Josua 8 - Uwumbɔr aagbaŋ

Baah nyaŋ Ai yaab ki kuln kitiŋ ngbaan pu na

¹ Uwumbɔr nan bui Josua ke, “Di bijab mɔmɔk buen aan ni ti to Ai yaab butɔb. Taa san ijawaan, ki taa cha aawon yɔl. Min le ga cha aa nyaŋ Ai aabɔr, ni waanib, ni waatiŋ, ni kaatingbaan mɔmɔk, le ki ga li ye nimi yaan.

² Naah nan ŋa Jeriko aatiŋ, ni kaabɔr pu na, ni ŋa Ai aatiŋ ni kaabɔr mu kina. N‑yoonn mumina ma kan, ni yaa nyaŋ Ai aatiŋ kan, ni li joo tiwan, ni tiwakor ngbaan mɔmɔk. Ni gor ki mann buen kitiŋ ngbaan aapuwɔb ki ti lir bi.”

³ Josua nan gor ke u ni waajab buen ki ti to Ai yaab butɔb. Kinyeek le u nyan waajab ŋichur piitaa, bi ŋmaa to butɔb na,

⁴ le ki bui bi ke, “Li cha man ki ti bɔr kitiŋ ngbaan aapuwɔb, ni taa li daa kitiŋ ngbaan chee, aan ki gor nibaa ki li kii.

⁵ M ni bijab bi gur na ga buen kitiŋ ngbaan aanimbiin ni wɔb. N‑yoonn mu Ai yaab ti fii lir ti pu na kan, ti ga fenn le ki san, ke taah nan san njan pu na.

⁶ Le bi ga paan ti pu, le ti ga cha bi paan ti pu ki buen dandar. Le bi ga dakl ke ti ki bi san ke taah nan san pu na la.

⁷ Le ni nyan ni kitiŋ ngbaan aapuwɔb, naah bɔr nin chee na, ki nan lir kitiŋ ngbaan pu, ki ku binib bimɔk gur ki ponn ni na. Nidindaan Uwumbɔr le ga nyaŋ kitiŋ ngbaan tii nimi.

⁸ Uwumbɔr aah bui ke ni ŋa pu na, ni yaa nyaŋ kitiŋ ngbaan kan, ni see ki mmii. Naah ga ŋa pu na le na.”

⁹ Josua nan cha bi buen, le bi buen ti bɔr nima chee, ki gor kii Ai aawilir wɔb, ni bi Ai ni Betel aakaasisik ni na. Le Josua ni bijab bi gur na dɔ baakakaa ni.

¹⁰ Naah woln kichakpiik ni na, le Josua yin bijab ngbaan mɔmɔk ke bi kuun ni. Le u ni bijab ngbaan aaninkpiib di bi buen bi ti to Ai yaab butɔb.

¹¹ Bijab bi nan dii u na nan cha ki tok Ai yaab aah diir pu ki koo baatiŋ ni na, le ki ti sil kitiŋ ngbaan aaŋangan wɔb, le kifataŋ kibaa dɔ bi ni kitiŋ ngbaan aakaasisik ni.

¹² Le u cha bijab bi ga pii ŋichur ŋiŋmu na, ki cha bi bɔr kitiŋ ngbaan aawilir wɔb, nima chee bi kitiŋ ngbaan ni Betel aakaasisik ni la.

¹³ U nan yakr bijab ngbaan ŋiker ŋilee le bi to butɔb ngbaan, bibaa nan dɔ kitiŋ ngbaan aaŋangan wɔb, le bi gur na dɔ liwilir wɔb. Josua mu nan doon kifataŋ ni, le kitaak ti woln.

¹⁴ N‑yoonn mu kitiŋ ngbaan aabɔr kan Josua ni waanib na, le u fii mala. U ni waanib mɔmɔk nan fii tooh Josua ni waanib Jɔɔdann aafataŋ ngbaan ni, bi ti to butɔb, baah nan ti nyaŋ bi nin chee na, kaa nyi ke bijab loon bi bipuwɔb.

¹⁵ Le Josua ni waajab kpal ke baadim nyaŋ bi la, le ki fenn bipuwɔb ki san cha, ki di toŋ nteer aatiŋ kibaa wɔb.

¹⁶ Le Ai yaab nan yin bijab bi gur kitiŋ ngbaan ni na ke bi mɔmɔk nyan ni ki nan paan Josua ni waajab pu. Baah nan san paa bi pu na, le bi moo san foor buen dandar, ki daak kitiŋ ngbaan chee.

¹⁷ Kitiŋ ngbaan aajab mɔmɔk nan nyan ni baatiŋ ngbaan ni, ki san paa Israel yaab pu, uja ubaa aa nan ki gur ki kii kitiŋ ngbaan.

¹⁸ Le Uwumbɔr bui Josua ke, “Di saakpaatuŋ mɔk Ai aatiŋ ngbaan, m di ki ŋa aaŋaal ni a.” Le Josua ŋa kina.

