, “Binib bee aah ye linibol libaa, ki len iliinbaan na, nima le yaa cha bi piin ki ŋani kina kan, naan yunn, le bi ga ŋmaa ŋa tiwan nimɔk bi gee na.

⁷ Cha ti buen ki ti yakr baaliin aan bi taa ki ŋun tɔb aaliin.”

⁸ Le Uwumbɔr nan cha bi len tɔb chee iliin kaa ki ŋun tɔb aaliin, le ki yaa buen dulnyaa wee mɔmɔk ni, kaa ki maa kitiŋ ngbaan doo.

⁹ Bi nan yin kitiŋ ngbaan ke Babiloŋ, ba pu? nima chee le Uwumbɔr nan yakr binib mɔmɔk aaliin, ki cha bi yaa tɔb chee ki ti saa ni kookoo dulnyaa wee ni.

Sem aamaal aabɔr

¹⁰ Sem aamaal sɔ: nnyun aah nan jin dulnyaa ki jer aan ni saa ŋibin ŋilee na, le Sem nan saa ŋibin nkub, le ki ma ujapɔɔn u bi nan yin u ke Apaksad na.

¹¹ Nee aapuwɔb u nan ki ma mbim muken, le ki nan beenin bi, ki ti saa ŋibin ikui iŋmu.

¹² N‑yoonn mu Apaksad nan ti saa ŋibin piitaa ni ŋiŋmu na, le u ma ujapɔɔn u bi nan yin u ke Sela na.

¹³ Nee aapuwɔb u nan ki ma mbim muken, le ki nan bi, ki ti saa ŋibin ikui inaa ni ŋitaa.

¹⁴ N‑yoonn mu Sela nan ti saa ŋibin piitaa na, le u ma ujapɔɔn u bi nan yin u ke Eber na.

¹⁵ Nee aapuwɔb u nan ki ma mbim muken, le ki nan beenin bi, ki ti saa ŋibin ikui inaa ni ŋitaa.

¹⁶ N‑yoonn mu Eber nan ti saa ŋibin piitaa ni ŋinaa na, le u ma ujapɔɔn u bi nan yin u ke Peleg na.

¹⁷ Nee aapuwɔb u nan ki ma mbim muken, le ki nan beenin bi, ki ti saa ŋibin ikui inaa ni piitaa.

¹⁸ N‑yoonn mu Peleg nan ti saa ŋibin piitaa na, le u ma ujapɔɔn u bi nan yin u ke Reu na.

¹⁹ Nee aapuwɔb, u nan ki ma mbim muken, le ki nan beenin bi ki ti saa ŋibin ikui ilee ni ŋiwae.

²⁰ N‑yoonn mu Reu nan ti saa ŋibin piitaa ni ŋilee na, le u ma ujapɔɔn u bi nan yin u ke Serug na.

²¹ Nee aapuwɔb, u nan ki ma mbim muken, le ki nan beenin bi ki ti saa ŋibin ikui ilee ni ŋilole.

²² N‑yoonn mu Serug nan ti saa ŋibin piitaa na, le u nan ma ujapɔɔn u bi nan yin u ke Nahor na.

²³ Nee aapuwɔb, u nan ki ma mbim, le ki nan beenin bi ki ti saa ŋibin ikui ilee.

²⁴ N‑yoonn mu Nahor nan ti saa ŋibin moninko ni ŋiwae na, le u nan ma ujapɔɔn u bi nan yin u ke Tera na.

²⁵ Nee aapuwɔb, u nan ki ma mbim muken, le ki nan beenin bi ki ti saa ŋibin nkub ni kipiik ni ŋiwae.

²⁶ Tera nan ti saa ŋibin imonko itaa ni kipiik, le ki ma ujapɔtiib, bi nan yin bi ke Abram, ni Nahor, ni Harann.

Tera aamaal aabɔr

²⁷ Tera aamaal sɔ: uma le nan ma Abram, ni Nahor, ni Harann. Harann le nan ma Lot.

²⁸ Le Harann nan kpo udo aatiŋ ni, bi yin ki ke Ur, ki bi Babiloŋ yaab aatiŋ ni la. Harann nan puen ute Tera kpo.

²⁹ Abram nan yoor Sarai, le Nahor mu yoor Harann aabisal Milka. Harann mu nan ye Iska aate.

³⁰ Sarai nan ye upiiŋoob la.

³¹ Le Tera nan yoor ujapɔɔn Abram, ni uyaabil Lot u aate nan ye Harann na, ki kpee ubipuu Sarai, u ye Abram aapuu na, le ki di bi nyan Ur aatiŋ ki nan bi Babiloŋ yaab aatiŋ ni na, le ki di bi nyan ki cha Kanaann yaab aatiŋ ni. Bi nan ti fuu Harann aatiŋ ni, le ki kal nima.

³² Tera nan saa ŋibin ikui ilee ni ŋiŋmu, le ki kpo Harann aatiŋ ngbaan ni.