Liifai Yaab 11 - Uwumbɔr aagbaŋ

Tijikaar ti kɔ na ni ti kaa kɔ na aabɔr

¹ Uwumbɔr nan len Moses ni Aaronn chee tibɔr timina

² ke bi di tuk Israel yaab, “Tiwakor ni ipeel i ni ga ŋmaa ji i na sɔ:

³ Tiwan ni aataabuseen yakr, aan ni ŋmɔ timoor ki biir ki ki ŋmɔ na.

^4-6 Ni mu taa ŋmɔ laakumii, ni timoor ni aawan ni bi ke sandee na, ni sandee. Ni ŋmɔ timoor la, le nitaabuseen mu aa yakr, ni ye tiwan ni kɔ ni chee na la.

⁷ Ni taa li ŋmɔ igbeer. Ni li kɔ i; yaataabuseen yakr le i ŋmɔ timoor ki mu aa biir ti ki ki ŋmɔ.

⁸ Ni taa ji ipeel ni tiwakor ngbaan, ki taa meeh ti kpo na mu, ni li kɔ ti.

⁹ “Ijan i kpa tigbar ni tipɔkr na, ni ga ŋmaa ji i.

¹⁰ Tiwan ni bi nnyun ni kaa kpa tigbar ni tikpɔkr na, ni taa ji ni.

¹¹ Tiwan ngbaan aaboln kɔ. Ni taa ji ni, ki mu taa meeh ni kpo na.

¹² Tiwan ni bi nnyun ni kaa kpa tigbar ni tipɔkr na, ni taa ji ni.

^13-19 “Ni taa ji inyoon imina: Ŋikaagii, ni ifiin, ni kaasaa tiib, ni titakpatoor, ni kaaŋaaŋaa tiib, ni nangba tiib, ni ŋikakaa, ni taataa tiib, ni inyumuil, ni ineepɔɔn, ni inaakpaapiin, ni imɔɔkaa, ni ŋibaa, ni tinanjenn.

²⁰ “Tiwayukaan nimɔk kpa ifeen na kɔ,

²¹ see ni yukr kaa fii na le aa kɔ.

²² Ni ga ŋmaa ji itoon, ni ipaan, ni inaakan.

²³ Tɔ, tiwayukaan ni ye niwaatiir ki kpa ifeen ki baar na kɔ.

^24-28 “Unii umɔk meeh tiwakor ni ipeel nimina aawankpol na aa ki bi chain kina le ki ti saa kijook wɔb: Tiwakor ni ipeel ni kpa ŋitaa ŋinaa ni tinyanyar na, ni tiwakor ni ipeel nimɔk kpa itaabuseen na, see naataabuseen yakr aan ni ŋmɔ timoor ki biir ki ki ŋmɔ na le aa kɔ. Unii umɔk tun tiwakor bee ipeel ni kɔ na aanann na finn waawanpeenkaan; u mu aan li bi chain ki ti saa kijook wɔb.

^29-30 “Tiwan ni mu kɔ na le ye ŋinaasɔn, ni ŋisayik, ni ilapol, ni itakpaja.

³¹ Unii umɔk meeh ni, bee naawankpol na, aa ki bi chain kina ki ti saa kijook wɔb.

³² Le naawankpol yaa lir tiwan nimɔk pu na kan, naa ki bi chain. Tiwan ngbaan yaa ye idɔ, bee tiwanpeenkaan, bee igban, bee bɔtɔ, bee bi yaa joo tiwan nimina ŋani lituln li na kan, naa ki bi chain, bi di nnyun mu bi chain na ki finn ni, le naan li bi chain ki ti saa kijook wɔb.

³³ Le naawankpol yaa lir libuul ni kan, tiwan nimɔk bi li ponn ni na aa ki bi chain; ni gbaa wii libuul ngbaan.

³⁴ Nnyun mu bi libuul ngbaan ni na yaa kpir ki meeh tijikaar ti ni ga ŋmaa ji ti na kan, taa ki bi chain, le tiwanyukaan ni bi libuul ngbaan ni na mu aa bi chain.

³⁵ Tiwan nimɔk pu naawankpol lir ni pu na aa ki bi chain, ni yaa ye tiyakr aafan, bee boroboro aadiik kan, see ni gbaa wii ni.

³⁶ Tɔ, ni yaa ye nnyunbun, bee nin chee bi maa ki di nnyun ŋa ni ponn ni na kan, nima aa bii, tiwan niken ma yaa meeh naawankpol ngbaan kan, naa ki bi chain.

³⁷ Ni ponn ni nibaa yaa lir njikaabim mu bi ban bi di bu na pu kan, nwanbim ngbaan aa bii.

³⁸ Ni mu yaa di nwanbim ngbaan pɔɔn nnyun ni, le ni lir ni ponn ni kan, nwanbim ngbaan aa ki bi chain.

³⁹ “Tiwakor ti ni ga ŋmaa ji ti na yaa kpo aan ni meeh ti kan, naan li bi chain ki ti saa kijook wɔb.

⁴⁰ Unii umɔk ŋman tinann ngbaan na, see u finn waawanpeenkaan, kaan li bi chain ki ti saa kijook wɔb. Unii umɔk tun tinann ngbaan na mu finn waawanpeenkaan, kaan li bi chain ki ti saa kijook wɔb.

⁴¹ “Ni taa ji ipeel waatiir i chuun na.

⁴² I yaa baar, bee i yaa chuun ŋitaa ŋinaa pu, bee i yaa kpa ŋitaa ŋi wiir na kan, ni taa ji i.

⁴³ Ni taa ji i aan ki bii nibaa man.

⁴⁴ Min le ye Nidindaan Uwumbɔr, le ni ŋan ke ni li joo nibaa chain, ba pu? m bi chain la.

⁴⁵ Min le ye Uwumbɔr u nyan ni nimi Ijipt aatiŋ ni ke m li ye nimi Aawumbɔr na. Ni li bi chain, ba pu? m bi chain la.

⁴⁶ “Nkaal mue le m tii nimi ki joo cha ipeel, ni inyoon, ni tiwan ni bi nnyun ponn ni na, ni tiwan nimɔk chuun na wɔb.

⁴⁷ Ni pɔɔn nibaa ki gann aan ki bee tiwan ni bi chain na, ni ni kaa bi chain na, nima kan, ni ga ŋmaa bee tiwakor ti kɔ na, ni ti kaa kɔ na.”