¹⁹ Le waah yoor uŋaal paacham na, waajab bi nan dɔ bɔɔ na fii mala, ki san koo kitiŋ ngbaan ni, le ki ti nyaŋ kitiŋ ngbaan. Bi nan kpaan see kitiŋ ngbaan mmii.

²⁰ Le Ai aajab aah fenn lik bipuwɔb na, bi kan ke iŋmanyuu fii baatiŋ ni, ki jon paacham. Baa nan ki nyi baah ga san toŋ nin chee ki ŋmar na, le baah nan san paa Israel yaab bi pu na, fenn ki lir bi pu.

²¹ Josua ni waanib aah kan ke bido yaab biken na nyaŋ kitiŋ ngbaan ki see ki mmii na, le bi fenn lir Ai yaab aajab pu ki ku bi.

²² Israel yaab bi nan nyaŋ kitiŋ ngbaan na dan ki nan kpee Josua ni waanib pu, bi to baadim butɔb. Ai yaab aajab ngbaan nan kan ke Israel yaab mann gob bi a, le Israel yaab nan ku bi mɔmɔk. Ubaa kina aa nan ŋmaa san ŋmar, ubaa aa nan nyan butɔb ngbaan ni,

²³ see Ai aabɔr baanja. Bi nan chuu u kakaan la, le ki di buen Josua chee.

²⁴ Israel yaab nan ku baadim nteer aatiŋ ki bi nan san paa bi pu ki ti nyan ki pu na la. Bi nan ki gir buen Ai aatiŋ ni ki ti ku binib bimɔk nan gur ki ponn ni na.

^25-26 Josua nan cha waakpaatuŋ beenin mɔk paacham ki tok Ai aatiŋ, kaa di ki jɔn taab le bi ku unii umɔk nan gur na ki doo. Liyaadaal ngbaan bi nan ku Ai aatiŋ aanib mɔmɔk doo a. Bijab ni bipiib nan pii ŋichur kipiik ni ŋilee.

²⁷ Israel yaab nan chur tiwakor, ki faa tiwan nimɔk bi kitiŋ ngbaan ni na, ke Uwumbɔr aah nan bui Josua pu na.

²⁸ Josua nan see Ai aatiŋ ngbaan mmii, le ki kpaln ŋilangben ŋmeen ki nan saa din.

²⁹ U nan di Ai yaab aabɔr ngbaan di leen busub pu, le ki cha uwon lee nima ki ti saa kijook wɔb. Nwiin aah cha mu ti lir buyoonn na, le Josua cha bi leer u lii, ki di waawon mee bil kitiŋ ngbaan aabisamɔb. Bi nan kuun ŋitakpal biin u pu, le ŋi beenin dɔ nima chee ki nan saa din.

Josua aah nan karn Uwumbɔr aakaal Ebal Aajool pu pu na

³⁰ Josua nan maa kitork aabimbiln tii Israel yaab Aadindaan Uwumbɔr, Ebal Aajool paab.

³¹ Uwumbɔr aatutunn Moses aah nan mɔk Israel yaab ke bi maa li pu na, u nan ŋa li kina. Ni mɔk Moses Aakaal ni ke: “Bi di ŋitakpal ŋi baa di tikur aawan nibaa kpii ŋi na ki di maa libimbiln ngbaan.” Bi nan di kitork ki bi joo seer mmii ni na le toor kitork tii Uwumbɔr li pu, le ki mu nan ki toor kimɔbaan aatork li pu.

³² Nima chee le Israel yaab nan si lik Josua, le u ŋmee Moses aah nan ŋmee ikaal i na ŋitakpal ngbaan pu.

³³ Le Israel yaab, ni baaninkpiib, ni baayidam, ni baabɔjirb, ki kpee biwɔwɔm bi nan bi bi chee na, nan sil Uwumbɔr Aakaal Aadakaa aapepel mɔmɔk ŋilee pu, ki lik bitotoorb bi nan si tu Dakaa ngbaan na. Ligeln libaa nan si, le bipuwɔb kpaa Gerisim Aajool wɔb, le ligeln liken mu aanib si, bipuwɔb kpaa Ebal Aajool wɔb. Uwumbɔr aatutunn Moses le nan bui bi ke n‑yoonn yaa nan ŋeer bi gaa Uwumbɔr aanyoor kan, bi ŋa kina.

³⁴ Le Josua karn ikaal ngbaan mɔmɔk mpɔɔn pu tii bi, ki kpee tinyoor ni imɔpuur mu, ke baah ŋmee pu Nkaal aagbaŋ ni na.

³⁵ Josua nan karn Moses aakaal ngbaan mɔmɔk ki tii binib bimɔk nan kuun nima chee na, ki kpee bipiib, ni mbim, ni biwɔwɔm bi nan koo bi chee na mɔmɔk la.