Maika 6 - Uwumbɔr aagbaŋ

Uwumbɔr aah joo tibɔr ti Israel aanib pu na

¹ Li pel man Uwumbɔr aah joo tibɔr ti Israel aanib pu na. Uwumbɔr, fii sil ki cha bi ŋun saah joo tibɔr ti Israel aanib pu na; cha ŋijoo ni ŋigongon ŋun saah joo pu aa len na.

² Nimi ŋijoo, nimi n‑yoonn mu kaa kpa ndoon na aatinyik, li pel Uwumbɔr aabɔr man. Uwumbɔr ni waanib le kpa tibɔr. U ban ke u joo ni ngalm Israel aanib pu la.

³ Uwumbɔr bui ke, “Maanib, m ŋa nimi ba? Kinye pu aan m ye lituln ki tii nimi? Gar mi man.

⁴ M nyan ni nimi Ijipt aatiŋ ni; m nyan ni nimi tinaagbiir ni; m nan tun Moses, ni Aaronn, ni Miriam ke bi nan loln ni pu nsan.

⁵ Maanib, teer man Moab aabɔr Balak aah nan kpokl ke u ŋa nimi pu na, ki teer Beor aajapɔɔn Balaam aah nan gar u pu na. Teer man maah nan cha ni puur Jɔɔdann aamɔɔl na, buyoonn ni nan nyan ni Sitim aakakaa chee ki cha Gilgal aatiŋ ni na. Teer man tiwan nimina mɔmɔk ki bee maah nan ŋa pu ke m gaa nimi lii na.”

Uwumbɔr aah ban pu na

⁶ Buyoonn m dan ke m nan doon Uwumbɔr u ye paacham Aadindaan na kan, m ga joo ba nan tii u? M ga joo ni inaabi i ŋan sakpen na le nan see mmii ni tii u uu?

⁷ M yaa joo ni ipiih ŋichur ŋichur, bee olif aakpan mu kaan doo na kan, ni ga piir Uwumbɔr aasui ii? M ga di maajan aabijabo le toor kitork tii u maatunwanbir pu uu?

⁸ Aayii. Uwumbɔr bui timi tiwan ni ŋan na. Waah ban tiwan ni ti chee na sɔ: ke ti ŋa tiwan ni tok ki ŋan na, ki li kpa ngeehm n‑yoonn mɔmɔk, ki li bi suuna timi Aawumbɔr chee.

⁹ Ni ye nlan aawan le ke ti li san Uwumbɔr. U yin kitiŋ ngbaan ni aanib ke, “Li pel man, nimi bi kuun kitiŋ ngbaan ni na.

¹⁰ Titunwanbirdam aadichal ni gbii liwangol li bi di titunwanbir kan na la. Baah joo tiwan ni ŋaŋni baawan na aa ye nibamɔnn. Maa gee kina kpala.

¹¹ M ga ŋa kinye aan ki di cha pinn binib bi joo inyamɔn aawan ŋaŋni tiwan na?

¹² Nimi aawankpadam ji bigiim pem pem la, le ni mɔmɔk ye binyamɔndam.

¹³ Kina pu na, m puun gor ke m bii doo nimi, nimi aatunwanbir pu.

¹⁴ Ni ga ji, le ki mu aan bab; mbamɔn, nkon ga li joo nimi. Ni ga kuun liwangol di bil, le ki mu aan ŋmaa li joo li; naah ga li kpa tiwan nimɔk na, m ga bii kina aawan butɔb ponn ni.

¹⁵ Ni ga bu njikaabim, ki mu aan chee tijikaar. Ni ga nyan nkpan olif aasubil ni, ki mu aan ŋmaa di mu ŋa nibaa. Ni ga ŋaa ndaan, ki mu aan nyu mu.

¹⁶ Naah dii Ubɔr Omri aajapɔɔn Ubɔr Ahab aatunwanbir aasan na pu, le kina ga ŋa. Ni beenin joo baakaal la, kina pu le m ga bii doo nimi, le unii mɔk ga lik nimi fam. Binib bi bi dulnyaa wee ni na ga lik seen nimi.”