Liifai Yaab 17 - Uwumbɔr aagbaŋ

Nsin aabɔr

¹ Le Uwumbɔr bui Moses

² ke u di ikaal imina di tii Aaronn ni ujapɔtiib, ni Israel yaab mɔmɔk.

^3-4 Israel aanii umɔk kɔr unaa, bee upiih, bee uŋoob ki di toor kitork tii Uwumbɔr lipaal nibaa chee, kaa di buen Uwumbɔr Aabool aabisamɔb chee unimbiin ni na kan, u bii Uwumbɔr aakaal la. U nyan tiwan ni fu na aamɔfal yɔli; waan ki li ye Uwumbɔr aanib ponn ni ubaa.

⁵ Nkaal ngbaan aatataa le ye ke Israel yaab mɔmɔk li joo ni baawakor ti bi joo toor kitiŋ ponn ni yɔl yɔl na nan toor kitork tii Uwumbɔr. Bi li joo i ki nan di tii utotoor, Uwumbɔr Aabool aabisamɔb chee, aan u di toor kimɔbaan aapiin aatork.

⁶ Le utotoor ga di nsin mee kpir kpir kitork aabimbiln aapepel mɔmɔk, Libool aabisamɔb chee, ki di nkpan see mmii, aan ni nyan nnumɔɔn, ki li nu mɔ Uwumbɔr chee.

⁷ Israel aanib taa ki yii Uwumbɔr ki li kɔr baawakor tisar, ni ŋinampal, ki toor kitork tii kinimbɔŋ. Israel aanib mɔmɔk li joo nkaal ngbaan ki cha n‑yoonn mɔmɔk.

⁸ Israel aanii ubaa, bee biwɔwɔm bi koo ni chee na ubaa yaa toor kitork ki bi joo seer mmii ni na, bee u yaa toor kitork kibaa aaboln nibaa chee

⁹ ki tii Uwumbɔr, kaa di buen Waabool aabisamɔb chee kan, waan ki li ye Uwumbɔr aanib ponn ni ubaa.

¹⁰ Israel aanii ubaa, bee biwɔwɔm bi koo ni chee na ponn ni ubaa yaa ŋman tinann ti nsin beenin bi ti ponn ni na kan, Uwumbɔr ga daa utafal, udaan ngbaan aan ki li ye Uwumbɔr aanib ponn ni ubaa.

¹¹ Tiwanfuurkaan mɔmɔk aamɔfal bi nsin ni la, kina pu le Uwumbɔr siin nkaal ke ni nyan tiwakor aasin mɔmɔk ŋa kitork aabimbiln pu, aan mu nyan binib ngbaan aatunwanbir. Nsin, mu ye limɔfal na, le nyani titunwanbir.

¹² Nima pu le Uwumbɔr tuk Israel yaab ke bi ni biwɔwɔm bi koo bi chee na ubaa taa ŋmɔ tinann ti nsin beenin bi ti ponn ni na.

¹³ Israel aanii ubaa, bee biwɔwɔm bi koo ni chee na ubaa yaa buen kikpaŋ ki ku upeel, bee unyoon u ni ga ji u na kan, u kɔr u ki nyan nsin lii kitiŋ, ki di titan biin mu pu.

¹⁴ Ba pu? tiwanfuurkaan mɔmɔk aamɔfal bi nsin ni la, nima pu le Uwumbɔr bui Israel yaab ke bi taa ji tinann ti nsin bi ti ponn ni na, ke unii umɔk ŋa kina na, waan ki li ye Uwumbɔr aanib ponn ni ubaa.

¹⁵ Israel aanii, bee uwɔwɔnja umɔk jin kiwakork ki kpo kibaa pu, bee upeel yaa chuu kiwakork ki ki ŋman gur na kan, udaan finn waawanpeenkaan ki fu nnyun, ki li kii kijook wɔb aan ki nin ŋa chain.

¹⁶ U yaa yii kan, u ga kan ntafadaan.