Liifai Yaab 7 - Uwumbɔr aagbaŋ

Baah ga toor lipɔln aatork pu na

¹ Naah ga dii pu ki toor lipɔln aatork na aabɔr sɔ: Kitork ngbaan ye chain aatork la.

² Ni yaa ban ni kɔr kiwakork ki toor kitork ngbaan kan, ni kɔr ki, kitork aabimbiln aaŋangan wɔb, nin chee bi kɔr kitork ki bi joo seer mmii ni na. Ni di kaasin yɔk yɔk libimbiln ngbaan aapepel mɔmɔk ŋinaa pu.

³ Ni chuu nyan nkpan mumɔk bi ki ponn ni na ki di see mmii ni, libimbiln paab: Lijuul aah naa nin chee na aakpan, ni nkpan mu paa ponn ni aawan pu na,

⁴ ni ŋipɔɔkpeebil ni nkpan mu bii ŋi pu na, ni lipɔɔl nin chee ŋan na.

⁵ Utotoor di nkpan ngbaan mɔmɔk see mmii ni, libimbiln paab, aan ni li ye tijikaar aatork ki tii Uwumbɔr. Ni ye naah ga gir toor lipɔln pu na aatork la.

⁶ Utotoor aamaal ni aajab mɔmɔk ga ŋmaa ji ti, ni ŋan ke bi ji ti chain aapepel ni la; ba pu? ti ye chain pam.

⁷ Titunwanbir aatork, ni lipɔln aapam aatork kpaa nkaal mubaa la: Utotoor u toor kitork ngbaan na le yeh kitork ngbaan aawakor ti bi di toor na aanann.

⁸ Utotoor u toor kina aatork na le yeh kiwakork ngbaan aagban.

⁹ Njikaabim aapiin i bi di ŋa boroboro na, bee bi di ken ki ŋa maab na, utotoor u di ipiin aatork ngbaan di tii Uwumbɔr na le yeh ni mɔmɔk.

¹⁰ N‑yon mu gur baa di ŋa nibaa na, bi yaa di nkpan ŋmal, bee bi yaa kaa ŋmal kan, Aaronn aamaal bi ye bitotoorb na le yeh mu. Bi yakr mu, mu li ŋak ki tii tɔb.

Kimɔbaan aatork aabɔr

¹¹ Naah ga dii pu ki toor kimɔbaan aatork tii Uwumbɔr na aakaal aabɔr sɔ.

¹² Unii yaa ban u toor kitork kina aan ni li ye idoon aapiin ki tii Uwumbɔr kan, u ban tijikaar aapiin imina ki di kpee kitork aawakork pu: Boroboro u baa di boroboro aanyɔk ŋa u ni na, ki di olif aakpan ŋmal waayon ni, bee ni pu maab ki di olif aakpan gbaa u, bee ni di olif aakpan ŋmal n‑yon ni, ki ken maab.

¹³ U ki ban boroboro u bi di boroboro aanyɔk ŋmal waayon ponn ni na ki di kpee.

¹⁴ U nyan boroboro ngbaan mɔmɔk ubaabaa, ni li ye tootookpaan ki di tii Uwumbɔr. Utotoor u di kitork ngbaan aasin yɔk yɔk kitork aabimbiln pu na le yeh tijikaar aapiin ngbaan.

¹⁵ Bundaal bi di kiwakork ngbaan toor kitork na, bi ŋmɔ tinann ngbaan kookoo, ki taa cha ti gur ki woln kitaak.

¹⁶ Unii yaa nan puu tipuur le ki giin ti, bee u yaa tii ipiin ubaa aageehn pu, le tinann yaa gur ki woln kitaak kan, ni li ŋmɔ man.

¹⁷ Tinann ngbaan yaa ki gur ki ki woln wintaa daal kan, ni see ti mmii.

¹⁸ Ni yaa ŋman ti wintaa daal ngbaan kan, Uwumbɔr aan ki gaa udaan ngbaan aatork. Le kitork ngbaan aan ki ŋmaa nyan udaan ngbaan waatunwanbir ni, ti bii le na, le umɔk ŋman kitork ngbaan aanann na ga kan ntafadaan.

