Liifai Yaab 8 - Uwumbɔr aagbaŋ

Baah ga di kitork aatuln tii Aaronn ni ujapɔtiib pu na aabɔr

¹ Uwumbɔr nan bui Moses ke,

² “Di Aaronn ni ujapɔtiib buen Libool aabisamɔb chee nnimbiin ni, aan ki li joo ni bitotoorb aawanpeenkaan, ni nkpanmeenkaan, ni titunwanbir aatork aanaaja, ni ipihja ilee, ni boroboro u kaa kpa boroboro aanyɔk na kibɔɔkuuk kibaa,

³ ki yin ni litimbol ngbaan mɔmɔk, bi kuun dan nima chee.”

⁴ Moses nan ŋa Uwumbɔr aah tuk u pu na, le litimbol ngbaan mɔmɔk aah kuun ni ti doo na,

⁵ u bui bi ke, “Maah ban m ŋa tiwan ni na, Uwumbɔr le tuk mi ke m ŋa kina.”

⁶ Moses nan nyan Aaronn ni ujapɔtiib siin, le ki fu bi nnyun.

⁷ U nan di utotoor aabɔkul, ni kikpalk peen Aaronn, ki di kikekengeŋ buu uchaŋ ni, le ki di libɔkul li kaa kpa iŋaal na mu peen u, ki di laagbapapaln mu buu uchaŋ ni.

⁸ U nan di kibiŋ aakekengeŋ gbab u, le ki di tiwan ni bi yin ni ke Urim ni Tumim di ŋa ki ponn ni.

⁹ U nan di likekeln jib uyil, le ki di Uwumbɔr aasalmaa aawanyaan ni mɔk ke uma Uwumbɔr le lee u na buu tam likekeln ngbaan aayigbeer pu, Uwumbɔr aah nan tuk u pu na.

¹⁰ Moses nan yoor nkpanmeenkaan, le ki kpir Uwumbɔr Aabool pu, ni tiwan nimɔk bi li ponn ni na. Kina le u nan ŋa, ki di tiwan ngbaan mɔmɔk tii Uwumbɔr.

¹¹ U nan yoor nkpan ngbaan ngem le ki bar yɔk yɔk kitork aabimbiln, ni laawan mɔmɔk pu, ni lisambil, ni laapɔtaln pu, nfum mulole; u nan ŋa kina ki di ni tii Uwumbɔr la.

¹² U nan ki di nkpan ngbaan ngem kpir Aaronn aayil pu, ki ŋa u Uwumbɔr aatutunn.

¹³ Ni paa na, Moses nan nyan Aaronn aajapɔtiib siin, le ki di ŋibɔkul peen bi, ki di ŋitan buu bichaŋ ni, ki di tiyikpupur chiŋ biyil, Uwumbɔr aah nan tuk u pu na.

¹⁴ Moses nan joo ni unaaja u u ga di toor titunwanbir aapiin aatork na, le ki cha Aaronn ni ujapɔtiib di biŋaal paan uyil pu.

¹⁵ Moses nan kɔr u, le ki teŋ waasin, ki di uŋanbik ŋa nsin ngbaan ni, ki di ŋa kitork aabimbiln na aalɔlɔ aamɔju pu, le ki di li tii Uwumbɔr. U nan di nsin mu gur na kpir libimbiln ngbaan aataab. U nan ŋa kina ki toor li chain, le ki di li tii Uwumbɔr.

¹⁶ Moses nan chuu nyan nkpan mumɔk bii ponn ni aawan pu na, ni lipɔɔl nin chee ŋan na, ni ŋipɔɔkpeebil, ni nkpan mu bii ŋi pu na, ki di mu mɔmɔk see mmii ni, kitork aabimbiln paab, ki tii Uwumbɔr.

¹⁷ U nan di unaaja ngbaan aanann, ki kpee ngban, ni ponn ni aawan, ki di nyan lipaal ki ti see ni mmii, Uwumbɔr aah tuk u pu na.

¹⁸ Ni paa na, Moses nan joo ni upihja u u ga di toor kitork ki bi joo seer mmii ni na, le ki cha Aaronn ni ujapɔtiib di biŋaal paan uyil pu.

