Maika 4 - Uwumbɔr aagbaŋ

Nsuudoon mu kaa kpa ndoon na

¹ N‑yoonn choo, le lijool li pu Uwumbɔr Aadichal si na ga li ye lijool li paa jer ŋijoo mɔmɔk na, li ga chaar ŋigongon mɔmɔk pu. Le ŋitimbol pam ga dan li chee;

² le ŋaanib ga bui ke, “Cha ti jon Uwumbɔr aajool ki buen Israel yaab Aawumbɔr Aadichal ni; ba pu? u ga mɔk timi waah ban ti ŋa pu na, le ti ga chuun waah lee isan i na pu. Uwumbɔr aamɔkm nyan ni Jerusalem aatiŋ ni la; Sionn pu le u len ni waanib chee tibɔr.”

³ U ga toor ŋitimbol pam aabɔr; ki toor ŋitimbokpaan ŋi bi duun u na, ni ŋi bi ni daa na aabɔr. Bi ga di baajaak aajum mɔɔ ŋikuu ki di baakpaatunn mɔɔ gɔrk tiib. Ŋitimbol aan ki to tɔb butɔb, kaan ki gor bibaa kiir butɔb daalbaadaal.

⁴ Unii mɔmɔk ga li bi nsuudoon ni ubaa aadaan aasubil, ni ŋisubil ŋiken aasui aasar ni, le ubaa aan faan u nima. Uwumbɔr Mpɔɔnsakpiindaan le puu kina.

⁵ Litimbol mɔk dooni ki keei laawaal aamɔb la, le ti mɔmɔk ga nan doon ki kii Tidindaan Uwumbɔr aamɔb ki ti saa n‑yoonn mu kaa kpa ndoon na.

Israel yaab ga nya tinaagbiir kitiyayaŋ ni ki gir ni

⁶ Uwumbɔr bui ke, “N‑yoonn choo, le m ga kuun ni binib bi m daa bitafal, aan bi jin falaa tinaagbiir ni kitiyayaŋ ni na nan kpaan.

⁷ Binib bi gur na wɔb le ki daa bido, le m ga tii bi mpɔɔn, le bi ga kpaln litimbol kpaan. M ga li bi Sionn Aajool paab le ki joo bi ki ti saa n‑yoonn mu kaa kpa ndoon na.”

⁸ Le sin, Jerusalem aatiŋ ni, nin chee Uwumbɔr lik waanib pu ke upihdaan na, ga ki gir kpaln nnaan mu aa nan yeh na aatiyil.

⁹ Ba ŋa aa wii mpɔɔn pu sakpen kina? Ba ŋa aa ji falaa ke upii u imalween joo u na? Saah kaa kpa ubɔr, aan saasusurb mu kpoi na pu le aa wii ii?

¹⁰ Jerusalem aatiŋ aanib, li mur fenni ki ker idun ke upii u imalween joo u na, ba pu? ni ga nya kitiŋ ponn ni ki ti li koo timoor ni. Ni ga buen Babiloŋ aatiŋ ni; le Uwumbɔr ga ti tee gaa nimi, nimi aadim chee lii nima.

¹¹ Ŋitimbol pam le kuun ni ke ŋi nan tak nimi. Bi bui ke, “Ti ga bii Jerusalem aatiŋ doo. Ti ga kan ke kitiŋ ngbaan bii doo.”

¹² Tɔ, ŋitimbol ngbaan mu aa tee nyi Uwumbɔr aalandak. Baa nyi ke bi kuun ni tɔb ke Uwumbɔr nan daa bitafal, ke baah kuuni ŋikalmaan bilni pu ke bi poi ŋi na la.

¹³ Uwumbɔr bui ke, “Jerusalem aanib, li cha ti daa nimi aadim aatafal man. M ga cha ni li pɔɔ ke unaaja u kpa tikur aayiin ni tikumann aataabuseen na. Ni ga ber ŋitimbol pam, le baah di mpɔɔn kan liwangol li na, ni ga joo ni li nan tii min, u ye dulnyaa mɔmɔk Aawumbɔr na.”