Malakai 2 - Uwumbɔr aagbaŋ

¹ Uwumbɔr Mpɔɔnsakpiindaan bui bitotoorb ke, “Nkaal mumina ye nimi yoo la.

² Ni li nyuŋni mi nimi aatun mɔmɔk ni. Ni yaa kaa pel maah len pu na kan, m ga puun lii ni pu. M ga puun lii baah tii nimi tiwan ni na pu. Mbamɔn, naah kaa joo maakaal mbamɔm pu na, m puen puun lii ni pu a.

³ M ga daa nimi aabim aatafal, ki di naah kɔr tiwakor ti na aapor boon ninimbil wɔb, aan bi ga di nimi buen litapuln pu.

⁴ Le ni ga bee ke min le tii nimi nkaal ngbaan, le maah puu tipuur ti tii Liifai aayaabitiib na aan bii.

⁵ “M nan puu tipuur tii bi ke bi ga li kpa limɔfafɔfɔŋ ni laafee, ki nan sil tii bi tiwan ngbaan, ke bi li pak mi. N‑yaayoonn ngbaan na bi nan pak mi ki san mi.

⁶ Bi nan joo ibamɔn le mɔk maanib, kaa mɔk bi tiwan ni kaa ŋan na. Bi nan kpa lifuur, ki dii mi mbamɔm, le ki ter binib pam ke bi di cha titunwanbir aatuln.

⁷ Ni ye bitotoorb aatuln le ke bi mɔk binib Uwumbɔr aah sil ye pu na. Bima chee le binib ga buen ki ti bae maah ban pu na, ba pu? bima le ye min Uwumbɔr Mpɔɔnsakpiindaan aatutum.

⁸ “Le nimi bitotoorb yii isan i ŋan na. Naah mɔk binib pu na cha bi yenn ki tun titunwanbir la. Ni bii tipuur ti m nan puu tii nimi aayaaja Liifai na.

⁹ Ni yii, kaa kii maa ban pu na. Ni yaa ji maanib tibɔr kan, ni ganni la. Nima pu na, m mu ga cha Israel yaab lik seen nimi.”

Binib aah kaa kii tii Uwumbɔr pu na

¹⁰ Taa kpaan te la aa? Naa ye Uwumbɔr baan le naan ti mɔmɔk aa? Kina kan, ni ŋa kinye aan ti bii tipuur ti ti puu tii tɔb na, ki lik seen tipuur ti Uwumbɔr nan puu tii tiyaajatiib na?

¹¹ Juda aanib bii tipuur ti bi nan puu tii Uwumbɔr na, ki tun titunwanbir kpaan Jerusalem aatiŋ ni, ni kitiŋ ngbaan mɔmɔk pu. Bi bii Uwumbɔr Aadichal li u gee na. Bijab yoor bipiib bi dooni ŋiwaa na.

¹² Uwumbɔr, nyan Israel aanib ponn ni binib bi tun kina aatun na, ki taa ki cha bi kpaan timi aatimbol aah joo ipiin i nan tii sin, Uwumbɔr Mpɔɔnsakpiindaan na ni.

¹³ Naah ki ŋani tiwan ni mu kpee na sɔ: Ni pu, le bipiib wii ki di tinyunyunn gbiin Uwumbɔr aatork aabimbiln pu, kina pu na le Uwumbɔr aa ki gaal nimi aapiin i ni joo nan tii u na.

¹⁴ Ni baa le ke ba ŋa? Naah ye pu na le ye ke u nyi ke aa bii tipuur ti aa nan laa ye unachipɔɔn ki puu ti tii upii u aa nan yoor na. Aa ni upii ngbaan nan kpaan la, le aa bii tipuur ti aa nan puu tii u na, ki nyi ke aa nan puu tipuur ngbaan Uwumbɔr aanimbiin ni ke saan nya upuwɔb.

¹⁵ Uwumbɔr nan di aa ni aapuu aawon ni kifuurk kpaan ŋa kibaa la. Ba nan cha u ŋa kina? Ni nan ye le ke ni kan mbim mu ye Uwumbɔr aanib na. Kina pu na, li nyi man, ubaa taa bii u ni upuu aah puu tipuur ti tii tɔb na.

¹⁶ Uwumbɔr bui ke, “Uja yaa yii upuu kan, maa gee kina kpala. Ni ponn ni ubaa yaa ŋa upuu kina aabiin kan, maa kii kina kpala. Li nyi ki taa bii tipuur ti aa nan puu tii aapuu ke saan nya upuwɔb na.”

Libɔjil aawiin peen ni a

¹⁷ Ni cha Uwumbɔr ti kpaan bak naah len tibɔr pu na pu. Tɔ, le ni baa ke, “Ti ŋa kinye ki tii u tibakr?” Naah len tibɔr pu na, le ni tii u tibakr; ba pu? ni len ke “Uwumbɔr Mpɔɔnsakpiindaan dak ke titunwanbirdam mɔmɔk ŋan le na; ke mbamɔn, u gee bi la,” ki ki len ke, “Uwumbɔr u tii binib ibamɔn na bi la chee?”