Liifai Yaab 16 - Uwumbɔr aagbaŋ

Titunwanbir aatork aawiindaal

¹ Aaronn aajapɔtiib bilee na aah nan di mmii mu kaa bi chain, ki see tulalee aayon tii Uwumbɔr aan ki kpo na aapuwɔb,

² le Uwumbɔr len Moses chee ke, “Bui aakpel Aaronn ke u taa li koo Chain Chain Aapepel ni, nin chee likekeln gii Libool ngbaan ni na yɔl yɔl, see n‑yoonn mu u ga koo ni ponn ni na ti fuu, ba pu? nima chee le m bi ntaalangbam ni, Maakaal Aadakaa aabiil aapaacham. U yaa yii ki koo kan, u ga kpo.

³ N‑yoonn mu u ti joo ni unaajabo u nan toor titunwanbir aatork, ni upihja u u joo ni u nan toor kitork ki bi joo seer mmii ni na, le u ga ŋmaa koo nima chee.”

⁴ Uwumbɔr nan ki di baah ga li ŋani pu na tuk u. Waahr aan Aaronn koo Chain Chain Aapepel ni na, see u fu nnyun, ki di utotoor aawanpeenkaan peen: nima le ye ŋitanyaan aabɔkul ni lipeetugeln, ni ligbapapaln, ni kiyikpupuk.

⁵ Israel yaab mɔmɔk ga kpaan tii Aaronn iŋoja ilee u di toor titunwanbir aatork, ni upihja u di toor kitork ki bi joo seer mmii ni na aapiin aatork.

⁶ U di unaaja toor kitork ki nyan ubaa, ni waamaal aatunwanbir.

⁷ Le u ga di iŋoja ilee na buen Uwumbɔr aanimbiin ni, Waabool aabisamɔb chee.

⁸ U ban ŋitakpal ŋilee nima chee ki daan libaa pu ke, “Uwumbɔr yaan,” ki daan liken pu ke, “Titunwanbir aanyam aaŋoob,” ki too inaan.

⁹ Le Aaronn ga di uŋoob u ye Uwumbɔr yoo na, ki di toor titunwanbir aatork ki tii u.

¹⁰ Uŋoob u ye titunwanbir aanyam aaŋoob na, Aaronn ga di u tii Uwumbɔr, u fuub, aan bi di u buen kipɔɔk ni, ki ti di u lii, u li cha, le u ga di binib ngbaan aatunwanbir buen.

¹¹ N‑yoonn mu Aaronn di unaaja na toor titunwanbir aatork ki nyan ubaa, ni waamaal aatunwanbir na,

¹² u yoor mmii aasambil ki ban kitork aabimbiln pu mmiisakɔl, ki lee tulalee aayon mu nu mɔ na iŋaal ilee, aan ki li joo ni Chain Chain Aapepel ni.

¹³ Uwumbɔr aanimbiin ni, nima chee, u di tulalee aayon ngbaan paan mmii pu, lisambil ni, le iŋmanyuu ga fii biin Uwumbɔr Aakaal Aadakaa aabiil pu, nima kan, waan kan libiil ngbaan, ki kpo.

¹⁴ U ga di uŋanbik bɔ unaaja na aasin ni, ki di ngem yɔk yɔk libiil ngbaan aamɔb pu, ki di ngem yɔk yɔk Uwumbɔr Aakaal Aadakaa chee, nfum mulole.

¹⁵ U yaa ŋa kina doo kan, u kɔr uŋoja ki di toor binib ngbaan aatunwanbir aatork, ki li joo ni waasin Chain Chain Aapepel ni, aan ki nan di mu yɔk yɔk Uwumbɔr Aakaal Aadakaa chee, ni waabiil pu, ke waah di unaaja aasin ŋa pu na.

¹⁶ Kina le u ga toor ki ŋa Chain Chain Aapepel ni chain, ki nyan Israel yaab aah kaa bi chain pu na, ni baatunwanbir. U ŋa Libool ngbaan kina, ba pu? li si binib ngbaan aah ka pu na aakaasisik ni la, le baa bi chain.

¹⁷ N‑yoonn mu Aaronn koo Chain Chain Aapepel ni, u ti toor aan ki ŋa ni chain, ki ki nya ni na, unii ubaa taa li bi Libool ngbaan ni. N‑yoonn mu u toor ki ŋa ubaa, ni waamaal, ni binib ngbaan chain na,

¹⁸ u nyan buen kitork ki bi joo seer mmii ni na aabimbiln chee, ki ti ŋa li chain. U ban unaaja aasin ngem, ni uŋoja aasin ngem, ki di ŋa libimbiln ngbaan aamɔju aalɔlɔ ni.

