Liifai Yaab 23 - Uwumbɔr aagbaŋ

Njim aakaal aabɔr

¹ Uwumbɔr nan di ikaal imina tii Moses ke

² u mɔk Israel yaab. Bi yaa kuun ni tɔb chee ke bi nan doon u kan, baah ga li ji njim mu na sɔ:

³ Ni kpa iwiin iloob, ni di tun nibaa aatuln. Ni teer ke winlole daal ye Likpaakool la, ni kal fuur liyaadaal. Liyaadaal kan, ni taa tun lituln. Ni kuun ni tɔb chee ki nan doon Uwumbɔr. Uma Uwumbɔr le yeh Likpaakool daal, ni yaa bi nin chee na kan, ni li nyi ke nwiin ngbaan ye Uwumbɔr aawiin la.

⁴ Ni di njim mumina mɔmɔk aawiin daal moon, mumɔk ni mu aayoonn.

Lakr‑jer ni boroboro u kaa kpa nnyɔk na aajim

⁵ Lakr‑jer aajim ye njim mu ni ga ŋa ki pak Uwumbɔr na la, le mu piini libipɔln aajan aaŋmal winpiik ni inaa, nwiin aah lir buyoonn na.

⁶ Winpiik ni iŋmu daal le boroboro u kaa kpa nnyɔk na aajim mu piini, le ki yoor liyaadaal ngbaan ki ti saa iwiin ilole, ni taa ŋmɔ boroboro u kpa nnyɔk na.

⁷ Iwiin imina aajan aawiin daal, ni kuun ni ki nan doon Uwumbɔr, ki taa tun lituln libaa.

⁸ Iwiin ilole ngbaan mɔmɔk daal, ni li joo ni nimi aajikaar aatork ki nan tii Uwumbɔr. Winlole daal kan, ni mɔmɔk ki kuun ni tɔb chee ki nan doon Uwumbɔr, ki taa tun lituln libaa.

^9-10 Ni yaa ti fuu kitiŋ ki Uwumbɔr ban u di tii nimi na ponn ni, aan ni chee nimi aajikaar kan, ni di njan aajikaar ti pue biir na tii utotoor.

¹¹ Le u ga di ti tii Uwumbɔr, ti li ye ipiinkpaan, aan nima kan, Uwumbɔr ga gaa nimi ti pu. Likpaakool daal yaa jin ki woln kan, le utotoor ga di ti toor kitork tii Uwumbɔr.

¹² Bundaal ni ga di tijikaar aapiin tii na, ni di ipiin aatork ki bi joo seer mmii ni na kpee ki pu, ni di libiln libaa aapihjabo u ŋan na toor kitork ngbaan.

¹³ Ni ban n‑yon kuruwaa bilee, ki di olif aakpan ŋmal mu ni, ki di kpee upihjabo ngbaan pu, ki toor tijikaar aapiin aatork. Kitork kina aaboln nu mɔ Uwumbɔr chee. Ni ki ban ŋisubil aadaan kpalba ubaa ki kpee kitork ngbaan pu.

¹⁴ Ni taa pue ji nimi aajikaapɔnn tibaa aan ki nin ban nan tii ipiin, ni taa ŋmɔ ti tikaab, bee ni pu ti, bee ni ŋaan ti, see ni pue ban ti nan tii Uwumbɔr ipiin. Niyaabitiib mɔmɔk li joo ikaal imina, ki cha n‑yoonn mu choo na, hali bi yaa bi nin chee na kan, bi li ŋani kina.

Ndipɔndaan aatork aajim

¹⁵ Likpaakool aawiin mundaal ni joo ni njan aajikaar aapiin ki nan tii Uwumbɔr na, ni piin ki kahn nwiin ngbaan daal ki ti saa ŋikpaakoo ŋilole.

¹⁶ Iwiin piiŋmu ni iŋmu daal, likpaakool lolole yaa jer nwiin mu ga woln na, ni ki ban tijikaapɔnn aapiin ki nan tii Uwumbɔr.

¹⁷ Mmaal mɔmɔk li joo ni ŋiboroboro kpin ŋilelee ki nan tii Uwumbɔr ipiinkpaan. Ni di n‑yon kuruwaa bilee ŋa boroboro kpiln libaabaa ki di nnyɔk ŋmal mu ni, aan ki ŋa boroboro kpin ŋilee ngbaan, ni li ye njan aajikaar aapiin i ni di tii Uwumbɔr ipiin na.

¹⁸ Israel yaab mɔmɔk kpaan ki ban libiln libaa aapihjabi ilole, ni unaaja ubaa, ni ipihja ilee, i mɔmɔk taa li kpa iween ibaa, ki li ŋan, aan ki di kpee tijikaar aapiin pu. Ni di kina aawan toor ipiin aatork ki bi joo seer mmii ni na, ki di kpee njikaabim aapiin, ni ŋisubil aadaan aapiin, ki di ni mɔmɔk tii Uwumbɔr. Kina aapiin nu mɔ Uwumbɔr chee.

¹⁹ Ni ki ban uŋoja ki toor titunwanbir aapiin aatork, ni libiln libaa aapihjabi ilee toor kimɔbaan aapiin aatork ki tii Uwumbɔr.

