Liifai Yaab 26 - Uwumbɔr aagbaŋ

Limɔkiir aanyoor

¹ Uwumbɔr nan bui ke, “Ni taa naan ŋiwaa, bee ni maa ŋitakpal aajaatɔlk tiib, bee ni kpii ŋitakpal aawaa ki doon ŋi. Min le ye Nidindaan Uwumbɔr.

² Ni li ŋani maah mɔk nimi pu na aajim, ki li nyuŋni naah dooni mi nin chee na. Min le ye Uwumbɔr.

³ “Ni yaa bi maakaal aah mɔk nimi pu na, ki kii maah len pu na mɔmɔk kan,

⁴ m ga cha utaal nu waayoonn, nima kan, kitiŋ ngbaan ga ŋa tijikaar, le isui mu ga lu ŋisubil.

⁵ Tijikaar ngbaan ga li wiir sakpen, le buyoonn ni bi ker ndaan aasubil na, ni ga li beenin bi chee tijikaar nimi aasar ni. Buyoonn ni bi ko ki bu nimi aajikaar na, ni ga li beenin bi ker ndaan aasubil mu. Naah ban tijikaar timɔk ni ji na, ni ga kan ti, le ki li bi kitiŋ ngbaan ni, ki li kpa nsuudoon.

⁶ “M ga tii nimi nsuudoon nimi aatiŋ ngbaan ni, le ni ga li dɔ geen kaa san ijawaan ibaa. M ga kuln tipeewanbir timɔk bi nimi aatiŋ ni na, le butɔb aan ki li bi nima chee.

⁷ M ga cha ni nyaŋ nimi aadim,

⁸ le nimi biŋmu ga ŋmaa nyaŋ nimi aadim nkub, le nimi nkub ga ŋmaa nyaŋ nimi aadim ŋichur kipiik.

⁹ M ga ŋa nimi tinyoor ki tii nimi mbim pam. Maah puu tipuur ti tii nimi na, m ga ŋa min yaan.

¹⁰ Ni ga chee tijikaar kpok mae, le ki nin kan mpaan ki di tijikaapɔnn ŋa ŋipil ni.

¹¹ M ga li bi ni chee, Maabool li bi chain na ni, le maan di nimi lii kpala.

¹² M ga li ye nimi Aawumbɔr ki li bi ni chee, le ni li ye maanib.

¹³ Min, Nidindaan Uwumbɔr le nyan ni nimi Ijipt aatiŋ ni, ke ni taa ki li ye binaagbiib. Min le nyan nimi mpɔɔn mu nan joo nimi na ni, le ki cha ni chuun aan niyil yaa paacham.”

Limɔyiir aatafadaan

¹⁴ Uwumbɔr nan ki bui ke, “Ni yaa yii maah len pu na kan, ni ga kan ntafadaan.

¹⁵ Ni yaa yii, kaa dii maakaal, ni maah len pu na, ki bii tipuur ti m puu tii nimi na kan,

¹⁶ m ga daa nitafal. M ga cha tibɔbir dan ni pu, le iween i kaan sɔŋ na ga dan ni pu, ki ga cha nimi aawon toŋ, ki ga cha ni jɔb, ki ŋa fam. Ni ga bu njikaabim, le ni mu aan ter nimi, ba pu? nimi aadim le ga dan nan nyaŋ nimi, ki ji naah kon tijikaar ti na.

¹⁷ M ga fenn ki cha nimi, nima kan, binib bi nan nimi na ga nyaŋ nimi ki li joo nimi, le ijawaan ga chuu nimi sakpen; ubaa aan li san dii nimi, le ni san.

¹⁸ “Le nimina mɔmɔk yaa pii nimi, ni beenin yiil maamɔb kan, m ga kpee nimi aatafadaan nfum mulole pu.

¹⁹ M ga bii nimi aatafalaaŋun aagaak ki ni kpa na; le utaal aan ki nu, kitiŋ ngbaan ga kuur ki pɔɔk ke tikur na.

²⁰ Le naah ga li pɔɔni nibaa ki tun sakpen pu na, naan ter nimi, ba pu? nimi aatiŋ aan ki ŋa tijikaar, le nimi aasui mu aan ki lu ŋisubil.

²¹ “Le ni yaa beenin yiil maamɔb kan, m ga ki kpee nimi aatafadaan nfum mulole pu,

²² le ki cha tipeewanbir dan ni pu, le ti ku nimi aabim, ki bii nimi aawakor, le nimi bi ga gur na aan ki li wiir, ki cha nimi aasan doon nkuun.

²³ “Ntafadaan ngbaan mɔmɔk aapuwɔb, ni yaa kaa kii tii mi, ki beenin bii maakaal kan,

²⁴ m ga fenn lir ni pu ki kpee nimi aatafadaan nfum mulole.

