Josua 7 - Uwumbɔr aagbaŋ

Akann aah tun titunwanbir pu na

¹ Uwumbɔr aah nan bui Israel yaab ke bi bii Jeriko aawan ki taa yoor nibaa na, baa nan kii waamɔb. Baah nan yin uja u ke Akann na le aa nan kii Uwumbɔr aamɔb, nima pu le Uwumbɔr aaŋuul nan fii Israel yaab pu. Akann nan ye Kami aajapɔɔn la, le ki nan ye Sabdi aayaabil, bi nan ye Sera aataŋaal ni aanib la, le ki ye Juda aanibol ni aanib.

² Josua nan nyan waanib Jeriko aatiŋ ni, ki tun bi Ai aatiŋ ni, kitiŋ ngbaan nan bi Betel aawipuul wɔb la, ki bi gbɔk Bef Afenn aatiŋ na, ke bi chuun pekr lik kitiŋ ngbaan. Baah buen ki labr ni na,

³ le bi gir nan tuk Josua baah ti kan pu na ke, “Naa ye ti mɔmɔk le ga buen ti to Ai yaab butɔb. Aa yaa cha bijab ŋichur ŋilee, bee ŋitaa kina buen kan, ni ga ŋeer. Taa cha bijab ngbaan mɔmɔk buen bi ti to bi; kitiŋ ngbaan aa wiir kpala.”

⁴ Nima pu na, Israel aajab ŋichur ŋitaa kina le nan buen bi ti to butɔb ngbaan, le baadim ngbaan nan ti nyaŋ bi, le bi nan san gir ni.

⁵ Ai aajab nan san dii bi ki ti nyan baatiŋ aabisamɔb chee, ki ti saa ŋifakujoo ŋibaa chee; baah bi sunni ligongoln na, le bi ku bi ponn ni bijab bi ga pii piitaa ni biloob na. Israel yaab aataakpab nan yɔl, le ijawaan chuu bi.

⁶ Josua ni Israel yaab aaninkpiib aasui nan bii, le bi dar kar baawanpeenkaan, le ki doon kitiŋ Uwumbɔr Aakaal Aadakaa aanimbiin ni, ki ti saa kijook wɔb, le ki faa titan puŋ biyil, ki mɔk ke bisui bii a.

⁷ Josua nan bui ke, “Tidindaan Uwumbɔr u kaa kpa ŋeen aatɔ na, ba ŋa aa di timi puur ni Jɔɔdann aamɔɔl? Aa ban aa nan di timi tii Amor yaab la aa? Aa ban aa bii timi la aa? Ba ŋa saa cha ti bee Jɔɔdann Aamɔɔdapuul lima na wɔb?

⁸ Tidindaan, Israel yaab aadim aah nyaŋ bi pu na, m ga ki len kinye?

⁹ Kanaann yaab, ni binib bimɔk bi kitiŋ kee ponn ni na ga ŋun tibɔr ngbaan. Bi ga kpokl ki gob timi ki ku ti mɔmɔk. Aa ga ki ŋa kinye ki cha binib nyuŋ saayimbil?”

¹⁰ Le Uwumbɔr bui Josua ke, “Fii sil. Ba ŋa aa dɔ kitiŋ kina?

¹¹ Israel yaab le tun titunwanbir. Maah bui bi ke bi taa ŋa pu na, bi yii ki ŋa ni. Tiwan ni m nan bui bi ke bi bii ni na, bi yii ki yoor ni. Bi sun tiwan ngbaan, le ki gii inyamɔn ni pu, ki di kpaan baawan ponn ni.

¹² Nimina pu le Israel yaab aa ŋmaa sil baadim chee. Bi san baadim chee, ba pu? bi kpaln tiwan ni ga bii na la. Maan ki li bi ni chee, see ni bii tiwan ni m nan bui nimi ke ni taa yoor na.

¹³ Fii sil. Toor binib ngbaan ki cha bi dan m chee. Tuk bi ke bi fe gor bibaa; ba pu? Min, u ye nimi Israel yaab Aadindaan Uwumbɔr na aah kpa pu m len na sɔ: ‘Israel yaab, ni joo tiwan ni m bui nimi ke ni bii ni na nibaa chee. Naan ŋmaa sil nimi aadim aanimbiin ni, see ni nyan tiwan ngbaan.’

