Liifai Yaab 14 - Uwumbɔr aagbaŋ

Tiwon aaween i bir na aatork

¹ Uwumbɔr nan di ikaal imina tii Moses

² ki joo cha tiwon aaween i bir na aah ti doo unii pu kan, baah ga toor pu ki ŋa u chain na. Nwiin mundaal bi ga toor ki ŋa u chain na, ni li joo ni u utotoor chee.

³ Le utotoor ga di u nya n‑gbaan ki di u buen nibaa chee ki ti lik u. Le iween ngbaan yaa doo u pu kan,

⁴ utotoor ga cha bi li joo ni ŋinanjel ŋilee ki kpee santina aadɔ, ni ŋŋmin maman, ni nkiisuk pu.

⁵ Le utotoor cha bi kɔr linanjel libaa, tiyakr aasambil li nnyunbun aanyunpɔm bi li ponn ni na aapaacham.

⁶ U ga di linanjel li gur baa kɔr na, ni santina aadɔ, ni ŋŋmin maman, ni nkiisuk, ki di bɔ baah kɔr linanjel li na aasin ni,

⁷ ki di mu yɔk yɔk uweendaan ngbaan pu nfum mulole, ki bui ke u ŋa chain a. Linanjel li gur waa kɔr li na, utotoor di li lii aan li fii buen.

⁸ Le udaan ngbaan finn waawanpeenkaan, ki kuu waakor mɔmɔk aan ki fu nnyun; le kitork ngbaan ga ŋa u chain. U yaa kun linampal kan, u taa koo waadichal ni, u li bi lipaal ki tii saa iwiin ilole.

⁹ Winlole daal kan, u ki gir kuu uyikpir, ni ulangbaln, ni tinimbikee, ni tikor timɔk bi uwon pu na; u ki finn waawanpeenkaan mɔmɔk ki fu nnyun le ki nin ŋa chain.

¹⁰ Winiin daal kan, u li joo ni ipihjabi ilee, ni upihsal, timɔk li ye libiln libaa aawakor ti ŋan na, ni boroboro aayon mu olif aakpan ŋmal mu ponn ni na kuruwaa bitaa, ni olif aakpan likpalbageln.

¹¹ Le utotoor ga di uweendaan ngbaan, ni tiwan nimina mɔmɔk buen Uwumbɔr aanimbiin ni, Waabool aabisamɔb chee.

¹² Utotoor nyan upihjabo ubaa ki kpee nkpan pu, ki di toor kitork aan ni li ye lipɔln aapam aatork. U di ni toor, ni li ye ipiinkpaan tii Uwumbɔr aan utotoor li yeh tiwan ngbaan.

¹³ U kɔr upiih ngbaan chain aapepel, nin chee bi joo tiwakor toor titunwanbir aatork na, ni kitork ki bi joo seer mmii ni na wɔb. U ŋa kina, ba pu? lipɔln aatork ye utotoor yaan ki bi chain, ke titunwanbir aatork na.

¹⁴ Utotoor ban upihbo ngbaan aasin ki di ŋa uweendaan ngbaan aaŋangii aatafalan ni, ni uŋangii aaŋanbijak pu, ni utaagiil aataŋanbijak pu.

¹⁵ Utotoor ban olif aakpan ngem ŋa uŋangan aaŋaapɔtan ni,

¹⁶ ki di uŋangii aaŋanbik bɔ mu ni, ki di yɔk yɔk Uwumbɔr aanimbiin ni, nima chee, nfum mulole.

¹⁷ U ga ki ban nkpan ngem mu bi uŋaapɔtan ni na, ni upihbo ngbaan aasin, ki di ŋa baah bi toor unii u bi ŋa u chain na aaŋangii aatafalan ni, ni uŋangii aaŋanbijak pu, ni utaagiil aataŋanbijak pu.

¹⁸ Nkpan mu gur uŋaapɔtan ni na, u di kpir uja ngbaan aayil pu. U yaa ŋa kina kan, u toor ki ŋa udaan ngbaan chain le na.