²⁵ M ni nimi aah nan puu tipuur tii tɔb na, le ni nan bii tipuur ngbaan, nima pu na le m ga cha nimi aadim to nimi butɔb, le ni yaa kuun buen ntim mu ponn ni ke ni koo ki ŋmar na kan, m ga cha iween i kaan sɔŋ na dan ni pu, le kina pu na, ni ga di nibaa tii nimi aadim.

²⁶ Le m ga cha nimi aajikaar taa ki ŋa mbamɔm, le kina pu, bipiib kipiik ga di baah kpa tijikaar ti na kpaan ŋaan likumbuul libaa ni. Le bi yaa yakr ti, ni jin kan, naan bab. Nkon ga li beenin joo nimi.

²⁷ “Nimina mɔmɔk yaa ŋa aan ni laa beenin bii maakaal ki yiil maamɔb kan,

²⁸ min mbaa le ga lir ni pu, ki ki daa nitafal ki kpee nfum mulole pu mu ga li bir ki jer njan yaan na.

²⁹ M ga cha nkon lir ni pu ki li pɔɔ sakpen, le ni ga ku nimi aabim ki ŋmɔ bi.

³⁰ M ga bii naah dooni ŋiwaa ŋi ŋigongon paab na, ki gbaa wiir nimi aanyɔknii aatork aabimbin, le ki di nimi aanikpol mae paan nimi aawaa ŋi lir dɔ na pu, le m ga nuur nimi.

³¹ M ga bii nimi aatim doo, ki bii nin chee ni dooni ŋiwaa na, kaan gaa nimi aatork.

³² M ga bii nimi aatim, kina pu na, nimi aadim bi ga gaa mu na aasui ga gar maah ga ŋa mu pu na.

³³ M ga cha nimi aadim to nimi butɔb ki jenn yaa nimi koon ntiyayam ni. Nimi aatim ga bii doo, le ubaa aan ki li bi nimi aatiŋ ni.

^34-35 Le naah kaan ki koo kitiŋ ngbaan pu na, ki ga doon fuur kibaa pu. Naah ga ti li bi nimi aadim aatim ponn ni, tinaagbiir ni na, le kitiŋ ngbaan ga doon fuur kibaa pu.

³⁶ “Nimi bi ga li bi tinaagbiir ni, ntiyayam ni na, m ga cha ijawaan chuu nimi sakpen, hali libuln yaa daa kifark aan ki dam kan, ni ga san. Ni ga san ke baah san dii nimi butɔb ponn ni le na. Nimi aadim aan li bi ni chee, le ni lir kitiŋ.

³⁷ Nimi aadim aan kee lir ni pu, le ni ga li san ki lɔkr tɔb ki lir kitiŋ, kaan ŋmaa to nimi aadim butɔb.

³⁸ Ni ga kpoi tinaagbiir ni la, le nimi aadim aatim ga ji nimi.

³⁹ Nimi bi gur siib nimi aadim aatiŋ ni ki ŋmar na aatunwanbir, ni niyaajatiib aatunwanbir pu, naan ki li bi tibaa ni.

⁴⁰ “Niyaabitiib ga kpiir baatunwanbir pu, ni biyaajatiib aatunwanbir, ke bi nan yii kaa kii maamɔb,

⁴¹ ki cha m fenn daa bitafal, aan ki cha baadim chur bi buen baatim ni tinaagbiir ni na. Aayaabitiib yaa nan sunn bibaa taab, ki kan baah bii pu na aatafadaan kan,

⁴² m ga teer tipuur ti m nan puu tii Jakob, ni Aisak, ni Abraham na, ki ki fikr tipuur ngbaan, ki giin maanib aatiŋ tii bi.

⁴³ Njan aabɔkpaan le ye ke bi jenn nyan niyaabitiib kitiŋ ngbaan ni, nima kan, ki ga doon fuur kibaa pu, le bi ga ji falaa, baah yii maakaal, kaa kii maah len pu na pu.

⁴⁴ Tɔ, hali bi yaa beenin bi baadim aatiŋ ni kan, maan yii bi, kaan bii bi kookoo, kaan bii tipuur ti m nan puu tii bi na, ba pu? m ye Bidindaan Uwumbɔr.

⁴⁵ M ga fikr tipuur ti m nan puu tii biyaajatiib n‑yoonn mu m nan di maapɔɔn mɔk ŋinibol mɔmɔk aan ki nyan ni maanib Ijipt aatiŋ ni na, ke min Uwumbɔr li ye Bidindaan.”

⁴⁶ Uwumbɔr nan di ikaal imina, ni baah ga dii u pu na, le ki di tuk Moses, Sainai Aajool paab, ke u di mɔk Israel yaab.