Liifai Yaab 19 - Uwumbɔr aagbaŋ

Mbimbin chain ni mbamɔn aakaal

¹ Uwumbɔr nan bui Moses

² ke u tuk Israel yaab ke, “Ni li bi chain, ba pu? min Nidindaan Uwumbɔr bi chain la.

³ Ni mɔmɔk li pak nitetiib ni ninatiib, ki li joo Likpaakool daal ke maah siin pu na. Min le ye Nidindaan Uwumbɔr.

⁴ “Ni taa yii mi aan ki li dooni ŋiwaa, ni taa di tikur naan ŋiwaa ki doon ŋi. Min le ye Nidindaan Uwumbɔr.

⁵ “N‑yoonn mu ni kɔr kiwakork ki ŋa kimɔbaan aatork na, ni li joo ikaal i m tuk nimi na, le m ga gaa kitork ngbaan.

⁶ Bundaal ni kɔr kitork ngbaan aawakork na kan, ni ŋmɔ tinann ngbaan liyaadaal, ni kitaak ki ga ki woln na. Wintaa daal, tinann ngbaan yaa ki gur kan, ni taa ŋmɔ ti, ni see ti mmii ni,

⁷ ba pu? taa ki bi chain, le umɔk ŋman ti na kan, maan ki gaa waapiin aatork.

⁸ Unii umɔk ŋman ti na aabɔr ga bii, ke waa lik faar tiwan ni bi di tii mi na, waan ki li ye maanib ponn ni ubaa.

⁹ “Ni yaa bi chee tijikaar, nimi aasar ni kan, tijikaar ti bi mmogbaan na, ni taa chee ti, ki taa ki gir buen naah chee nimi aasar ti ni na, ki ti lɔi tijikaar ti gur na.

¹⁰ Ni taa ki gir buen nimi aasubil aasar ni, ki ti lɔi ŋisubil ŋi gur, ni ŋi lir kitiŋ na; di cha ŋi man, aan bigiim ni biwɔwɔm buen ti lɔi. Min le ye Nidindaan Uwumbɔr.

¹¹ “Ni taa su kinaayuk, bee ni ji niŋeen aatɔ pem pem, bee ni gii inyamɔn.

¹² Ni yaa kaan ŋmaa giin tipuur kan, ni taa puu ti maayimbil pu. Mbimbin kina joo ni inimɔɔn le maayimbil pu. Min le ye Nidindaan Uwumbɔr.

¹³ “Ni taa ji unii ubaa pem pem, bee ni gaa waawan. Unii yaa tun saatuln kan, pɔɔn aabaa ki pa u, ki taa cha ni woln kitaak.

¹⁴ Ni li san min ijawaan man, ki taa puun lii utafakpaa pu, ki taa di tiwan bil ujoon aasan ni ke u gbeer ki lir. Min le ye Nidindaan Uwumbɔr.

¹⁵ “Ni yaa bi ji unii tibɔr kan, ni len ibamɔn ki li kpa kipak; ni yaa ji ugiin tibɔr kan, ni taa li kpa imaagann, ki mu taa li san biwankpadam ijawaan.

¹⁶ Ni taa li geei inyamɔn paani unii ubaa. Bi yaa bi ji unii ubaa aabɔr aan u ban u nyan nkun ni, aan aa nyi ke u kpa mbamɔn kan, ter u ki gaa u lii. Min le ye Uwumbɔr.

¹⁷ “Aa taa li joo aaŋeen aatɔ liŋuul; pɔɔn aabaa ki toor nimi aabɔr ni man, nima kan, saan tun titunwanbir u pu.

¹⁸ Aa taa li ban ke aa teen ubaa bakaa, ki li nan udaan ki cha n‑yoonn mɔmɔk, tɔ, aa li gee aaŋeen aatɔ ke saah gee aabaa pu na. Min le ye Uwumbɔr.

