Liifai Yaab 27 - Uwumbɔr aagbaŋ

Uwumbɔr aapiin aakaal aabɔr

¹ Uwumbɔr nan di ikaal imina tuk Moses

² ke u di mɔk Israel yaab. Ni yaa di unibɔn le pan tii Uwumbɔr ni giin tipuur kpaan aapɔln kan, ni ga ŋmaa pa ŋimombil ŋi aabɔr paa na ki gaa udaan lii.

^3-7 Maah ban m siin pu aan ni mɔmɔk li pa na sɔ: Bijab bi fuu ŋibin moninko ki ti saa imonko itaa na, ni ga pa bi pu tikunabr aamombil piiŋmu la. Bipiib bi mu fuu ŋibin moninko ki ti saa imonko itaa na, ni ga pa bi pu tikunabr aamombil piitaa la. Binachipɔm bi fuu ŋibin ŋiŋmu ki ti saa moninko na, ni ga pa bi pu tikunabr aamombil moninko la. Bisapɔm bi fuu ŋibin ŋiŋmu ki ti saa moninko na, ni ga pa bi pu tikunabr aamombil kipiik la. Mbim bi ye mbijabim ki saa ŋibin ŋiŋmu na, ni ga pa bi pu tikunabr aamombil ŋiŋmu la. Mbim bi ye mpiibim ki saa ŋibin ŋiŋmu na, ni ga pa bi pu tikunabr aamombil ŋitaa la. Bijab bi jer ŋibin imonko itaa na, ni ga pa bi pu tikunabr aamombil kipiik ni ŋiŋmu la. Bipiib bi mu jer ŋibin imonko itaa na, ni ga pa bi pu tikunabr aamombil kipiik la.

⁸ Uja u puu tipuur ngbaan na yaa ye ugiin, kaan ŋmaa pa maah siin pu na kan, u li joo ni waah ban u di unii u pa na utotoor chee, le utotoor ngbaan ga siin kidaak ki diin na, ki ŋeer upɔndaan aah ga ŋmaa pa pu na.

⁹ Ni yaa ye kiwakork ki ŋeer kitork ki u ga di toor tii Uwumbɔr na kan, ki ye Uwumbɔr yaan la,

¹⁰ nima pu na, uja u puu tipuur ngbaan na taa ki ban kiwakork yayan ki di kpeln njan yaak na. Udaan yaa ŋa kina kan, tiwakor tilee ngbaan ŋa Uwumbɔr yaan la.

¹¹ Tipuur ngbaan aawakork yaa ye ki kɔ na, ki mu aa ŋeer bi di ki toor Uwumbɔr aatork kan, uwandaan di kiwakork ngbaan buen utotoor chee.

¹² Utotoor le ga ti siin waadaak, ki ŋeer kaah ŋan, ni kaah kaa ŋan pu na aadaak, le waah len pu na, nima le ga sil.

¹³ Uja ngbaan yaa ban u gir daa kiwakork ngbaan kan, u pa paan kaadaak pu.

¹⁴ Ubaa yaa di waadichal tii Uwumbɔr ipiin kan, utotoor le ga siin lidichal ngbaan aah ŋan, ni laah kaa ŋan, ki ŋeer pu na aadaak, le waah len pu na, nima le ga sil.

¹⁵ Nibaakan, unii u di lidichal ngbaan tii ipiin na yaa ki ban u daa lidichal ngbaan kan, u mu ga pa utotoor aah siin laadaak pu na la, le ki paan.

¹⁶ Uja yaa di waatiŋ nibaa chee ki di tii Uwumbɔr ipiin kan, njikaabim mu bi ga di bu bukpaab ngbaan ponn ni aah ga li wiir ki saa pu na, bu aadaak mu ŋeer kina la, njikaabim kuruwaa moninko ye tikunabr aamombil kipiik la.

¹⁷ Giintii Uwandaan aabiln yaa jer naa yunn le u di kitiŋ ngbaan tii ipiin kan, kaadaak aah ye pu na, le u ga pa.

