Liifai Yaab 18 - Uwumbɔr aagbaŋ

Mbimbin mu kaa ŋan na aabɔr

¹ Uwumbɔr nan bui Moses

² ke u tuk Israel yaab ke, “Min le ye Nidindaan Uwumbɔr.

³ Ni taa dii Ijipt yaab bi ni nan bi bi chee na aah ŋani pu na, bee Kanaann yaab bi aatiŋ pu m joo nimi cha na aah ŋani pu na.

⁴ Ni kii ki li joo maakaal ki ŋa maah bui nimi pu na. Min le ye Nidindaan Uwumbɔr.

⁵ Ni li ŋani ki li dii maakaal i m di mɔk nimi na; ni yaa ŋa kina kan, ni ga li kpa limɔfal. Min le ye Uwumbɔr.”

⁶ Le Uwumbɔr nan di ikaal imina tuk bi. Ni taa doon nimi aamaal ni aapii ubaa chee.

⁷ Taa koo ki ti doon aana chee ki jinn aate inimɔɔn. Taa jinn aana inimɔɔn.

⁸ Taa koo ki ti doon aate aapuutiib ubaa chee ki jinn aate inimɔɔn.

⁹ Taa koo ki ti doon aaninkpan u ye aate aabisal, bee aana aabisal na chee, bi yaa ma u nibaa chee, bee aa ni u yaa kpaan lichiln kan, naa ŋan ke aa doon u chee.

¹⁰ Taa koo ti doon upii u ye aayaabil na chee; ni ga li ye inimɔɔn le ki tii si.

¹¹ Taa koo aatewaa, bee aatekpel aabisal chee, ba pu? u mu ye aaninkpan la.

^12-13 Taa koo ki ti doon aapuul chee, naa ŋan ke aa doon aate aaninkpan, bee aanakpel, bee aanawaa chee.

¹⁴ Taa koo ki ti doon aatewaa, bee aatekpel aapuu chee, u mu ye aapuul la.

¹⁵ Taa koo ki ti doon aabipuu chee,

¹⁶ bee aakpel, bee aanaal aapuu chee.

¹⁷ Aa taa koo ki ti doon upii u aa doon u chee na aabisal, bee uyaabil chee, bi ye saamaal ni aanib la, le naa ŋan ke aa ŋa kina.

¹⁸ Aapuu yaa beenin bi limɔfal ni kan, aa taa ki yoor unaal, bee ukpel, ki di ŋa aapuu.

¹⁹ Upii yaa joo mpiikpen kan, taa koo ki ti doon u chee, ba pu? waah bi chain.

²⁰ Taa koo ki ti doon aaŋeen aatɔ aapuu chee; ni ga cha ni taa ki li bi chain.

²¹ Taa di nimi aabim tii ke bi di toor kitork tii liwaal Molek, ba pu? ni ga joo ni inimɔɔn Nidindaan Uwumbɔr aayimbil pu.

²² Uja ubaa taa koo ti doon uja ŋeen aatɔ chee; Uwumbɔr aa gee kina.

²³ Uja taa doon kiwakork chee, upii mu taa cha kiwakork doon u chee; kininsuŋ ngbaan le ga ŋa nimi tijɔŋ.

²⁴ Ni taa cha tiwan nimina mɔmɔk bii nimi ki ŋa nimi tijɔŋ; kina le binib bi kaa dii Uwumbɔr na ŋani le kaa bi chain, binib kina aaboln le bi kitiŋ ki ni chaa koo ki ni na, le Uwumbɔr ga jenn nyan bi, aan ni gaa ki.

²⁵ Baah tun pu na le cha kitiŋ ngbaan aa bi chain, le kina pu Uwumbɔr ŋa kitiŋ ngbaan fam, le binib ngbaan aa ŋman bi koo ki ponn ni.

^26-27 Bi ŋa inimɔɔn aawan ngbaan mɔmɔk kina, le ki cha kitiŋ ngbaan aa bi chain. Nima taa ŋa kina kpala. Ni mɔmɔk, Israel yaab, ni biwɔwɔm bi koo ni chee na, ni li joo Uwumbɔr aakaal, ni waah len pu na mɔmɔk,

²⁸ le kitiŋ ngbaan ga li ŋan tii nimi, kaan yii nimi ke kaah nan yii binib bi nan koo ki ponn ni na.

²⁹ Ni nyi ke unii umɔk ŋa inimɔɔn aawan nee na, waan ki li ye Uwumbɔr aanib ponn ni ubaa.

³⁰ Le Uwumbɔr bui ke, “Ni kii ki li joo maah di ikaal i tuk nimi na, ki taa dii binib bi koo kitiŋ ngbaan ni na aah ŋani pu na ki cha baabimbin ngbaan bii nimi, ki ŋa nimi tijɔŋ. Min le ye Nidindaan Uwumbɔr.”