Liifai Yaab 15 - Uwumbɔr aagbaŋ

Tiwan ni ŋani unii tijɔŋdaan na aabɔr

¹ Uwumbɔr nan ki di ikaal imina tii Moses ni Aaronn

² ke bi di mɔk Israel yaab. N‑yoonn mu uja aachakpaln ni ti nyan tinar na kan, tinar ngbaan pu na, waa ki bi chain.

³ Ni yaa ye ke ti nya tibaa pu, bee ti yaa ŋeeb li kan, tima pu na, waa bi chain.

⁴ U yaa doon tiwandookaan ni pu na, bee u kal ni pu kan, tiwandookaan ngbaan aa ki bi chain.

⁵ Unii umɔk meeh tiwandookaan ngbaan,

⁶ bee u kal tiwan nimɔk pu uja ngbaan kal na kan, u finn waawanpeenkaan ki fu nnyun, kaan li bi chain ki ti saa kijook wɔb.

⁷ Sin umɔk meeh uja u tinar nya u ni na kan, finn saawanpeenkaan mɔmɔk, ki fu nnyun, le saan li bi chain ki ti saa kijook wɔb.

⁸ Uja u tinar nya u ni na yaa tii timɔɔtan lɔb sin u bi chain na kan, finn saawanpeenkaan ki fu nnyun, le saan li bi chain ki ti saa kijook wɔb.

⁹ Uja ngbaan yaa kal tiwankaakaan nimɔk pu na kan, naa ki bi chain.

¹⁰ Le unii umɔk meeh waah kal tiwan ni pu na kan, udaan aa ki bi chain ki ti saa kijook wɔb. Unii yaa tun waah kal tiwan ni pu na kan, u finn waawanpeenkaan ki fu nnyun mu, kaan li bi chain ki ti saa kijook wɔb.

¹¹ Uja ngbaan yaa kaa ŋir uŋaal ki meeh unii u na kan, udaan ngbaan finn waawanpeenkaan ki fu nnyun, le waan li bi chain ki ti saa kijook wɔb.

¹² Tiyakr aabuul limɔk uja ngbaan meeh na, ni gbaa wii li; le ni yaa ye idɔ aasambil kan, ni ŋir ŋi mɔmɔk.

¹³ Nee aapuwɔb na, waaween ngbaan yaa doo kan, u li bi ki ti saa iwiin ilole daal, aan ki nin finn waawanpeenkaan, ki fu nnyunbun aanyunpɔm, le u ga ŋa chain.

¹⁴ Winiin daal kan, u ban ŋinanjel ŋilee, bee ŋibɔrnanjel ŋilee, ki di buen Uwumbɔr Aabool aabisamɔb chee, ki ti di tii utotoor.

¹⁵ Utotoor ga di linanjel libaa toor titunwanbir aatork, ki di liken mu toor kitork ki bi joo seer mmii ni na. Kina le u ga toor ki ŋa udaan ngbaan chain.

¹⁶ N‑yoonn mu uja daŋ tidaŋ ki nyeen tijar gbaa ubaa na, u fu uwon mɔmɔk nnyun, ki mu aan ki li bi chain ki ti saa kijook wɔb.

¹⁷ Tijar ngbaan yaa lir likekeln, bee ngban pu kan, ni finn tiwan ngbaan, le naan li bi chain ki ti saa kijook wɔb.

¹⁸ Uja yaa doon upii chee doo kan, bi mɔmɔk fu nnyun, ki mu aan ki li bi chain ki ti saa kijook wɔb.

¹⁹ N‑yoonn mu upii kan mpiikpen na, waa ki bi chain ki ti saa iwiin ilole. Unii umɔk meeh u na kan, waa ki bi chain ki ti saa kijook wɔb.

²⁰ Tiwan nimɔk u kal, bee u doon ni pu, ki joo mpiikpen na, tiwan ngbaan aa ki bi chain.

^21-23 Unii umɔk meeh waawandookaan, bee tiwan nimɔk u kal ni pu na kan, u finn waawanpeenkaan, ki fu nnyun, udaan mu aan li bi chain ki ti saa kijook wɔb.

²⁴ Uja yaa doon upii ngbaan chee buyoonn u joo mpiikpen na kan, waah kaa bi chain pu na le cha uja mu ŋa tijɔŋ, le uja ngbaan mu aan li bi chain ki ti saa iwiin ilole, le waah doon tiwandookaan ni pu na mu aa bi chain.

²⁵ Upii aapiikpen yaa doo aan nsin beenin nya, ni mu aa ki ye mpiikpen pu, le nsin ngbaan nya kaa door kan, waa bi chain, le ni bi ke waah joo mpiikpen kan, waah kaa bi chain pu na la.

²⁶ N‑yoonn mu nsin ngbaan beenin nya na, tiwandookaan nimɔk u doon ni pu na, ni tiwan nimɔk u kal ni pu na, aa ki bi chain.

²⁷ Le unii umɔk meeh tiwan ngbaan na mu aa ki bi chain, see u finn waawanpeenkaan, ki fu nnyun, kaan li bi chain ki ti saa kijook wɔb.

²⁸ Nee aapuwɔb, nsin ngbaan yaa gii kaa ki nya kan, u li bi ki ti saa iwiin ilole daal le ki nin ŋa chain.

²⁹ Winiin daal kan, upii ngbaan ban ŋinanjel ŋilee, bee ŋibɔrnanjel ŋilee, ki di buen Uwumbɔr aanimbiin ni, Waabool aabisamɔb, utotoor chee.

³⁰ Le utotoor ga di libaa toor titunwanbir aatork, ki di liken mu toor kitork ki bi joo seer mmii ni na aatork. Kina le u ga toor ki ŋa upii ngbaan chain.

³¹ Uwumbɔr nan bui Moses ke u sur Israel yaab baah kaa bi chain pu na, nima kan, bi li nyi ki taa bii Waabool li u bi li ponn ni, ki si bikaasisik ni na, ke bi yaa bii li kan, u ga ku bi.

³² Ikaal imina le ye ki joo cha uja u tinar nya uchakpaln ni, bee u yaa nyeen tijar gbaa ubaa,

³³ bee upii u bi mpiikpen ni na, bee upii u joo mpiikpen aan uja doon u chee na aabɔr wɔb.