¹⁸ Giintii Uwandaan aabiln yaa jer ni yunn kan, utotoor ŋaŋ ki, ki ŋeer ŋibin ŋi gur na ki ti saa Giintii Uwandaan aabiln li paa ni na aah ga nan saa buyoonn na, ki bar kidaak ngbaan pu.

¹⁹ Utindaan yaa ki ban ke u daa kitiŋ ngbaan kan, u pa baah siin kaadaak pu na, ki ki paan.

²⁰ Waah di ki tii Uwumbɔr ipiin na, u yaa kaa ki daa kitiŋ ngbaan Uwumbɔr chee ki di ki kooh tii unii yayan kan, waa ki kpa nsan ke u ki gir daa ki unii yayan ngbaan chee.

²¹ Ni yaa nan ŋeer bi giin biwandam aawan tii bi, Giintii Uwandaan aabiln li paa ni na kan, kitiŋ ngbaan gur ye Uwumbɔr yaan la, le ni ga di kitiŋ ngbaan tii bitotoorb.

²² Uja yaa daa kitiŋ ki di ki tii Uwumbɔr kan,

²³ bitotoorb le ga siin kitiŋ ngbaan aadaak ni ŋeer ŋibin ŋi gur ki ti saa Giintii Uwandaan aabiln li paa ni na, le ni ŋan ke u pa kaamombil liyaadaal ngbaan, le limombil ngbaan ye Uwumbɔr yaan la.

²⁴ Giintii Uwandaan aabiln yaa nan fuu kan, ni giin kitiŋ ngbaan tii utindaan, bee waabim.

²⁵ Tiwan ngbaan mɔmɔk aadaak ga sil maah siin pu na la.

²⁶ Uwumbɔr le yeh kiwakork mɔk aajan aabo, nima pu na, ni taa ki di ni tii u, nimi aageehn aapiin. Ni yaa ye unaabo, bee upihbo, bee uŋobo kan, ni mɔmɔk ye Uwumbɔr yaan la.

²⁷ Tɔ, ni yaa ye kiwakork ki kɔ na le yaa ma njan aabo kan, ni gir daa ki m chee, ki pa maah siin pu na, aan ki paan ŋimombil. Uwandaan yaa kaa gir daa ki kan, bi di kooh tii unii u ban na, aan u pa kidaak aah ye pu na.

²⁸ Unii yaa di unibɔn, bee kiwakork, bee kitiŋ, ki di tii Uwumbɔr kan, waa ki kpa nsan ke u ki kooh, bee u ki gir daa tiwan ngbaan; ni kpaln Uwumbɔr aawan la, le uma le yeh ni, ki ti saa n‑yoonn mu kaa kpa ndoon na.

²⁹ Hali ni yaa ye unii u Uwumbɔr siin ke u kpo na kan, ubaa aan ki ŋmaa gir daa u, see bi ku u.

³⁰ Ni yaa kan tiwan nimɔk kitiŋ ngbaan ni na, ni yaa ye njikaabim, bee ŋisubil kan, ni ŋaŋ ki ti saa nfum kipiik, ki nyan nibaa, ni li ye Uwumbɔr yaan.

³¹ Unii yaa ban u ki gir daa tiwan kina aaboln kan, u pa kidaak aah ye pu na, ki ki paan ŋimombil.

³² Tiwakor ponn ni, unii yaa kpa ti ki ti saa kipiik kan, Uwumbɔr ti yeh kibaa. Ni yaa kahn tiwakor ngbaan ki ti saa kipiik kan, kibaa ye Uwumbɔr yaan la.

³³ Uwakodaan taa kuun waawakor siin ki gann ti kaa ŋan, bee ti kaa kpa laafee na, ki mu taa ki kpeln ki nyan waah di ki tii Uwumbɔr na ni. U yaa di kiwakork kibaa ki di kpeln kiken kan, ti mɔmɔk tilee kpaln Uwumbɔr yaan la; le waan ki ŋmaa gir daa ti.

³⁴ Uwumbɔr nan di ikaal imina le ki di tuk Moses, Sainai Aajool paab, ke u di mɔk Israel yaab.