Liifai Yaab 13 - Uwumbɔr aagbaŋ

Tiwon aaween aakaal

¹ Uwumbɔr nan ki di ikaal imina di tii Moses ni Aaronn.

² Ni ponn ni ubaa yaa kpa mbuun uwon pu, bee lichakpelar, bee nibaa chee yaa puun ki ga ŋa tiwon aaween i bir na kan, ni li joo ni u utotoor Aaronn, bee waamaal ponn ni ubaa chee.

³ Le utotoor ga lik iween ngbaan, le nima chee aakor yaa piir aan libuul ngbaan nyoo kan, ni ye tiwon aaween i bir na la, le utotoor ga len ke waa bi chain.

⁴ Tɔ, nima chee yaa piir kaa nyoo aan tikor mu aa piir kan, utotoor nyan u ki di u ŋa nibaa chee ki ti saa iwiin ilole.

⁵ Winlole daal kan, utotoor ki ŋaŋ u ki lik, iween ngbaan yaa beenin bi kina, kaa kpee kan, utotoor ki kpee u iwiin ilole.

⁶ Utotoor ki gir lik u winlole daal ngbaan, u yaa kan ke iween ngbaan bi door, kaa kpee kan, u ga len ke u ye chain, ni ye tilalab la, u finn waawanpeenkaan ki ŋa chain.

⁷ Ni yaa ye ke utotoor aah ŋaŋ u doo, ki len ke u bi chain na aapuwɔb le iween ngbaan yaa ki pɔr kpee kan, u ki gir ni utotoor chee.

⁸ Le utotoor ga ki gir lik u, le u yaa kan ke i sil pɔr kpee kan, u ga len ke waa ki bi chain; le ni mɔk ke ni ye tiwon aaween i bir na la.

⁹ Ni ponn ni ubaa yaa kpa tiwon aaween i bir na kan, ni li joo ni u utotoor chee,

¹⁰ le u ga lik u. Uwon nibaa chee yaa duun aan nima chee aakor piir ki kpa tinar kan,

¹¹ ni ye tiwon aaween i bir na la. Utotoor ga len ke udaan aa bi chain, ni taa ki nyan u, u ti li bi nibaa chee ke ni lik u waahr; ni ye le ke udaan ngbaan aa bi chain.

¹² Ni yaa ye ke iween ngbaan pɔr ki yaa gaa uwon mɔmɔk ki nyan uyil ki ti saa utaa kan,

¹³ utotoor ki gir lik u. U yaa kan ke iween ngbaan yaa gaa uwon mɔmɔk pu kan, u len ke u bi chain. Uwon mɔmɔk yaa kpar piir kan, u bi chain le na.

¹⁴ N‑yoonn mu mbuun ŋa uwon pu na, waa ki bi chain.

¹⁵ Utotoor yaa ki gir lik u, ki kan mbuun u pu kan, u len ke waa bi chain. Mbuun ngbaan mɔk ke ni ye tiwon aaween i bir na la, le mu cha udaan ngbaan aa ki bi chain.

¹⁶ Mbuun ngbaan yaa yann ki ki piir kan, u ga ki gir buen utotoor chee,

¹⁷ aan u ki gir lik u. Le ni yaa ye ke mu yann ki piir kan, u ki ŋa chain le na, le utotoor ga len ke u bi chain.

¹⁸ Unii yaa kpa lichakpelar aan li foor kan,

¹⁹ kina aapuwɔb na, ni yaa ki gir duun ki piin, bee ki man kan, udaan ngbaan ki buen utotoor chee.

²⁰ Le utotoor ga lik u, u yaa kan ke ni ŋa mbuun ki nyoo, le nima chee aakor yaa piir kan, u len ke waa bi chain. Ni ye tiwon aaween i bir na, le ki pue ŋa ke lichakpelar na.

²¹ Utotoor mu yaa ŋaŋ u aan ki kan ke nima chee aakor aa piir, li mu aa nyoo, kaa man sakpen kan, utotoor nyan u ŋa nibaa chee, u li bi ki ti saa iwiin ilole.

²² Ni yaa moo pɔr kpee kan, utotoor len ke waa bi chain le ki kpa tiwon aaween i bir na.

²³ Ni yaa kaa moo pɔr kpee le ki yann cha kibuweek kan, utotoor ngbaan len ke u bi chain.

²⁴ Tiwantonn le yaa see unii, le mbuun ngbaan yaa piir, bee mu ponn ni man chaun kan,

²⁵ utotoor ŋaŋ u. Mbuun ngbaan yaa nyoo, le nima chee aakor yaa piir kan, ni ye tiwon aaween i bir na le koo mu ponn ni, le utotoor ga len ke udaan ngbaan aa bi chain.

²⁶ Mu yaa kaa nyoo, kaa man sakpen, le nima chee aakor aa piir kan, utotoor nyan u ŋa nibaa chee, u li bi ki ti saa iwiin ilole.

²⁷ Le utotoor ga ki gir lik u winlole daal, mu yaa moo pɔr kpee kan, ni ye tiwon aaween i bir na la; utotoor ga len ke udaan ngbaan aa bi chain.

²⁸ Ni yaa kaa pɔr kpee, aan naah man pu na mu yaa kaa kpee kan, naa ye tiwon aaween i bir na. Utotoor ga len ke u bi chain, ba pu? ni ye tiwantonn aah nan see u pu na aabuweek la.

