Liifai Yaab 6 - Uwumbɔr aagbaŋ

¹ Uwumbɔr nan ki len tibɔr timina Moses chee.

² Ubaa yaa yii, kaa giin uŋeen aatɔ aah di tiwan ni tii u, u di bil na, bee u yaa sun waawan nibaa, bee u jin u pem pem,

³ bee tiwan nibaa yaa wɔŋ aan u pii ni ki nee ke waa kan ni kan, u tun Uwumbɔr titunwanbir le na.

^4-5 Unii yaa ti tun titunwanbir kina aaboln kan, waah kaa dii mbamɔn ki kan tiwan ngbaan na, u pa ni pu. Bundaal bi bee ke uma le ŋa kina na, u pa uwandaan waawan mɔmɔk, ki ki pa paan ni pu.

⁶ U li joo ni upihja, bee uŋoja u ŋan na ki nan di tii utotoor, u di tii Uwumbɔr, ni li ye lipɔln aatork. Kiwakork ngbaan aadaak li dii nkaal aah siin pu na.

⁷ Le utotoor ga di kiwakork ngbaan toor udaan ngbaan aatunwanbir pu, le Uwumbɔr ga di cha pinn u waatunwanbir.

Kitork ki bi ga see ki mmii ni kookoo na aabɔr

⁸ Uwumbɔr nan bui Moses

⁹ ke u di kitork ki bi joo seer mmii ni na aapiin aakaal aabɔr timina tuk Aaronn ni waabijabim. Ni yaa ban ni see kitork mmii ni kan, ni cha ki li paa libimbiln paab aan mmii li gaal kina kitaak ti woln.

¹⁰ Le utotoor ga peen utotoor aatanyaan aawan, ki chuu nyan nkpan aafatan mu paa kitork aabimbiln paab na, ki di bil li chee.

¹¹ Le u ga kpeln waawanpeenkaan, ki faa nfatan ngbaan ki di nya lipaal, nin chee bi joo nfatan kpir aan ni ye chain na.

¹² Mmii mu bi kitork aabimbiln paab na, ni cha mu li gaal kina cha, ni taa cha mu junn. Kichakpiik mɔmɔk ni kan, utotoor ti ban idɔ kpee mmii ngbaan ni, aan ki di kitork ki bi joo seer mmii ni na paan libimbiln ngbaan pu, ki di kimɔbaan aapiin aawakork aakpan na see mmii ni.

¹³ Ni cha mmii ngbaan li gaal kina, ki taa cha mu junn.

Njikaabim aapiin aabɔr

¹⁴ Naah ga li dii pu ki tii njikaabim aapiin na aakaal le na: Aaronn aajapɔtiib le ga li joo njikaabim aapiin aatork tii Uwumbɔr ipiin, kitork aabimbiln taab.

¹⁵ U di uŋaal lee n‑yon, ni nkpan, ni tulalee aayon mu paa mu pu na, ki di see libimbiln paab, mmii ni, ni li ye limɔkl ke u see n‑yon ngbaan mɔmɔk le mmii ni ki tii Uwumbɔr. Ipiin kina aaboln nu mɔ uma Uwumbɔr chee.

^16-17 Bitotoorb le ga ji n‑yon mu gur na. Bi di mu ŋa boroboro, ki taa ŋa boroboro aanyɔk u ponn ni, aan bi ŋmɔ u, chain aapepel ni, Uwumbɔr aanimbiin ni, Libool ngbaan aachiln ni. Uwumbɔr le di ni tii bitotoorb ke ni li ye biyaan, tijikaar aapiin ni. Titunwanbir ni lipɔln aatork aah ye chain pu na, kitork ngbaan mu bi kina la.

¹⁸ N‑yoonn mɔmɔk Aaronn aamaal bi ye bijab na ga ŋmaa ji tijikaar ngbaan, ba pu? Uwumbɔr le yakr waajikaar tii bi. Unii ubaa yaa kaa bi chain kan, u taa mee ti.

¹⁹ Uwumbɔr nan ki bui Moses ikaal imina aabɔr:

²⁰ Bundaal ni ban ni kaan Aaronn aajapɔɔn u li ye utotoor na kan, liyaadaal ngbaan, u ban n‑yon kuruwaa ubaa ki nan tii Uwumbɔr ipiin, ke iwiin mɔmɔk aajikaabim aatork aah wiir pu na; u di ligeln tii kichakpiik ni, ki nan di ligeln mu tii kijook wɔb.

²¹ Ni ban nkpan ŋmal mu ni, ki di ŋa maab aan ki bur bur u ki di tii Uwumbɔr, ni li ye njikaabim aapiin, le i nu mɔ uma Uwumbɔr chee.

²² N‑yoonn mumɔk choo na, Aaronn aamaal ni aanii u ti ban u tun Utotoorninkpel aatuln na kan, see u tii Uwumbɔr kina aapiin. Ni di ni mɔmɔk see mmii ni tii Uwumbɔr.

²³ Utotoor aah tii ipiin i aan i ye njikaabim aapiin na, ubaa taa ji i, ni see i mɔmɔk mmii ni.

Titunwanbir aatork aabɔr

²⁴ Uwumbɔr nan ki bui Moses

²⁵ ke u di ikaal imina aabɔr tuk Aaronn ni ujapɔtiib, ki joo cha titunwanbir aatork wɔb. Bi yaa ban bi toor titunwanbir aapiin aatork kan, bi di kiwakork ngbaan paan kitork aabimbiln paab ŋŋangan wɔb, ki kɔr ki nin chee bi kɔr kitork ki bi joo seer mmii ni na aawakor na. Kitork ngbaan ye chain chain aapiin la.

²⁶ Utotoor u ŋa kitork ngbaan na le ga ŋmɔ kiwakork ngbaan aanann, chain aapepel ni, Uwumbɔr aanimbiin ni, Libool ngbaan aachiln ni.

²⁷ Unii ubaa, bee tiwan nibaa yaa kaa bi chain kan, u taa meeh kiwakork ngbaan aanann. Kiwakork ngbaan aasin yaa meeh likekeln libaa kan, see ni finn li, chain aapepel ni.

²⁸ Ni yaa di tiyakr aakumbuul le ŋaan tinann ngbaan kan, ni gbaa wii li; bee ni yaa di tikur aakumbuul le ŋaan ti kan, ni ŋir ki kɔr li ponn ni mbamɔm aan ki ban nnyun chann li.

²⁹ Bitotoorb aamaal ni aajab mɔmɔk ga ŋmaa ŋmɔ ipiin ngbaan aanann; ti ye chain chain aanann la.

³⁰ Tɔ, ni yaa di kiwakork ngbaan aasin buen Libool na ni, ki ti di mu tii ke mu nyan titunwanbir kan, ni taa ŋmɔ kiwakork ngbaan; ni see ki mmii ni.