²⁰ Le utotoor ga di boroboro ngbaan, ni ipihjabi ilee na toor ipiinkpaan aatork tii Uwumbɔr, le bitotoorb ga yoor ni ki li joo. Ipiin imina ye chain la.

²¹ Liyaadaal ngbaan kan, ni kuun ni tɔb chee ki nan doon Uwumbɔr ki taa tun lituln libaa. Niyaabitiib li joo ikaal ngbaan n‑yoonn mɔmɔk, hali bi yaa bi nin chee na, bi li ŋani kina.

²² Ni yaa bi chee nimi aajikaar kan, ni taa chee tijikaar ti bi mmogbaan na, ki taa ki gir buen naah chee nimi aasar ti ni na ki ti lɔi tijikaar ti gur na; cha bigiim ni biwɔwɔm mu buen ti lɔi. Min le ye Nidindaan Uwumbɔr.

Libipɔln aatork aajim

^23-24 Ŋmalole aajan aawiin daal ye nwinkpaan, ni lifuur daal la, ni yaa ŋun kakaan tiib pu kan, ni kuun ni tɔb chee, ki nan doon Uwumbɔr.

²⁵ Ni toor tijikaar aatork tii Uwumbɔr, ki taa tun nimi aatuln libaa liyaadaal ngbaan.

Titunwanbir aachapinn aatork aajim

^26-27 Ŋmalole aawinpiik daal le ye nwiin mundaal ni ga toor libiln ni aatork ki nyan nimi aanib baatunwanbir ni na. Liyaadaal ngbaan, ni taa ji tijikaar tibaa kpala; ni kuun ni tɔb chee ki nan doon Uwumbɔr, aan ki di tijikaar aapiin toor kitork tii u.

²⁸ Ni taa tun lituln libaa liyaadaal ngbaan, ba pu? ni ye nwiin mundaal ni ga toor kitork ki nyan titunwanbir na la.

²⁹ Liyaadaal ngbaan, unii u jin tijikaar na kan, waan ki li ye Uwumbɔr aanib ponn ni ubaa.

³⁰ Ubaa yaa tun lituln liyaadaal ngbaan kan, Uwumbɔr ubaa le ga ku u.

³¹ Ikaal ngbaan ye ki tii niyaabitiib mɔmɔk la, hali bi yaa bi nin chee na kan, bi li joo i.

³² Ki yoor winwae daal aajook ki ti saa winpiik daal aajook, ni li joo nwiin ngbaan mu li ye nwinkpaan, ni taa tun lituln libaa, ki mu taa ji nibaa.

Tikakar aawiindaal aatork aajim

^33-34 Ŋmalole aawinpiik ni iŋmu daal, le Tikakar aatork aajim piini, ki joo kina ki ti saa iwiin ilole.

³⁵ Njan aawiin daal kan, ni kuun ni tɔb ki nan doon Uwumbɔr, ki taa tun lituln libaa.

³⁶ Iwiin ngbaan mɔmɔk daal kan, ni toor tijikaar aapiin aatork. Winiin daal kan, ni ki kuun ni, ki nan doon Uwumbɔr ki toor tijikaar aatork. Liyaadaal ye ke ni doon Uwumbɔr la, ni taa tun lituln libaa.

³⁷ Njim mumina le ye njim mu ni ga li ji ki nyuŋni Uwumbɔr, ki kuuni tɔb chee ki dooni u, ki tii u tijikaar aapiin, ni kitork ki bi joo seer mmii ni na aapiin, ni njikaabim aapiin, ni kitork aabɔŋ, ni ŋisubil aadaan aapiin. Ni li ŋani kina iwiin mɔmɔk.

³⁸ Ni ga ŋa njim ngbaan ki kpee Likpaakool daal mɔmɔk aatork pu, ni naah tii ipiin pu na, ni naah pa tipuur aapiin pu na, ni nimi aageehn aapiin i ni joo tii Uwumbɔr na.

³⁹ Ni yaa chee nimi aajikaar kan, ni ji kina aajim ki ti saa iwiin ilole; ni piin ŋmalole aawinpiik ni iŋmu daal. Njan aawiin ga li ye nwinkpaan la, ni fuur liyaadaal.

⁴⁰ Liyaadaal kan, ni ban ŋisubinyaan nimi aasui ponn ni, ki ban tibɔkpafar, ni isui i ŋan na aafar, aan ki piin njim ngbaan ki nyuŋ Nidindaan Uwumbɔr.

⁴¹ Ni ŋa kina aajim ki ti saa iwiin ilole. Niyaabitiib li joo ikaal ngbaan ki cha n‑yoonn mu choo na.

⁴² Israel aanib mɔmɔk li koo tikakar ni, ki ti saa iwiin ilole.

⁴³ Nima kan, niyaabitiib ga bee ke Uwumbɔr aah nan nyan ni Israel yaab Ijipt aatiŋ ni aan bi nan choo na, bi nan koo tikakar ni la. Uma le ye Nidindaan Uwumbɔr.

⁴⁴ Kina le Moses nan di njim aakaal ki di tuk Israel yaab aan bi li ŋani ki nyuŋni Uwumbɔr.