¹⁹ U di uŋanbik bɔ nsin ngbaan ni, ki di ngem yɔk yɔk libimbiln ngbaan pu nfum mulole. Kina le u ga ŋa li, ki nyan li Israel yaab aatunwanbir ni, ki ŋa li chain.

Uŋoob u nyani baatunwanbir na aabɔr

²⁰ N‑yoonn mu Aaronn toor Chain Chain Aapepel, ni Uwumbɔr Aabool aapepel li gur na, ni kitork aabimbiln doo na, u di uŋoob u nyani baatunwanbir na, ki di siin Uwumbɔr aanimbiin ni.

²¹ U di uŋaal ilee paan uŋoob ngbaan aayil pu, ki kpiir Israel yaab aatunwanbir, ni baah yii Uwumbɔr aamɔb pu na mɔmɔk, ŋa uyil pu, ki nyan uja ubaa, u jenn uŋoob ngbaan buen kipɔɔk ni.

²² Le uŋoob ngbaan ga di baatunwanbir ti bi u pu na buen nin chee binib aa bi na.

²³ Nee aapuwɔb le Aaronn ga gir koo Libool na ponn ni, ki ti peer waatotoor aawanpeenkaan ni u ba pee ki di koo Chain Chain Aapepel ni na, ki di leen li ponn ni.

²⁴ U ban nnyun ki fu mu, chain aapepel ni, ki ki di ubaa aawanpeenkaan peen. U yaa ŋa kina doo kan, u nya ki ti toor kitork ki bi joo seer mmii ni na, ki nyan ubaa, ni Israel yaab mɔmɔk mu aatunwanbir.

²⁵ U di kiwakork ki u di toor titunwanbir aatork na aakpan see mmii, kitork aabimbiln paab.

²⁶ Uja u jenn uŋoob u nyan baatunwanbir na buen kipɔɔk ni na, finn waawanpeenkaan ki fu nnyun waahr aan ki nin kun linampal biken chee.

²⁷ Unaaja ni uŋoob ni bi di toor titunwanbir aatork na aasin mu bi joo ni Chain Chain Aapepel ni ke mu nyan titunwanbir na, bi di i nya lipaal nibaa chee ki ti see i mmii ni. Bi di igban, ni tinann, ni tineer mɔmɔk see mmii ni.

²⁸ Udaan u di ni see mmii ni na finn waawanpeenkaan ki fu nnyun waahr aan ki nin gir kun linampal biken chee.

Baah ga joo titunwanbir aatork aawiindaal pu na aabɔr

²⁹ Ni li dii ikaal imina ki cha n‑yoonn mu choo na mɔmɔk. Ŋmalole aawinpiik daal kan, Israel yaab, ni biwɔwɔm mɔmɔk bi koo bi chee na kpaan ki lul bumɔb, ki taa tun lituln libaa liyaadaal ngbaan.

³⁰ Liyaadaal kan, utotoor toor ki nyan binib ngbaan baatunwanbir mɔmɔk ni, ki ŋa bi chain.

³¹ Liyaadaal ngbaan ye chain chain aawiin la. Ni lul bumɔb liyaadaal ngbaan, ki taa tun lituln libaa. Ni li joo ikaal ngbaan ki cha n‑yoonn mɔmɔk.

³² Utotoorninkpel u bi di nkpan kpir uyil pu, ki kaan u mbamɔm, ke u nan gaa ute aajal na le ga toor kitork ki nyani titunwanbir na. U di utotoor aawanpeenkaan peen,

³³ aan ki toor Chain Chain Aapepel, ni Uwumbɔr Aabool aapepel li gur na, ni kitork aabimbiln, ni bitotoorb, ni binib ngbaan mɔmɔk ki ŋa ni mɔmɔk chain.

³⁴ Ni li joo ikaal ngbaan ki cha n‑yoonn mɔmɔk. Libiln ni kan, ni toor kitork ngbaan nfum mubaa, ki nyan Israel yaab mɔmɔk baatunwanbir ni, ki ŋa bi chain. Kina pu na, Moses nan ŋa Uwumbɔr aah tuk u pu na.