Liifai Yaab 20 - Uwumbɔr aagbaŋ

Limɔyiir aatafadaan

¹ Uwumbɔr nan bui Moses ke u tuk Israel yaab ke,

² “Nimi Israel yaab, bee biwɔwɔm bi koo gbɔk nimi na ubaa yaa di nimi aabo ubaa toor kitork tii Liwaal Molek kan, ni mɔmɔk mee ŋitakpal ki ku u.

³ Ubaa yaa di waabo toor kitork tii Liwaal Molek ki bii Maabool, aan laa ki bi chain, ki jinn maayimbil li bi chain na inimɔɔn kan, m ga daa utafal; waan ki li ye maanib ponn ni ubaa.

⁴ Nimi maanib bi gur na yaa kaa gar u waah ŋa pu na, kaa ku u kan,

⁵ min mbaa le ga daa uja ngbaan, ni waamaal, ni bimɔk kpee u pu ki doon liwaal Molek na aatafal. Baan ki li ye maanib ponn ni bibaa.

⁶ “Ubaa yaa buen bibɔɔb chee u ti ban nsurm bitekpiib chee kan, m ga daa utafal, waan ki li ye maanib ponn ni ubaa.

⁷ Ni di nibaa tii mi, ki li joo nibaa chain, ba pu? min le ye Nidindaan Uwumbɔr.

⁸ Ni li joo maakaal chain, ba pu? Min le ye Uwumbɔr, le ki ŋa nimi chain.”

⁹ Uwumbɔr le nan di ikaal imina mɔk bi: Ubaa yaa len tibɔbir lii ute, bee una pu kan, ni ku udaan, uma le ku ubaa.

¹⁰ Ubaa yaa koo ti doon uŋeen aatɔ Israel aanii uken aapuu chee kan, ni kpaan ki ku uja ni upii ngbaan mɔk bilee.

¹¹ Uja yaa koo ti doon ute aapuu chee kan, u jinn ute inimɔɔn la, le ni ga kpaan ki ku uja ni upii ngbaan mɔk bilee. Bima bilee ngbaan le ku bibaa.

¹² Uja yaa koo ti doon ubipuu chee kan, ni kpaan ki ku uja ni upii ngbaan mɔk bilee. Bima bilee ngbaan le kpaan ki ŋa kininsuŋ aawan ngbaan, ki ku bibaa.

¹³ Uja ubaa yaa koo ti doon ujatɔ chee kan, bi kpaan ŋa inimɔɔn aawan la, ni kpaan ki ku bimɔk bilee. Bima le ku bibaa.

¹⁴ Uja yaa kpaan joo upii ni una, bi li ye upuutiib kan, ni kpaan see bi mmii ki ku bi, ba pu? bi ŋa inimɔɔn aawan la, ni taa kii kina aabimbin li bi nikaasisik ni.

¹⁵ Uja yaa doon kiwakork chee kan, ni kpaan ki ku uja ni kiwakork ngbaan.

¹⁶ Upii yaa ban ke kiwakork doon u chee kan, ni kpaan ki ku upii ni kiwakork ngbaan. Bima le ku bibaa.

¹⁷ Uja yaa yoor ute aabisal, bee una aabisal, ki di ŋa upuu kan, ni nyan bi mpaan pu ki jinn bi inimɔɔn, aan ki nyan bi nibaa chee. U doon uninkpan chee la, ni cha u ji kina aafalaa.

¹⁸ Uja yaa doon upii u joo mpiikpen na chee kan, ni kpaan ki jenn nyan bi nibaa chee, ba pu? bi kool mbimbin mu bi chain na aakoobil a.

¹⁹ Uja yaa doon upuul, bee unawaa chee kan, ni kpaan ŋa bimɔk bilee falaa, ba pu? bi ŋa kininsuŋ la.

²⁰ Uja yaa doon utewaa, bee utekpel aapuu chee kan, u jinn utewaa, bee utekpel inimɔɔn a, bi mɔmɔk bilee ga kan ntafadaan, bimɔk bilee aan maa mbim.

²¹ Le uja yaa yoor una aabo aapuu kan, bi ga kpo kaa kpa mbim. U ŋa tiwan ni kaa bi chain na la, le ki jinn una aabo inimɔɔn.

²² Uwumbɔr nan ki bui ke, “Ni li joo maakaal mbamɔm, ki ŋa maah len pu na mɔmɔk, nima kan, Kanaann aatiŋ ki m ban m di tii nimi na aan yii nimi.

²³ Ni taa gaa kitiŋ ngbaan aanib aakaal; m ban m jenn nyan bakadam ngbaan aan ni koo kitiŋ ngbaan ni. Baah ŋani tiwan nimɔk na aa ŋan, m nan baabimbin mu bir na sakpen a.

²⁴ M puu ke m ga di kitiŋ ki kpa tiwakor aamoŋmɔpaan ni ŋisubil sakpen na tii nimi ki li ye nimi yaan, le m ga sil di ki tii nimi. Min le ye Nidindaan Uwumbɔr, le ki nyan nimi nibaa ŋinibol mɔmɔk ni.

²⁵ Nima pu na, ni lik ki bee ipeel ni inyoon i kɔ na, ni i kaa kɔ na. Ni taa ji ipeel, bee inyoon i kɔ na. Min le nyan i ke i kɔ, le ni yaa ji i kan, naan ki li bi chain.

²⁶ Ni li bi chain aan ki li ye maanib, ba pu? Min le ye Uwumbɔr le ki bi chain. M nyan ni nimi ŋinibol mɔmɔk ni ke min baanja le li yeh nimi.

²⁷ “Uja, bee upii umɔk ye ubɔɔ na kan, ni mae ŋitakpal ki ku udaan ngbaan, unii umɔk ŋa kina na le ku ubaa.”