¹⁹ Tinann ngbaan yaa meeh tiwan ni kpa tijɔŋ na kan, ubaa taa ki ji ti, bi di ti see mmii ni. Unii umɔk bi chain na ŋeer ke u ŋmɔ tinann ti ye chain na.

²⁰ Tɔ, unii u kaa bi chain na yaa ŋman tinann ngbaan kan, waan ki li ye Uwumbɔr aanib ponn ni ubaa.

²¹ Ni ki kpee na, unii umɔk meeh unibɔn aajɔŋ, bee kiwakork ki kaa bi chain na, nee aapuwɔb u yaa ŋman kitork ngbaan aanann kan, waan ki li ye Uwumbɔr aanib ponn ni ubaa.

²² Uwumbɔr nan ki di ŋikoobil ŋimina tii Moses

²³ ke u di tuk Israel yaab: Ni taa ŋmɔ unaa, bee upiih, bee uŋoob aakpan.

²⁴ Kiwakork yaa kpo kibaa pu, bee timoor ni aapeel le yaa chuu ki kan, ni taa ŋmɔ kaakpan. Tɔ, ni yaa ban kan, ni ga ŋmaa di mu ŋa tiwan nibaa.

²⁵ Bi yaa kɔr kiwakork ki bi ga ŋmaa di ki toor kitork na kan, ubaa taa ŋmɔ kaakpan, u yaa ŋman kan, waan ki li ye Uwumbɔr aanib ponn ni ubaa.

²⁶ Israel aanii yaa koo nin chee na kan, u taa ŋmɔ unyoon, bee kiwakork aasin.

²⁷ Unii umɔk bii nkaal ngbaan na kan, waan ki li ye Uwumbɔr aanib ponn ni ubaa.

²⁸ Uwumbɔr nan ki di ikaal imina tii Moses

²⁹ ke u di tuk Israel yaab: Unii umɔk ban u tii Uwumbɔr kimɔbaan aapiin na, ni ŋan ke u li joo ni kiwakork ngbaan aanann tibaa nin chee ŋan na, ti li ye ipiinkpaan ki tii Uwumbɔr.

³⁰ U li joo ni tiwan ngbaan uŋaal ponn ni, ni li ye tijikaar aapiin. U li joo ni kiwakork ngbaan aakpan ni libingbaal, ki nan di tii Uwumbɔr ipiinkpaan.

³¹ Utotoor di nkpan ngbaan see mmii ni, libimbiln paab, aan bitotoorb li joo libingbaal libaa.

³² Kiwakork ngbaan aaŋangii aataajal ye tootookpaan la.

³³ Le utotoor u di nsin ni nkpan di tii Uwumbɔr aan ni ye kimɔbaan aapiin na le yeh litaajal ngbaan.

³⁴ Kiwakork ngbaan aabingbaal ni ŋŋangii aataajal ye ipiinkpaan la, le Uwumbɔr gaal i Israel yaab chee ki joo tii bitotoorb. Israel yaab li joo tinann tee tii bitotoorb n‑yoonn mɔmɔk.

³⁵ Tinann ti Uwumbɔr nan nyan ki siin ke bi li joo tii Aaronn ni ujapɔtiib, bundaal bi nan kaan bi bitotoorb na le bi na.

³⁶ Liyaadaal ngbaan le Uwumbɔr nan siin ke Israel yaab li joo ipiin ngbaan aanann timina ki joo tii bitotoorb. Ni ye nkaal mu ŋan ke Israel yaab li joo mu n‑yoonn mɔmɔk na la.

³⁷ Kitork ki bi joo seer mmii ni na aapiin, ni njikaabim aatork, ni titunwanbir aatork, ni lipɔln aatork, ni bitotoorb aakaan aatork, ni kimɔbaan aatork aakaal le na.

³⁸ Nteersakpiin ni, Sainai aajool pu, nwiin mundaal Uwumbɔr nan bui Israel yaab ke bi toor kitork tii u na, le u nan di ikaal ngbaan tii Moses ke u di tuk bi.