¹⁹ “Ni li joo maakaal. Ni taa di linampal aawakor ti kaa kpaa na kpaan tɔb chee ke ti dur. Ni taa di njikaabim mulee aabɔŋ kpaan bu bukpaab bubaa ni, ki taa di tikokonn ni tiwan ni kaa ye tikokonn na ŋmal tɔb ni ki di ŋa tiwanpeenkaan.

²⁰ “Uja yaa puu ke u ga di waanaagbiipiibo kooh tii uja ŋeen aatɔ ke u li ye upuu, le uja u ban u daa upiibo na yaa kaa kee pan, le uja uken yaa doon upiibo ngbaan chee kan, ni daa bitafal, ni taa ku bi; ba pu? unaagbiipii ngbaan laa beenin ye udindaan yoo la.

²¹ Uja ngbaan li joo ni upihja Maabool aabisamɔb chee, ki nan pa lipɔln aatork.

²² Le utotoor ga toor ki ŋa u chain ki nyan u waatunwanbir ni, le min Uwumbɔr ga di cha pinn u.

²³ “Ni yaa ti fuu Kanaann aatiŋ ni, ki bun ŋisubil aasui aaboln i na kan, ni taa kee ji yaasubil ngbaan ki ti saa ŋibin ŋitaa, ba pu? ni kɔ. Ŋibin ŋitaa ngbaan ni, ni taa ji ŋi.

²⁴ Libiln nanar ni kan, ni di ŋisubil ngbaan mɔmɔk tii mi Uwumbɔr, ni li ye nimi aadoon aatork.

²⁵ Libiln ŋmuŋmur ni kan, ni ga ŋmaa ji ŋisubil ngbaan. Ni yaa ŋa maah mɔk nimi pu na kan, nimi aasubil aasui ga lu sakpen. Min le ye Nidindaan Uwumbɔr.

²⁶ “Ni taa ŋmɔ tinann ti nsin beenin bi ti ni na. Ni taa li ŋani bibɔɔb aatuln ki ji inyɔk.

²⁷ Ni taa chee nitapak ni ŋilangban aakor,

²⁸ bee ni daan nimi aawon pu nibaa chee, bee ni geei geei niwon utekpiir pu. Min le ye Uwumbɔr.

²⁹ “Ni taa di nibisatiib ŋa tiwaadir ni aadagoob ki jinn bi inimɔɔn; ni yaa ŋa kina kan, ni ga fenn dii ŋiwaa, le kitiŋ ngbaan ga gbiin kidagook aatuln ŋmeen.

³⁰ Ni li joo Likpaakool aawiin chain, ki li pak nin chee ni dooni mi na. Min le ye Uwumbɔr.

³¹ “Ni taa ban binib bi baa bitekpiib chee tibɔr na aasurm. Ni yaa ŋa kina kan, ni ga bii nibaa, kaan ki li bi chain. Min le ye Nidindaan Uwumbɔr.

³² “Min le ye Uwumbɔr, ni li san mi ijawaan, ki li pak binib bi jer nimi na, ki li nyuŋni bi.

³³ “Ni taa ŋa biwɔwɔm bi koo ni chee na mbiin.

³⁴ Ni li ŋani bi tiŋann ke naah ŋani niŋeen aatɔtiib Israel yaab biken pu na, ki li gee bi ke naah gee nibaa pu na. Ni teer ke ni mu nan ye biwɔwɔm le Ijipt aatiŋ ni. Min le ye Nidindaan Uwumbɔr.

³⁵ “Ni taa ji tɔb pem pem ki joo tiwan ni kaa ye nibamɔnn na ŋaŋni tiwan aafɔfɔk, ni naanyunyuun, ni naawiwiir.

³⁶ Ni li joo mbamɔn aawan ŋaŋni tiwan mɔmɔk. Min le ye Nidindaan Uwumbɔr, le ki nyan ni nimi Ijipt aatiŋ ni.

³⁷ Ni li joo maakaal ki ŋa maah len pu na mɔmɔk. Min le ye Uwumbɔr.”