Liifai Yaab 9 - Uwumbɔr aagbaŋ

Aaronn aah nan piin kitork aatuln pu na

¹ Baah kaan bitotoorb doo ki woln kitaak na, le Moses yin ni Aaronn, ni ujapɔtiib, ni Israel yaab aayidam.

² U nan bui Aaronn ke, “Ban ni unaaja ni upihja i ŋan na, ki nan toor kitork tii Uwumbɔr. Aa di unaaja toor titunwanbir aatork, aan ki di upihja toor kitork ki bi joo seer mmii ni na,

³ ki tuk Israel yaab ke bi li joo ni uŋoja ki nan toor titunwanbir aatork, ki di libiln libaa aanaabo ni libiln libaa aapihbo u kaa kpa iween ibaa na, ki toor kitork ki bi joo seer mmii ni na tii Uwumbɔr,

⁴ ki ban unaaja ni upihja ki di toor kimɔbaan aatork aapiin. Bi di olif aakpan ŋmal njikaabim aatork aapiin ni, ki di kpee tiwakor ngbaan mɔmɔk pu, ki di toor tii Uwumbɔr. Bi pɔɔn bibaa ki ŋa kina, ba pu? Uwumbɔr ga di ubaa mɔk bi din.”

⁵ Le bi nan joo ni tiwan nimɔk Moses nan tuk bi ke bi li joo ni na, le binib mɔmɔk nan kuun dan Libool ngbaan aabisamɔb chee, bi nan doon Uwumbɔr.

⁶ Le Moses bui bi ke, “Uwumbɔr le tuk nimi ke ni ŋa tiwan nee mɔmɔk, aan nima kan, waawiihn mu moor lak lak na ga nyan ni ni chee.”

⁷ Moses nan bui Aaronn ke, “Li cha kitork aabimbiln chee, ki ti toor titunwanbir aatork, ni kitork ki bi joo seer mmii ni na, aan ki nyan aa ni binib ngbaan aatunwanbir. Toor kitork ngbaan tii Uwumbɔr ki nyan binib ngbaan aatunwanbir, ke Uwumbɔr aah mɔk pu na.”

⁸ Le Aaronn buen kitork aabimbiln chee ki ti kɔr unaaja, u ye uma ubaa aatunwanbir aatork aapiin aawakork na.

⁹ Le ujapɔtiib joo ni kaasin u chee, le u di uŋanbik bɔn mu ni, ki di ngem ŋa libimbiln ngbaan aalɔlɔ aamɔju pu, le ki di mu gur na kpir libimbiln aataab,

¹⁰ le ki see kiwakork ngbaan aakpan, ni ŋipɔɔkpeebil, ni lipɔɔl nin chee ŋan na, mmii ni, libimbiln paab, ke Uwumbɔr aah tuk Moses pu na.

¹¹ U nan nyan lipaal le ki ti see tinann, ni ngban, mmii ni.

¹² U nan ki kɔr kiwakork ki ye uma ubaa aatork ki bi joo seer mmii ni na aapiin aawakork. Le ujapɔtiib joo ni kaasin u chee, le u di mu mee kpir libimbiln aapepel mɔmɔk ŋinaa pu.

¹³ Bi nan ki di kiwakork ngbaan aayil, ni tinann tiken, ki di tii u, le u see ti mmii ni, libimbiln paab.

¹⁴ U nan ki finn ponn ni aawan, ni ŋitaajal, le ki di paan kitork ki bi joo seer mmii ni na pu, libimbiln paab, ki see mmii.

¹⁵ Nee aapuwɔb na, u nan di binib ngbaan aatork mu tii Uwumbɔr ipiin. U nan di uŋoob u u ga di toor binib ngbaan aatunwanbir pu na, ki kɔr toor ke waah toor waatunwanbir aatork pu na.

¹⁶ U nan ki joo ni kiwakork ki bi joo seer mmii ni na, le ki di ki mu toor, nkaal aah mɔk pu na.

¹⁷ U nan toor njikaabim aatork mu, le ki lee n‑yon paan kitork aabimbiln paab, ki see mu mmii. U nan ŋa nimina mɔmɔk ki di kpee nwiin mɔk aatork ki bi joo seer mmii ni na pu.

¹⁸ U nan kɔr unaaja ni upihja, le ni ye kimɔbaan aatork aapiin, binib ngbaan pu. Le ujapɔtiib joo ni tiwakor ngbaan aasin, le u di mu kpir libimbiln aapepel mɔmɔk ŋinaa pu.

¹⁹ Aaronn nan di unaaja ni upihja aakpan aawan mɔmɔk

²⁰ ki di paan ŋibingbaa aanann pu, ki di buen kitork aabimbiln chee. U nan see nkpan ngbaan mmii ni, libimbiln paab,

²¹ le ki di ŋibingbaa ni ŋŋangii aataajal tii Uwumbɔr ipiinkpaan, le ki nin giin ni tii bitotoorb, ke Moses aah nan tuk u pu na.

²² N‑yoonn mu Aaronn toor kitork mɔmɔk doo na, le u yoor uŋaal paacham ki toŋ binib ngbaan wɔb, ki mee Uwumbɔr, u ŋa tinyoor ŋa bi pu, le ki nin sunn ni.

²³ Moses ni Aaronn nan buen Uwumbɔr Aabool ni; baah nyan ni na, le bi mee Uwumbɔr aanyoor ŋa bi pu, le Uwumbɔr aawiihn mu moor ki deer ŋinimbil na sunn ni bi mɔmɔk pu.

²⁴ Libuul ngbaan ni, le Uwumbɔr cha mmii nyan ni paacham ki nan wun kitork ki bi ban bi di see mmii ni na aapiin, ni nkpan, libimbiln paab. N‑yoonn mu binib ngbaan kan kina na, le bi teen mpɔɔn pu, ki tar lir kitiŋ lichichikr.