¹⁹ Le utotoor ga ki toor titunwanbir aachapinn aatork mu ki ŋa udaan chain. Nee aapuwɔb, le u ga kɔr kiwakork, ki toor kitork ki bi joo seer mmii ni na,

²⁰ ki di tijikaar aatork kpee, ki ŋa ni kitork aabimbiln pu. Kina le utotoor ga toor ki ŋa u chain, le udaan ngbaan ga ŋa chain.

²¹ Unii ngbaan yaa ye ugiin le kaan ŋmaa tii naah ye pu na kan, u li joo ni upihjabo ubaa ki nan toor lipɔln aatork aan bi di toor ki ŋa u chain, i ye ipiinkpaan le ki tii Uwumbɔr, le utotoor le yeh tiwan ngbaan. U ki li joo ni boroboro aayon kuruwaa ubaa, ki di olif aakpan ŋmal mu ni, ki nan di tii tijikaar aapiin aatork, ki kpee olif aakpan likpalbageln.

²² U ki li joo ni ŋinanjel ŋilee, bee ŋibɔrnanjel ŋilee. U di libaa toor titunwanbir aatork, ki di liken toor kitork ki bi joo seer mmii ni na aatork.

²³ Winiin daal aan bi ga toor ki ŋa u chain na, u li joo ni tiwan ngbaan utotoor chee, Uwumbɔr Aabool aabisamɔb chee.

²⁴ Utotoor ga di upihjabo ni olif aakpan, ni ye ipiinkpaan na, ki di tii Uwumbɔr; utotoor yeh tiwan ngbaan.

²⁵ U ga kɔr upihjabo ngbaan, le ki di waasin ngem ki ŋa unii ngbaan aaŋangii aatafalan pu, ni uŋangii aaŋanbijak pu, ni utaagiil aataŋanbijak pu.

²⁶ Le utotoor ga bar nkpan ngem ki di ŋa uŋangan aaŋaapɔtan ni,

²⁷ aan ki di uŋangii aaŋanbik bɔ mu ni, ki di yɔk yɔk Uwumbɔr aanimbiin ni, nima chee, nfum mulole.

²⁸ U ki di nkpan mu ŋa unii ngbaan nin chee u ba di nsin ŋa na, unii ngbaan aaŋangii aatafalan pu, ni uŋangii aaŋanbijak pu, ni utaagiil aataŋanbijak pu.

²⁹ Nkpan mu gur uŋaapɔtan ni na, u di kpir unii ngbaan aayil pu, le ki toor chain aatork.

³⁰ Le u nin di linanjel libaa, bee libɔrnanjel libaa

³¹ toor titunwanbir aatork, ki di liken toor kitork ki bi joo seer mmii ni na, ki kpee njikaabim aapiin aatork pu. Kina le utotoor ga ŋa ki toor kitork ki ŋa udaan ngbaan chain.

³² Nkaal mu uweendaan u ye ugiin aan iween ngbaan doo u pu, u ban ke u toor ki ŋa ubaa chain na, le na.

Lidichal ni aapɔpɔl aabɔr

³³ Uwumbɔr nan ki len Moses ni Aaronn chee tibɔr timina:

³⁴ Ni yaa ti koo Kanaann aatiŋ ki m ban m di tii nimi ki li ye nimi yaan na kan, lipɔpɔl yaa ŋa unii aadichal ni kan,

³⁵ u buen utotoor chee ki ti bui u lipɔpɔl ngbaan aabɔr.

³⁶ Le utotoor cha bi nyan tiwan nimɔk bi lidichal ngbaan ni na aan u nin koo ki ti lik lipɔpɔl ngbaan; ni yaa kaa ye kina kan, tiwan ngbaan mɔmɔk aan ki li bi chain. Le u ga koo lidichal ngbaan ni

³⁷ ki ti lik lipɔpɔl ngbaan. U yaa kan ke lipɔpɔl ngbaan ŋa tiwan ni wuun ki bi ke liŋaankal, bee nimamann na, ki baa ligoln pu kan,

³⁸ u nyan lidichal ngbaan ni, ki laŋ li, ki ti saa iwiin ilole.

