Liifai Yaab 1 - Uwumbɔr aagbaŋ

Kitork ki bi joo seer mmii ni na aabɔr

¹ Uwumbɔr nan yin Moses, uma Uwumbɔr Aabool ponn ni, le ki tuk u tibɔr timina.

² Israel yaab yaa ban bi toor kitork kan, baah ga ŋa pu na sɔ: N‑yoonn mu unii ubaa yaa ti ban u di kiwakork toor kitork na kan, u cha ni li ye waanaa, bee waapiih, bee waaŋoob ponn ni nibaa.

³ Ni yaa ye waanaa ponn ni le u ban u di toor ki see mmii ni kan, u nyan unaaja u ŋan na. U di kitork ngbaan buen Uwumbɔr Aabool aabisamɔb, nima kan, uma Uwumbɔr ga gaa waatork ngbaan.

⁴ Udaan ngbaan ga di uŋaal paan unaaja ngbaan aayil pu, le Uwumbɔr ga gaa waatork ngbaan ki di cha pinn waatunwanbir.

⁵ U ga ku unaaja ngbaan nima chee, le Aaronn aamaal bi ye bitotoorb na ga di waasin tii Uwumbɔr, ki di mu yɔk yɔk kitork aabimbiln li si Libool ngbaan aabisamɔb chee na aapepel mɔmɔk ŋinaa pu.

⁶ Le u su kiwakork ngbaan ki geei kaanann.

⁷ Le bitotoorb ga toor idɔ paan libimbiln pu ki see i mmii.

⁸ Bi di baah geei kiwakork ngbaan aanann ti na, ki kpee liyil, ni nkpan, ŋa mmii ngbaan ni.

⁹ Uja ngbaan finn ponn ni aawan ni ŋitaajal, le utotoor u toor kitork na ga see kitork ngbaan mɔmɔk mmii, libimbiln paab. Tijikaar aapiin kina aaboln nu mɔ Uwumbɔr chee.

¹⁰ Ni yaa ye waapiih, bee waaŋoob ponn ni le u ban u di ubaa toor kan, u nyan kijak ki li ŋan.

¹¹ U ku ki libimbiln paab, ŋŋangan wɔb, le bitotoorb ga di kaasin yɔk yɔk kitork aabimbiln paab, ŋipepel mɔmɔk ŋinaa pu.

¹² Nee aapuwɔb na, uja ngbaan yaa geei kaanann doo kan, le utotoor u toor kitork na ga di tinann ngbaan, ni liyil, ni nkpan, ŋa mmii ni.

¹³ Uja ngbaan finn ponn ni aawan, ni ŋitaajal, le utotoor ga di kitork ngbaan tii Uwumbɔr, ki see ti mɔmɔk libimbiln paab mmii ni. Tijikaar aapiin kina aaboln nu mɔ Uwumbɔr chee.

¹⁴ Ni yaa ye waawan ni kpa ifeen na ponn ni le u ban u di toor kan, u nyan linanjel, bee libɔrnanjel.

¹⁵ Le utotoor ga di li buen kitork aabimbiln pu, ki mur gii liyil aan ki di see mmii ni, libimbiln pu. Bi cha laasin tuu nyan liwon ponn ni ki gbaa libimbiln aagbaan.

¹⁶ U chuu chee nyan kifileek, ni tijikaar ti bi ki ponn ni na di mee yaa kitork aabimbiln chee, nin chee nfatan dɔ na, liwipuul wɔb.

¹⁷ U chuu wɔk li, ki taa nyan ŋipue, aan ki di see mmii ni, libimbiln paab. Tijikaar aapiin aatork kina aaboln nu mɔ Uwumbɔr chee.