Liifai Yaab 5 - Uwumbɔr aagbaŋ

Tibɔr ti ban titunwanbir aatork na

¹ Tibɔr timina le ban titunwanbir aatork: Bi yaa yin ni ponn ni ubaa libɔjil ni, ke u nan len mbamɔn waah nyi ki kan pu na, aan u yii kaa len mbamɔn kan, u ŋeer ke u ji falaa kina pu.

² Ubaa yaa kaa nyi le ki meeh tiwan ni kaa bi chain na, nibaakan kiwakork ki kpo na, u yaa bee ke waah ŋa pu na aa ŋan kan, u ŋa tijɔŋ aanii, le waabɔr bii.

³ Ubaa yaa kaa nyi le ki meeh unibɔn aajɔŋ kan, u yaa nan bee ke waah ŋa pu na aa ŋan kan, waabɔr bii a.

⁴ Ubaa yaa puu tipuur fam, tipuur ngbaan yaa ye pu na kan, u yaa nan bee ke waah puu pu na aa ŋan kan, waabɔr bii a.

⁵ N‑yoonn mu unii bee ke waabɔr bii na kan, ni ŋan ke u kpiir waatunwanbir ngbaan pu.

⁶ Le u ga li joo ni upihsal, bee uŋosal ki nan toor kitork tii Uwumbɔr, waatunwanbir ngbaan pu. Utotoor le ga toor kitork ngbaan, udaan aatunwanbir pu.

⁷ U yaa kaa kpa upihsal, bee uŋosal kan, u li joo ni ŋinanjel ŋilee, bee ŋibɔrnanjel ŋilee, ki nan toor kitork tii Uwumbɔr; u di libaa toor titunwanbir aatork, ki di liken na toor kitork ki bi joo seer mmii ni na aatork.

⁸ U li joo ni ŋi utotoor chee, u pue toor titunwanbir aapiin aatork. U mur lisil ki ku li, ki taa daa tukr liyil.

⁹ U di laasin yɔk yɔk kitork aabimbiln aagbaan. Nsin mu gur na, u cha mu tuu nya ki lir libimbiln aataab. Kitork ngbaan aaboln le nyani titunwanbir.

¹⁰ U di linanjel li gur na toor kitork ki bi joo seer mmii ni na, nkaal aah ye pu na. Kina le utotoor ga toor kitork tii titunwanbirdaan ngbaan, le Uwumbɔr ga di cha pinn u waatunwanbir.

¹¹ U yaa kaa kpa ŋinanjel ŋilee, bee ŋibɔrnanjel ŋilee kan, u ban ni n‑yon kuruwaa ubaa ki nan tii Uwumbɔr waatunwanbir aapiin. U taa di olif aakpan, bee tulalee aayon paan n‑yon ngbaan pu; ba pu? ni ye titunwanbir aapiin la, naa ye tijikaar aapiin.

¹² U li joo ni n‑yon ngbaan nan tii utotoor, aan u di uŋaal lee mu gbiin uŋaal, ni li ye limɔkl ke ni mɔmɔk ye Uwumbɔr aapiin la, aan ki di see mmii ni, libimbiln paab, tii Uwumbɔr. Ni ye kitork ki ga nyan titunwanbir na la.

¹³ Kina le utotoor ga toor kitork tii utunwanbirdaan, le Uwumbɔr ga di cha pinn u waatunwanbir. N‑yon mu gur na ye utotoor na yaan le ke njikaabim aapiin aah ye uyaan pu na.

Lipɔln aatork

¹⁴ Uwumbɔr le nan len tibɔr timina Moses chee:

¹⁵ Ni ponn ni ubaa yaa kaa nyi le kaa pan Uwumbɔr tipar ti bi chain na kan, u tun titunwanbir Uwumbɔr chee. Nima pu na, u li joo ni upihja, bee uŋoja u ŋan na, ki nan tii Uwumbɔr lipɔln aatork. Kiwakork ngbaan aadaak li dii Uwumbɔr aakaal aah siin pu na.

¹⁶ See u pan waah ba yii kaa pan chain aapar ti na, le ki ki pa paan ti pu ki tii utotoor. Le utotoor ga di kiwakork ngbaan toor udaan ngbaan aatunwanbir pu, le Uwumbɔr ga di cha pinn u waatunwanbir.

¹⁷ Unii ubaa yaa peln bii Uwumbɔr aakaal kan, u tun titunwanbir le na, le ni ŋeer u pa ti pu.

¹⁸ U li joo ni utotoor chee upihja, bee uŋoja u ŋan na, ni li ye lipɔln aatork. Kiwakork ngbaan aadaak li dii nkaal aah siin pu na. Utotoor ga di kiwakork ngbaan toor udaan ngbaan aatunwanbir ti u tun kaa nyi na pu, le Uwumbɔr ga di cha pinn u waatunwanbir.

¹⁹ Ni ye lipɔln aatork le ki tii titunwanbir ti udaan tun Uwumbɔr chee na.