Liifai Yaab 3 - Uwumbɔr aagbaŋ

Kimɔbaan aapiin aabɔr

¹ N‑yoonn mu nimi ubaa ban u di unaa toor kitork ki tii Uwumbɔr kimɔbaan aapiin na kan, u li ye unaaja bee unaasal u ŋan na.

² Uja ngbaan ga di uŋaal paan unaa ngbaan aayil pu, le ki kɔr u Uwumbɔr Aabool aabisamɔb chee. Le Aaronn aabijabim bi ye bitotoorb na ga di nsin yɔk yɔk kitork aabimbiln aapepel mɔmɔk ŋinaa pu.

^3-4 Le bi di kiwakork ngbaan aaponn ni aawan nimina: Nkpan mu mɔmɔk bii ponn ni aawan pu na, ni ŋipɔɔkpeebil ni nkpan mu bii ŋi na, ni lipɔɔl nin chee ŋan na, ni li ye tijikaar aapiin ki tii Uwumbɔr.

⁵ Le bitotoorb ga di ni mɔmɔk, ki di kpee kitork kiken pu, ki see mmii ni, kitork aabimbiln paab. Tijikaar aapiin kina aaboln nu mɔ Uwumbɔr chee.

⁶ U yaa ban u di upiih, bee uŋoob le toor kimɔbaan aatoor kan, u cha ki li ye kijak, bee kisal ki ŋan na.

⁷ Uja yaa ban u di upiih toor kan,

⁸ u di uŋaal paan uyil pu, ki kɔr u Libool na aabisamɔb chee. Bitotoorb ga di nsin yɔk yɔk kitork aabimbiln aapepel mɔmɔk ŋinaa pu,

^9-10 le ki di kiwakork ngbaan aaponn ni aawan nimina: Nkpan, ni lijuul aah naa lichakaal nin chee na aakpan, ni nkpan mumɔk bii ponn ni aawan pu na, ni ŋipɔɔkpeebil ni nkpan mu bii ŋi pu na, ni lipɔɔl nin chee ŋan na, ni li ye tijikaar aapiin ki tii Uwumbɔr.

¹¹ Le utotoor u ŋa kitork ngbaan na di ni mɔmɔk see mmii ni, libimbiln paab, ni li ye tijikaar aapiin ki tii Uwumbɔr.

¹² U yaa ban u di uŋoob le toor kan,

¹³ u di uŋaal paan uŋoob ngbaan aayil pu, aan ki kɔr u Libool na aabisamɔb chee. Le bitotoorb di nsin yɔk yɔk kitork aabimbiln aapepel ŋinaa mɔmɔk pu,

^14-15 ki di ponn ni aawan nimina: Nkpan mumɔk bii ponn ni aawan pu na, ni ŋipɔɔkpeebil ni nkpan mu bii ŋi pu na, ni lipɔɔl nin chee ŋan na, ni li ye tijikaar aapiin ki tii Uwumbɔr.

¹⁶ Utotoor ga di ni see mmii ni, kitork aabimbiln paab, ni li ye tijikaar aapiin i nu mɔ Uwumbɔr chee na. Nkpan aawan mɔmɔk ye uma Uwumbɔr yaan la.

¹⁷ Israel yaab ubaa taa ji nkpan, bee nsin. Israel yaab mɔmɔk yaa bi nin chee mɔk na kan, bi li joo likoobil ngbaan ki cha n‑yoonn mu kaa kpa ndoon na.