Liifai Yaab 24 - Uwumbɔr aagbaŋ

Uwumbɔr Aabool ni aakaryaa tiib aabɔr

¹ Uwumbɔr nan bui Moses ke

² u di tibɔr timina tuk Israel yaab mɔmɔk: Ni li joo ni olif aakpan mu ŋan mbamɔm na, bi li joo seer karyaa tiib Uwumbɔr Aabool ni, nima kan, karyaa tiib ngbaan ga li wiin n‑yoonn mɔmɔk.

³ Kijook mɔk kan, Aaronn ga see karyaa tiib ngbaan mɔmɔk, ki cha bi li gaal kina ki ti saa kichakpiik ni, bi li si Uwumbɔr aanimbiin ni, likekeln li bi di gii ponn ni na aapuwɔb, Uwumbɔr Aakaal Aadakaa u bi Chain Chain Aapepel ni na chee. Ni li joo nkaal ngbaan ki cha n‑yoonn mu choo na.

⁴ Aaronn le ga li lik karyaa tiib bi tɔk karyaa aawan ni ye salmaa ŋmeen na pu, ki cha bi li gaal kina n‑yoonn mɔmɔk, Uwumbɔr aanimbiin ni.

Boroboro u bi ga di tii Uwumbɔr na aabɔr

⁵ Ni ban n‑yon kuruwaa kipiik ni bilee ki ŋa boroboro kpin kipiik ni ŋilee.

⁶ Ni di bi bil chɔl tɔb ikuul ilee, biloob nkuul mbaa pu, ki di bi paan teebul u si Uwumbɔr aanimbiin ni, aan bi di salmaa ŋmeen donn biin u pu na.

⁷ Ni di tulalee aayon ŋmeen ki di ŋa ikuul ngbaan mɔk pu, ni li ye tijikaar aapiin i ni di tii Uwumbɔr na aan i sil boroboro aasisii yaan.

⁸ N‑yoonn mu choo na mɔmɔk, Likpaakool daal mɔmɔk kan, ni ban boroboro kpin pɔɔn ki di paan teebul pu, Uwumbɔr aanimbiin ni. Israel yaab aatuln le na n‑yoonn mɔmɔk.

⁹ Aaronn ni waamaal le yeh boroboro ngbaan, aan bi li ŋmɔ u, chain aapepel ni, ba pu? tijikaar ngbaan ye chain le bi di tii Uwumbɔr; nima kan, bitotoorb mu ga kan ki ji.

Ntafadaan mu ŋeer na aasurm aabɔr

^10-11 Uja ubaa nan bi Israel yaab ni, le ute nan ye Ijipt aanii, le una ye Israel aapiibo u bi yin u ke Selomif, aan ute nan ye Dibri u nyan ni Dann aanibol ni na. Le u ni Israel aanii ubaa nan jan linampal. Baah bi jaa na le u puun lii Uwumbɔr aayimbil pu, nima pu na, bi nan di u buen Moses chee.

¹² Le bi di u ŋa nibaa chee, ke bi baa ki bee Uwumbɔr aah ban bi ŋa u pu na.

¹³ Le Uwumbɔr bui Moses ke,

¹⁴ “Cha bi nyan uja ngbaan linampal ki di u buen nibaa chee, ki cha unii umɔk ŋun ke uja ngbaan puun lii Uwumbɔr aayimbil pu na di uŋaal paan uyil paab ki bui ke waabɔr bii, nee aapuwɔb, Israel aanib ngbaan mɔmɔk mae u ŋitakpal ki ku u,

¹⁵ ki tuk Israel yaab ke unii umɔk puun lii Uwumbɔr aayimbil pu na ga ji kina aafalaa ki kpo.

¹⁶ Israel aanii, bee uwɔwɔnja u koo bi chee na yaa puun lii Uwumbɔr aayimbil pu kan, binib ngbaan mɔmɔk mae u ŋitakpal ki ku u.

¹⁷ “Unii umɔk ku uken na, bi ku u mu,

¹⁸ le unii umɔk ku uken aawakork na, u teen ki. Tibɔkpaan le ye ke, ubaa yaa junn unii aamɔfal kan, bi junn u mu yaal.

¹⁹ “Unii ubaa yaa tii uken kidaŋ kan, ni tii u mu kidaŋ, waah ŋa uken na pu na.

²⁰ U yaa koo waakpab mubaa kan, ni koo u mu yoo; u yaa nyan unimbil le kan, ni nyan u mu aanimbil; u yaa faa fenn unyiln le kan, ni faa fenn u mu aanyiln. U yaa tii u kidaŋ pu na kan, ni giin kina ŋa u mu.

²¹ Unii umɔk ku uken aawakork na, ni cha udaan teen ki; unii yaa ku unibɔn ma kan, ni ku u mu.

²² Ikaal ngbaan joo ni mɔmɔk la. I joo nimi Israel yaab, ni biwɔwɔm bimɔk koo ni chee na la, ba pu? min le ye Nidindaan Uwumbɔr.”

²³ Moses aah len Israel yaab chee tibɔr ngbaan doo na, le bi di uja ngbaan nyan buen lipaal nibaa chee, ki ti mae u ŋitakpal ki ku u. Kina pu na, Israel aanib ngbaan nan ŋa Uwumbɔr aah bui Moses pu na mɔmɔk.