Liifai Yaab 4 - Uwumbɔr aagbaŋ

Unii aah kaa nyi ki tun titunwanbir ti na aatork aabɔr

¹ Uwumbɔr nan bui Moses

² ke u tuk Israel yaab ke ubaa yaa kaa nyi ki peln bii Uwumbɔr aakaal kan, waah ga ŋa pu na sɔ:

³ Utotoorninkpel le yaa tun titunwanbir le ni ga joo ni ntafadaan binib pu kan, u di unaaja u ŋan na toor kitork tii Uwumbɔr, waatunwanbir ngbaan pu.

⁴ U li joo ni unaaja ngbaan Libool aabisamɔb chee, ki di uŋaal paan uyil pu, aan ki kɔr u Uwumbɔr aanimbiin ni.

⁵ Le Utotoorninkpel na ga ban unaaja ngbaan aasin ngem ki di koo Libool ngbaan ni,

⁶ ki di uŋanbik bɔ nsin ngbaan ni, ki di yɔk yɔk chain aakekeln chee, nfum mulole,

⁷ ki ki di nsin ngbaan ngem ŋa tulalee aayon aabimbiln li si Libool ni na aalɔlɔ aamɔju pu. U di nsin mu gur na kpir libimbiln li si Libool aabisamɔb chee aan bi seer kitork aamii li pu na aataab.

⁸ U chuu nyan unaaja ngbaan aaponn ni nkpan mɔmɔk, nkpan mu bii ponn ni aawan pu na,

⁹ ni ŋipɔɔkpeebil ni nkpan mu bii ŋi pu na, ni lipɔɔl nin chee ŋan na.

¹⁰ Le u ga yoor nkpan ngbaan ki di see mmii ni, libimbiln li paab bi seer kitork na, ke waah ŋani kimɔbaan aatoor aawakor aakpan pu na.

¹¹ Unaaja ngbaan aagban, ni tinann, ni liyil, ni ŋitaa, ni ponn ni aawan ki kpee tineer ma kan,

¹² u ga di ni mɔmɔk nya baah ka ni chee na lipaal, ki di buen baah joo nfatan kpir nin chee aan ni ye chain na, ki see ni mɔmɔk idɔ aamii pu nima chee.

¹³ Israel yaab mɔmɔk le yaa tun titunwanbir Uwumbɔr chee ki bii waakaal kaa nyi,

¹⁴ le titunwanbir ngbaan yaa nyan aan bi bee ti kan, bi mɔmɔk kpaan ban ni unaaja, ni li ye titunwanbir aachapinn aatork. Bi li joo ni unaaja ngbaan Uwumbɔr Aabool chee unimbiin ni,

¹⁵ le binib ngbaan aayidam mɔmɔk ga di biŋaal paan uyil pu, le bi kɔr u nima chee.

¹⁶ Le Utotoorninkpel ga ban unaaja ngbaan aasin ngem buen Libool ni,

¹⁷ ki di uŋanbik bɔ mu ni, ki di yɔk yɔk likekeln chee nfum mulole.

¹⁸ U ki di nsin ngbaan ngem ŋa tulalee aayon aabimbiln li si Libool ni na aalɔlɔ aamɔju pu, aan ki di nsin mu gur na kpir libimbiln li si Libool aabisamɔb chee aan bi seer kitork aamii li pu na aataab.

¹⁹ U chuu nyan waakpan mɔmɔk ki see mu mmii ni, libimbiln paab.

²⁰ U ŋa tiwan mɔmɔk unaaja ngbaan pu, ke waah ŋa ubaa aatunwanbir aapiin aanaaja pu pu na. U yaa ŋa kina kan, u toor nyan binib ngbaan aatunwanbir le na, le Uwumbɔr ga di cha pinn bi baatunwanbir.

²¹ Le u nin yoor unaaja ngbaan nya lipaal ki ti see u mmii ni, ke waah see ubaa aatunwanbir aapiin aanaaja pu na. Kitork kimina aaboln le ga ŋmaa nyan bi baatunwanbir ponn ni.

²² Utinjoor le yaa tun titunwanbir ki bii Uwumbɔr aakaal kaa nyi,

²³ le bi tuk u aan u bee ke u tun titunwanbir kan, u li joo ni uŋoja u ŋan na ki nan toor waatork.

²⁴ U di uŋaal paan uyil pu, aan ki kɔr u, kitork aabimbiln aaŋangan wɔb, nin chee bi kɔr kitork ki bi joo seer mmii ni na aawakor na. Ipiin aatork kimina aaboln le nyani titunwanbir.

²⁵ Utotoor ga di uŋanbik bɔ nsin ni, ki di mu yɔk yɔk libimbiln aalɔlɔ aamɔju mɔmɔk pu, ki di nsin mu gur na kpir libimbiln ngbaan aataab.

²⁶ U ga di waakpan ngbaan see mmii ni, libimbiln paab, ke waah see kimɔbaan aatork aawakor aakpan pu na. Utotoor yaa toor kitork kimina aaboln tii utinjoor kan, Uwumbɔr ga di cha pinn u waatunwanbir.

²⁷ Unii u kaa ye utinjoor, bee utotoor na, yaa tun titunwanbir ki bii Uwumbɔr aakaal kaa nyi,

²⁸ le bi tuk u aan u bee ke u tun titunwanbir kan, u li joo ni uŋosal u ŋan na ki nan toor waatork.

²⁹ U di uŋaal paan uyil pu, aan ki kɔr u kitork aabimbiln aaŋangan wɔb, nin chee bi kɔr kitork ki bi joo seer mmii ni na aawakor na.

³⁰ Utotoor di uŋanbik bɔ nsin ni, ki di mu yɔk yɔk libimbiln aalɔlɔ aamɔju mɔmɔk pu, aan ki di nsin mu gur na kpir libimbiln ngbaan aataab.

³¹ U chuu nyan waakpan mɔmɔk, ke waah nyan kimɔbaan aatork aawakor aakpan pu na, ki di mu see mmii ni, libimbiln paab, aan ni li nu mɔ Uwumbɔr chee. Kina le utotoor ga toor uja ngbaan aatunwanbir aatork, le Uwumbɔr ga di cha pinn u waatunwanbir.

³² U yaa joo ni upiih le u nan toor titunwanbir aatork kan, u cha ni li ye upihsal u ŋan na.

³³ U di uŋaal paan uyil pu, aan ki kɔr u kitork aabimbiln aaŋangan wɔb, nin chee bi kɔr kitork ki bi joo seer mmii ni na aawakor na.

³⁴ Le utotoor ga di uŋanbik bɔ kiwakork ngbaan aasin ni, ki di mu yɔk yɔk libimbiln aalɔlɔ aamɔju mɔmɔk pu, le ki di nsin mu gur na kpir libimbiln ngbaan aataab.

³⁵ U chuu nyan waakpan mɔmɔk ke waah nyan kimɔbaan aatork aapiih aakpan pu na, aan ki di mu see mmii ni, libimbiln paab, ki kpee tijikaar aatork pu, ki tii Uwumbɔr. Kina le utotoor ga toor uja ngbaan aatunwanbir aatork, le Uwumbɔr ga di cha pinn u waatunwanbir.