Josua 9 - Uwumbɔr aagbaŋ

Gibeonn yaab aah nan ŋmann Josua pu na

¹ Jɔɔdann aamɔɔl aawilir wɔb aabɔrb mɔmɔk nan ŋun Israel yaab aah nyaŋni baadim pu na. Bibɔrb bi nan ka ŋigongon pu, ni ŋigongon aataab, ni bi ka kpak Kaasisik ni Aanyusakpem, ki ti saa ŋŋangan wɔb, Lebanonn aatiŋ ni na; bibɔrb ngbaan nan ye Hef yaab, ni Amor yaab, ni Kanaann yaab, ni Peris yaab, ni Hif yaab, ni Jebus yaab aabɔrb la.

² Le bi ŋa kimɔbaan ke bi kpaan ki to Josua ni Israel yaab butɔb.

³ Tɔ, Gibeonn yaab, bi nan ye Hif aanibol na nan ŋun Josua aah nan ŋa Jeriko aatiŋ, ni Ai aatiŋ yaab pu na,

⁴ le bi dakl baah ga ŋmann Josua pu na. Bi ban tijikaar ki di tun baabon, ki joo bɔtɔchar, ni ndaan aaloor char,

⁵ le ki di tiwanchar peen, ki taŋ ŋinaatak ŋi keei aan bi tur ŋi na. Baah nan joo boroboro u na nan kuur ki wuun a.

⁶ Le bi buen Gilgal aatiŋ ni, Josua ni Israel aajab chee, le ki ti bui bi ke, “Ti nyan ni nin chee daa na la. Ti ban ke ti ni nimi ŋa kimɔbaan la.”

⁷ Tɔ, Israel yaab nan bui bi ke, “Ba ŋa aan ni ban ke ti ŋa kimɔbaan? Nibaakan, nido aa daa do.”

⁸ Le bi bui Josua ke, “Ti ban ti ŋa nimi aatutum la.” Le Josua baa bi ke, “Ni ye lilanibol ni aanib? Ni nyan ni la chee?”

⁹ Le bi tuk u tibɔr timina: “Uninkpel, ti nyan ni nin chee daa na la. Ti ŋun Nidindaan Uwumbɔr aah bi pu na. Ti ŋun waah ŋa tiwan nimɔk Ijipt aatiŋ ni na,

¹⁰ ni waah ŋa Amor yaab aabɔrb bilee bi nan bi Jɔɔdann aawipuul wɔb na pu na: Ubɔr Sihonn u nan ka Hesbonn aatiŋ ni na, ni Ubɔr Og u nan ye Basann yaab aabɔr ki ka Astarof aatiŋ ni na.

¹¹ Timi aayidam, ni binib bimɔk bi timi aatiŋ ponn ni na le bui ke ti ban tijikaar, aan ki chuun tooh ni nimi nsan pu, ki tuk timi ke ti nan koo nimi, aan ki ban ke ti ŋa kimɔbaan.

¹² Lik timi aaboroboro aah ŋa pu na. Buyoonn ti nan nyan ni tido ki choo na, u nan laa ton la. Lik man, u kuur ki wuun a.

¹³ Buyoonn ti nan ban ndaan ŋa tiloor timina ponn ni na, ti nan ye tipɔnn la. Lik man, ti kpokr ki cheer a. Le nsan aah daa sakpen pu na, timi aawanpeenkaan ni ŋinaatak kpokr ki char a.”

¹⁴ Israel yaab nan gaa baajikaar ti bi tii bi na ngem; baa nan mee Uwumbɔr ki baa u tibɔr ngbaan pu.

¹⁵ Josua nan cha u ni binib ngbaan kpaan ŋa kimɔbaan, le u ni Gibeonn yaab ngbaan ŋa kijɔtiik, le u cha bi bi, waa ŋa bi nibaa. Israel yaab aaninkpiib nan puu tipuur, ki kii ke bi ga li joo kimɔbaan ngbaan.

¹⁶ Israel yaab aah ŋa kimɔbaan ngbaan doo na, iwiin itaa aapuwɔb, le bi bee ke binib ngbaan aado aa daa.

¹⁷ Nima pu le Israel yaab nan fii ki cha binib ngbaan aatiŋ ni, le iwiin itaa daal bi fuu binib ngbaan aah bi nin chee na. Bi yin baatim ngbaan ke Gibeonn, ni Kefira, ni Beerof, ni Kiriaf Jearim.

¹⁸ Tɔ, Israel yaab aa nan ki ŋman bi ku binib ngbaan; ba pu? baaninkpiib nan puu tipuur bima Israel yaab Aadindaan Uwumbɔr aayimbil pu. Le Israel yaab mɔmɔk ŋulni baaninkpiib ngbaan pu, baah nan ŋa pu na pu.

¹⁹ Le bininkpiib ngbaan giin bui bi ke, “Ti puu tipuur tii bi, timi Israel yaab Aadindaan Uwumbɔr aayimbil pu a. Nima pu na, taan ki ŋmaa ŋa bi bakaa ubaa.

²⁰ Taah puu tipuur tii bi ke taan ŋa bi bakaa ubaa na pu, cha bi li bi man; ti yaa yii kan, Uwumbɔr ga daa titafal.

²¹ Cha bi li bi man, bi mu ga li peei idɔ, le ki lu nnyun tii timi.” Kina le bininkpiib ngbaan nan len.

²² Le Josua cha bi joo ni Gibeonn aanib ngbaan u chee; le u baa bi ke, “Ba ŋa ni ŋmann timi ke ni nyan ni nin chee daa na la? Nido mu aa daa.

²³ Naah ŋa kina na, Uwumbɔr mu ga daa nitafal. Ni ga li ye binaagbiib le n‑yoonn mɔmɔk. Ni ga li peei idɔ ki li lu nnyun ŋani Maawumbɔr Aadichal ni.”

²⁴ Le bi giin bui u ke, “Uninkpel, taah ŋun ibamɔn ni, ke Nidindaan Uwumbɔr nan bui waatutunn Moses, ke naah tur koo ni kitiŋ ngbaan mɔmɔk ponn ni na, u ga cha ni ku binib bimɔk bi ki ponn ni na pu la, nima le cha ti ŋa kina. Tipobil le yuk, le timi aamɔfal pu na, ijawaan chuu timi ke ni ga ku ti mɔmɔk.

²⁵ Dandana wee, ti bi nimi aapɔɔn ni la; naah dak ke ni ŋa timi pu na, ŋa kina man.”

²⁶ Kina pu na, Josua aah nan ŋa pu na sɔ: u nan kii bi, le Israel yaab aa ku bi.

²⁷ U mu nan di bi ŋa binaagbiib la, bi nan peei idɔ, le ki lu nnyun tii Israel yaab, ki lu ŋani Uwumbɔr Aadichal mu ni. N‑yoonn ngbaan kina ki nan saa din, bi laa beenin tun lituln ngbaan, nin chee Uwumbɔr nyan ke bi li dooni u na.