¹⁴ Nima pu na, tuk bi ke fen kichakpiik ni kan, aa ga joo ni bi nnimbiin ni, ŋinibol ŋinibol, le linibol li yaab m nyan na kan, bi ga nya ni itaŋaal itaŋaal, le ntaŋaal mu m nyan na kan, bi ga nya ni mmaal mmaal, le mmaal mu m nyan na kan, bi ga nya ni upiijoor upiijoor,

¹⁵ upiijoor u m nyan, aan bi kan tijɔŋ aawan ngbaan u chee na kan, bi ga see u ni waachiln ni aanib, ni tiwan nimɔk u kpa na mmii; ba pu? uma le joo ni inimɔɔn sakpiin ngbaan Israel yaab pu, ki bii maah puu tipuur ti na.”

¹⁶ Le ni woln kichakpiik ni, le Josua pue fii, le ki joo ni Israel yaab ŋinibol ŋinibol Uwumbɔr aanimbiin ni, le Uwumbɔr nyan Juda aanibol.

¹⁷ Le u joo ni Juda aanibol ngbaan ponn ni itaŋaal itaŋaal, le Uwumbɔr nyan Sera aataŋaal. Le u joo ni Sera aataŋaal ngbaan ponn ni mmaal mmaal, le Uwumbɔr nyan Sabdi aamaal.

¹⁸ Le u joo ni Sabdi aamaal ponn ni upiijoor upiijoor, le Uwumbɔr nyan Akann, u ye Kami aajapɔɔn ki ye Sabdi aayaabil na.

¹⁹ Le Josua bui u ke, “Maabo, len timi Israel yaab Aadindaan Uwumbɔr aanimbiin ni do ibamɔn, ki kpiir saatunwanbir. Tuk mi dandana wee saah ŋa tiwan ni na. Taa di tibaa bɔr mi.”

²⁰ Le Akann bui ke, “Ni ye mbamɔn la, m tun titunwanbir, timi Israel yaab Aadindaan Uwumbɔr aanimbiin ni. Maah ŋa pu na sɔ:

²¹ Tiwan nimɔk ti jenn gaa na ponn ni, m kan Babiloŋ yaab aabɔkul nyaan libaa, ni tikunabr ti aanyunyuun ga pii njikaabim kuruwaa bilee na, ni salmaa u aanyunyuun ga pii njikaabim kuruwaa ubaa na, le nsui gee ni sakpen, le m yoor. M di tikunabr ngbaan le ŋa taab ki di ni mɔmɔk sub maabool ni. Ni ga kan ni nima.”

²² Nima pu na, Josua nan tun bijab bibaa, le bi san buen Akann aabool ponn ni ki ti kan tiwan ngbaan sil sub nima, tikunabr ngbaan bi taab.

²³ Le bi kur nyan ni ni mɔmɔk, ki joo nan tii Josua ni Israel yaab mɔmɔk, le ki di tiwan ngbaan bil Uwumbɔr aanimbiin ni.

²⁴ Le Josua ni Israel yaab mɔmɔk kpaan yoor Akann, ni tikunabr, ni libɔkul, ni salmaa ngbaan, ki kpee Akann aabim, ni waawakor, ni waabool, ni tiwan nimɔk u kpa na, ki di buen Tibɔbir Aafataŋ ni.

²⁵ Le Josua bui ke, “Ba ŋa aa joo ni tibɔbir kina ti pu? Dandana wee Uwumbɔr ga joo ni tibɔbir aa pu.” Le binib ngbaan mɔmɔk nan kpaan ki mae ŋitakpal ku Akann, ni waachiln ni aanib, ni waawan mɔmɔk, ki see ni mmii,

²⁶ le ki kuun ŋitakpal paan u pu; ŋi beenin dɔ nima ki nan saa din. Nima pu le bi yin nima chee ke Tibɔbir Aafataŋ. Le Uwumbɔr aaŋuul nin sɔŋ.