Maika 3 - Uwumbɔr aagbaŋ

Maika aah len tibɔbir lii Israel aayidam pu pu na

¹ Nimi bi ye Israel yaab aajojoob na, li pel man. Nimi aatuln le ba ye ke ni li dii ibamɔn,

² le ni nan tiwan ni ŋan na, ki tee gee titunwanbir. Maanib aa kee kpoi le ni sun baagban ki dar lui baanann baakpab pu.

³ Ni ŋmɔ maanib la. Ni lui nyani baagban, le ki kool baakpab, ki chɔi chɔi bi ke baah ban bi di tinann ti ŋaa na.

⁴ N‑yoonn choo le ni ga nan wii ban Uwumbɔr chee nterm, le waan gar nimi. Waan ŋun nimi aameel; ba pu? ni tun titunwanbir la.

⁵ Baabɔnabr bi gaal tipar na le ŋmann maanib ke nsuudoon bi bi chee, le ki faani binib bi kaa pa bi na ke butɔb choo. Uwumbɔr bui bibɔnabr ngbaan ke,

⁶ “Bibɔnabr, nimi aawiin bi door la; nwiin ga lir buyoonn naa kee gor na. Naah di maanib yenn pu na, le ni ga ŋa kina, naan ki kan tibɔkpiirkaan ti ni ga di nabr na, kaan ki ŋmaa bui ke tiwan nibaa ga ŋa, aan tiwan ngbaan sil ŋa kina.”

⁷ Binib bi nyi n‑yoonn mu choo na aabɔr ki nabr na ga ji inimɔɔn, baah kaan ki li nyi nibaa pu na pu. Uwumbɔr aah kaan gar bi pu na pu le bi ga kpaln binimɔɔnib.

⁸ Tɔ, mma kan, Uwumbɔr le joo Waafuur Nyaan ni waapɔɔn gbiini mi, le ki tii mi ibamɔn aalan, ni ntaakpapɔɔn mu m ga ŋmaa di bui Israel yaab baatunwanbir aah ye pu na.

⁹ Nimi Israel aanib aajojoob, li pel man, nimi bi kaa gee ibamɔn ki kpelni tiwan ni ŋan na ŋani taani na.

¹⁰ Ni bi maa Uwumbɔr aatiŋ Jerusalem nnikum ni mbiin pu la.

¹¹ Igaŋgaŋlik pu le kitiŋ ngbaan aajojoob joo ki, le bitotoorb tuk binib Uwumbɔr Aakaal ki gaal tipar, le bibɔnabr mu kpiir Uwumbɔr aah len pu na ŋimombil pu, le bi mɔmɔk len ke Uwumbɔr bi ti chee. Bi len le ke, “Tibɔbir tibaa aan dan ti chee. Uwumbɔr bi ti chee.”

¹² Kina pu na, nimi pu le bidim ga kpar Sionn ke lisikpel na, le Jerusalem kpaln tibir aatapuln, le Uwumbɔr Aadichal aagongoln kpaln kichook.