¹⁹ Le Moses kɔr u, ki di waasin mee kpir kitork aabimbiln ngbaan aapepel ŋinaa pu,

^20-21 ki geei waanann ŋichek ŋichek, ki finn uponn ni aawan, ni ŋitaajal, nnyun ni, ki see liyil, ni nkpan, ni upihja ngbaan aanann mɔmɔk libimbiln paab mmii ni, ke Uwumbɔr aah nan tuk u pu na. Kitork ngbaan nan ye tijikaar aapiin aatork la, le ki nu mɔ Uwumbɔr chee.

²² Moses nan ki joo ni upihja uken na, uma le u nan di toor kitork ki kaan bitotoorb; le ki cha Aaronn ni ujapɔtiib di biŋaal paan uyil pu.

²³ Moses nan kɔr u, le ki ban waasin ngbaan ngem ki di ŋa Aaronn aaŋangii aatafalan pu, ni uŋangii aaŋanbijak pu, ni uŋangii aataŋanbijak pu,

²⁴ le ki nyan Aaronn aajapɔtiib siin, ki ban nsin ngbaan ngem di ŋa biŋangii aatafalan pu, ni biŋangii aaŋanbijam pu, ni biŋangii aataŋanbijam pu, le ki nan di nsin mu gur na kpir kitork aabimbiln ngbaan aapepel ŋinaa pu.

²⁵ U nan yoor nkpan, ni lijuul aakpan, ni nkpan mumɔk bii ponn ni aawan pu na, ni lipɔɔl nin chee ŋan na, ni ŋipɔɔkpeebil ni ŋaakpan, ni ŋŋangii aataajal.

²⁶ U nan ki nyan boroboro kpiln li kaa kpa nnyɔk aan bi di tii Uwumbɔr na kibɔɔkuuk ni, ni boroboro kpiln li bi di olif aakpan ŋa li na libaa, ni maab ubaa, ki di ni paan upihja na aakpan ni litaajal pu,

²⁷ ki di tijikaar ngbaan mɔmɔk ŋa Aaronn ni ujapɔtiib aaŋaal ni, le bi di ti ŋa kitorkpaan tii Uwumbɔr.

²⁸ Moses nan ki gaa ti bi chee, ki di paan kitork ki bi joo seer mmii ni na pu, libimbiln paab, ki see ti mmii, le ni ye baah kaani Uwumbɔr aatotoorb pu na aatork. Kitork ngbaan nan ye tijikaar aatork aapiin la, le ki nu mɔ Uwumbɔr chee.

²⁹ Moses nan ki yoor libingbaal, li ye ipiinkpaan na tii Uwumbɔr. Libingbaal aanann ngbaan le nan ye Moses yaan, kitork ngbaan ni. Moses nan ŋa Uwumbɔr aah tuk u pu na mɔmɔk.

³⁰ Moses nan ban Uwumbɔr aakpan, ni nsin mu bi libimbiln pu na ngem, ki di yɔk Aaronn, ni ujapɔtiib, ni baawanpeenkaan pu. U nan ŋa kina ki di bi ni baawanpeenkaan tii Uwumbɔr, bi li ye uyaab la.

³¹ Moses nan bui Aaronn ni ujapɔtiib ke, “Yoor tinann ngbaan ki di buen Libool ngbaan aabisamɔb chee, Uwumbɔr aanimbiin ni, ki ŋaan ti nima, ki kpaan ŋmɔ tinann ngbaan ni boroboro u gur kibɔɔkuuk ni na, ke Uwumbɔr aah tuk timi pu na.

³² Tinann ni tijikaar ti gur na, ni see ti mmii ni.

³³ Ni li bi Libool ngbaan ni, laachiln ni, ki ti saa iwiin ilole, aan ki toor kitork ngbaan aatuln doo.

³⁴ Taah toor kitork ki din na, Uwumbɔr le bui ke ti ŋa kina aan ki nyan nimi titunwanbir ni.

³⁵ Ni li bi Libool ngbaan ni, laachiln ni, nwiin pu ni kinyeek, ki ti saa iwiin ilole, aan ki li ŋani Uwumbɔr aah mɔk pu na. Ni yaa yii kan, ni ga kpo. Uwumbɔr aah tuk mi pu na le na.”

³⁶ Aaronn ni ujapɔtiib nan ŋa tiwan mɔmɔk, Uwumbɔr aah bui Moses ke u tuk bi pu na.