Liifai Yaab 12 - Uwumbɔr aagbaŋ

Umarpɔɔn aatork

¹ Uwumbɔr nan ki len Moses chee

² ke u bui Israel yaab tibɔr timina: Upii yaa ma ubijabo ki bi ki ti saa iwiin ilole kan, waa bi chain, le ni bi ke waah fuu mpiikpen le na.

³ Winiin daal kan, ni gii ubo ngbaan aachakpaln.

⁴ Nsin aah nyan upii ngbaan ni pu na, see u bi ki ti saa iwiin piitaa ni itaa, le ki nin ŋa chain. N‑yoonn ngbaan kan, u taa meeh tiwan ni bi chain na, ki mu taa koo Uwumbɔr Aabool ponn ni ki ti saa bundaal u ga ŋa chain na.

⁵ Upii yaa ma upiibo ki bi ki ti saa iwiin kipiik ni inaa daal kan, waa bi chain, le ni bi ke waah fuu mpiikpen le na. Nsin aah nyan upii ngbaan ni pu na, see u ki bi ki ti saa iwiin imonko itaa ni iloob kpee, le ki nin ŋa chain.

⁶ Iwiin ngbaan aapuwɔb na, ubo yaa ye ubijabo, bee upiibo kan, upii ngbaan li joo ni libiln libaa aapihbo utotoor chee, Uwumbɔr Aabool aabisamɔb chee, aan ki nan tii Uwumbɔr kitork ki bi joo seer mmii ni na aapiin, ki ki li joo ni libɔrnanjel, bee linanjel, ki nan toor titunwanbir aatork.

⁷ Le utotoor na ga di waapiin ngbaan tii Uwumbɔr, ki toor kitork aan ki nyan u tijɔŋ ni, ki ŋa u chain. Upii yaa ma kan, kina le u ga ŋa.

⁸ Upii yaa kaa kpa upihbo u toor kan, u li joo ni ŋibɔrnanjel ŋilee, bee ŋinanjel ŋilee, ki di libaa toor kitork ki di see mmii ni, ki di liken mu toor titunwanbir aatork. Utotoor ga toor ki nyan u tijɔŋ ni, aan u ŋa chain.