³⁹ Winlole daal kan, u ki gir ti lik. U yaa kan ke lipɔpɔl ngbaan kpee kan,

⁴⁰ u cha bi nyan ŋifakuu ŋi pu lipɔpɔl ngbaan baa na, ki nyan ŋi kitiŋ aagbaan, ki di ŋi mee nin chee aa bi chain na.

⁴¹ Nee aapuwɔb, u cha bi pɔkr nyan titan mɔmɔk, ponn ni aagon pu, ki di titan ngbaan nya kitiŋ ni, ki di ti mee nin chee aa bi chain na.

⁴² Le bi ki ban ŋifakuu yayan ki di saŋ ŋimana aabuul ni, ki pɔ ponn ni, ni mɔmɔk.

⁴³ Bi yaa nyan ŋifakuu ki pɔkr lidichal ngbaan ponn ni kina, ki ki gir pɔn aan lipɔpɔl ngbaan ki gir ŋa kan,

⁴⁴ utotoor ki gir koo li ponn ni ki ti lik; lipɔpɔl yaa ki nyan kan, lidichal ngbaan aa ki bi chain.

⁴⁵ U cha bi gbaa wii lidichal ngbaan, ki faa laafakuu, ni idɔ, ni titan timɔk bi di pɔn na, ki nyan ni mɔmɔk kitiŋ aagbaan, ki di buen ti mee nin chee aa bi chain na.

⁴⁶ N‑yoonn mu bi laŋ lidichal ngbaan aan unii koo li ponn ni na, waa ki bi chain le ki ti saa kijook wɔb.

⁴⁷ Unii umɔk doon, bee u jin tijikaar lidichal ngbaan ni na, u finn waawanpeenkaan mɔmɔk.

⁴⁸ N‑yoonn mu bi pɔkr ponn ni aagoln ngbaan ki gir pɔn na, nee aapuwɔb, utotoor yaa koo u ti lik, ki kan ke lipɔpɔl aa ki gir nyan kan, u len ke lidichal ngbaan ŋa chain a, ba pu? lipɔpɔl ngbaan aa ki bi, baah pɔkr titan na, bi nyan lipɔpɔl doo a.

⁴⁹ U yaa ban u toor ki ŋa lidichal ngbaan chain kan, u ban ŋinanjel ŋilee, ni santina aadɔ, ni ŋŋmiman, ni nkiisuk.

⁵⁰ U ga kɔr linanjel ngbaan libaa, tiyakr aasambil li bi di nnyunbun aanyupɔm ŋa li ponn ni na aapaacham,

⁵¹ le ki di santina aadɔ, ni nkiisuk, ni ŋŋmiman na, ki kpee linanjel li gur baa kɔr na bɔ waah ba ku linanjel li na aasin, ni nnyunpɔm na ponn ni, aan ki di yɔk yɔk lidichal ngbaan ni, nfum mulole.

⁵² Kina le u ga di linanjel ngbaan aasin, ni nnyunpɔm, ni linanjel li fu na, ni santina aadɔ, ni nkiisuk na, ni ŋŋmiman na, ŋa lidichal ngbaan chain.

⁵³ Le u cha linanjel li fu na fii nya kitiŋ ni ki buen timoor ni. U ga ŋa kina le ki toor lidichal ngbaan chain, le li ŋa chain.

⁵⁴ Ikaal i m di tii nimi ki joo cha tiwon aaween i bir na,

^55-56 ni ibuun, ni ŋichakpelar, ni tiwanduunkaan, ni lipɔpɔl li ŋani ŋikeken bee ŋidichal ni na, le na.

⁵⁷ Ikaal ngbaan le mɔk tiwan ni ye chain, ni ni kaa ye chain na.