²⁹ Ni ponn ni, uja, bee upii yaa kpa mbuun uyil, bee ulangbachuun pu kan,

³⁰ ni cha utotoor lik mu. Mu yaa nyoo aan mu ponn ni aakor yaa bi ke nkonyon na, kaa wiir kan, ni ye tiwon aaween i bir na la, le utotoor bui ke waa bi chain.

³¹ Tɔ, n‑yoonn mu utotoor lik u, aan mbuun ngbaan aa nyoo, le nima chee aakor aa ŋan na kan, ni nyan udaan, u li bi nibaa chee ki ti saa iwiin ilole.

³² Le winlole daal kan, utotoor ki gir lik mbuun ngbaan, le mu yaa kaa ki pɔr kpee, kaa kpa tikor ti bi ke nkonyon na, ki mu aa ki nyoo kan,

³³ udaan ngbaan kuu tikor ti mann goln mbuun chee na. Le utotoor ga ki gir cha u li bi waah nan koo nin chee na ki ki saa iwiin ilole.

³⁴ Winlole daal kan, utotoor ki gir lik u, mbuun ngbaan yaa kaa pɔr kpee, kaa ki nyoo kan, utotoor len ke u ŋa chain a. Le udaan ga finn waawanpeenkaan aan ki ŋa chain.

³⁵ Tɔ, utotoor yaa len ke u bi chain, aan nee aapuwɔb, mbuun ngbaan ki pɔr kan,

³⁶ utotoor ki gir lik u. Mu yaa pɔr kan, utotoor taa ki lik ke mu aakor ŋan aan mu aa ŋan; ni ye le ke udaan ngbaan aa bi chain.

³⁷ Utotoor yaa lik ki dakl ke mbuun ngbaan aa ki pɔr, le tikopɔnn piin ki pa libuul ni kan, mbuun yann le na, utotoor len ke u ŋa chain a.

³⁸ Uja bee upii yaa kpa uwon nibaa chee ni piin kan,

³⁹ ni cha utotoor lik u. Nima chee yaa kaa piin sakpen kan, ni ye tiwan ni kaa bir na le nyan nima chee, udaan ngbaan bi chain.

^40-41 Uja aayikpir yaa gui ugbangbataab bee uyigbeer kan, nima aan cha u ŋa tijɔŋdaan.

⁴² Ni yaa ye ke mbuun mu man chaun na bi uyil nin chee gui na kan, ni ye tiwon aaween i bir na la.

⁴³ Utotoor lik u, aan ki yaa kan ke ni man ki piin ki ye mbuun kan,

⁴⁴ utotoor len ke waa bi chain, ba pu? ni ye tiwon aaween i bir na la, le ki bi uyil pu.

⁴⁵ Unii u kpa tiwon aaween i bir na li peeni tikekekpir, ki taa chaa uyikpir, ki di likekeln biin umɔb wɔb, aan ki li tar mpɔɔn pu ke, “Maah bi chain, maah bi chain.”

⁴⁶ Kikɔŋ ngbaan yaa bi u pu ki ti saa buyoonn na kan, waa bi chain, le ni cha u nya linampal biken chee, ki ti li bi ubaa.

Lipɔpɔl aabɔr

^47-48 Tiwanpeenkaan, bee likekeln aawan ni bi di tiwakor aakor, bee tikokonn luu ni, bee ngban aawanpeenkaan ni bi di ngban ŋa ni na, yaa ŋa lipɔpɔl,

⁴⁹ li yaa ye liŋaankal bee limamaln kan, ni di tiwan ngbaan mɔk utotoor, ba pu? ni ye tiwan ni ga pɔr na la.

⁵⁰ Le utotoor ga lik tiwan ngbaan mbamɔm, ki di ni bil nibaa chee ki ti saa iwiin ilole.

⁵¹ Winlole daal kan, u ki gir lik ni, le lipɔpɔl ngbaan yaa moo kpee kan, tiwan ngbaan aa bi chain.

⁵² Utotoor di ni see mmii ni, ba pu? lipɔpɔl ngbaan ga pɔr, le ni ŋan ke bi di ni see mmii ni.

⁵³ Tɔ, u yaa lik tiwan ngbaan, aan lipɔpɔl aa ŋa ni pu kpee kan,

⁵⁴ utotoor cha bi finn ni, aan u ki di ni bil ki ti saa iwiin ilole.

⁵⁵ U yaa ti ki lik ni, aan lipɔpɔl ngbaan yaa kaa kpeln naabimbin, ki mu aa ŋa kpee kan, tiwan ngbaan aa nin bi chain, ni yaa ye ke lipɔpɔl ngbaan piin kinyaan wɔb bee tibir wɔb kan, ni see ni mmii.

⁵⁶ Tɔ, ni yaa ye ke n‑yoonn mu bi finn ni na, le utotoor ki gir lik ni, aan ni wuur kan, u chuu nin chee lipɔpɔl ngbaan baan na, ki kar nyan ni tiwan ngbaan pu.

⁵⁷ Lipɔpɔl yaa ki gir nyan ni pu kan, ni bi pɔr kpei la, uwandaan see ni mmii ni.

⁵⁸ Tɔ, u yaa finn tiwan ngbaan, aan lipɔpɔl wuur ki nyan doo kan, u ki gir finn ni lelee, le ni ga ki ŋa chain.

⁵⁹ Nima pu na, lipɔpɔl yaa baan tiwanpeenkaan, bee likekeln aawan ni bi di tiwakor aakor, bee tikokonn luu ni na, bee ngban aawan ni bi di ngban ŋa ni na, nkaal mue le ni ga dii ki toor ni.