Josua 6 - Uwumbɔr aagbaŋ

Jeriko aatiŋ aah kuln pu na

¹ N‑yoonn mue le bi nan laŋ Jeriko aagoln aabisamɔi mɔmɔk ke Israel yaab taa ŋmaa koo kitiŋ ngbaan ni. Ubaa aan ŋmaa koo, ubaa mu aan ŋmaa nya kitiŋ ngbaan ni.

² Uwumbɔr nan bui Josua ke, “M ban m di Jeriko aatiŋ, ni kaabɔr, ni waajab bi kpa lipobil na ŋa aaŋaal ni la.

³ Aa ni saajab ga chuun mann kitiŋ ngbaan aagoln nfum mubaa liwinbaal, ki ti saa iwiin iloob.

⁴ Nyan bitotoorb bilole, bi mɔmɔk ubaabaa ga li joo ikpiinja aayiin, ki loln binib bi tu Uwumbɔr Aakaal Aadakaa na pu nsan. Winlole daal kan, aa ni saajab ga chuun mann kitiŋ ngbaan nfum mulole, n‑yoonn ngbaan le bitotoorb bi joo ikpiinja aayiin na pii ikpiin.

⁵ Bi mɔmɔk kpaan ki pii baakpiin mpɔɔn pu. N‑yoonn mu ni ti ŋun kina na kan, bijab ngbaan mɔmɔk kpaan ki faa ikaa, le kitiŋ ngbaan aagoln ga lir kitiŋ. N‑yoonn ngbaan le bijab mɔmɔk ga koo kitiŋ ngbaan ni.”

⁶ Josua nan yin bitotoorb ngbaan, le ki nan bui bi ke, “Yoor Uwumbɔr Aakaal Aadakaa ngbaan, aan ni ponn ni bilole loln ni pu nsan, ki li joo ikpiinja aayiin.”

⁷ U nan cha waajab piin ki chuun mann kitiŋ ngbaan, le bibaa loln bitotoorb bi tu Uwumbɔr Aakaal Aadakaa na pu nsan.

^8-9 Nima pu na, Josua aah nan tii limɔboln li na pu, bijab ngbaan bibaa nan loln bitotoorb bi joo ikpiinja aayiin na nsan; le bitotoorb bi mu tu Uwumbɔr Aakaal Aadakaa na paan bi pu, le bijab bi gur na bee puwɔb. N‑yoonn mumina mɔmɔk bitotoorb nan pii ikpiin le ki chuun cha.

¹⁰ Josua aa nan lii bi bumɔb ke bi faa ikaa, bee bi len tibɔr tibaa see u ti bui bi ke bi ŋa kina.

¹¹ U nan cha binib bi tu Uwumbɔr Aakaal Aadakaa na, ni bijab chuun mann kitiŋ ngbaan nfum mubaa. Le bi ti gir baah doo nin chee na.

^12-13 Lelee aawiin daal, Josua nan pue fii kichakpiik ni, le ki cha bitotoorb, ni bijab ngbaan ki chuun mann kitiŋ ngbaan ke baah fe mann njan aawiin daal pu na; njan, bijab bi ye bisalolm na, le bitotoorb bilole bi pii ikpiinja aayiin ilole na, le ki cha bi tu Uwumbɔr Aakaal Aadakaa na, le kookoo yaab nan ye bijab bi paa puwɔb na. N‑yoonn mumina mɔmɔk bi nan chuun, le bikpiinpiib pii iyiin.

¹⁴ Winlee daal bi nan mann kitiŋ ngbaan, le ki ki gir baah doo nin chee na. Bi nan ŋa kina ki ti saa iwiin iloob.

¹⁵ Winlole daal, le bi pue fii lichakpitaawoln, ki chuun mann gonn kitiŋ ngbaan baah ti ŋani pu na; nwiin ngbaan daal bi nan chuun mann gonn ki, nfum mulole la.

¹⁶ Nfum mulole aayoonn ngbaan aah fuu na, le bitotoorb bi pii ikpiin na aah ban bi kpaan nfum mubaa pu ki pii sakpen buyoonn na, le Josua lii waanib bumɔb ke bi faa ikaa, le ki bui ke, “Uwumbɔr le di kitiŋ kee tii nimi.

¹⁷ Ni bii kitiŋ ngbaan, ni tiwan ni mɔmɔk bi ki ponn ni na, aan ni mɔmɔk li ye ipiin ki tii Uwumbɔr. See Rahab u ye pateer na, ni waadichal ponn ni aanib baanja le ni taa ku bi, ba pu? uma le nan di timi aapepekr na di bɔr.

¹⁸ Ni taa yoor tiwan ni Uwumbɔr tuk timi ke ti bii na nibaa. Ni yaa yoor nibaa kan, ni ga joo ni tibɔbir Israel yaab pu.

¹⁹ Tiwan nimɔk bi di tikunabr, bee salmaa, bee tikumann, bee tikur ŋa ni na, ni di ni nan tii Uwumbɔr. Ni di tiwan ngbaan mɔmɔk ki di ŋa Uwumbɔr Aabool ni.”

²⁰ Josua aah len ti doo na, le bitotoorb na pii iyiin, le bijab faa ikaa, le ligoln sakpeln ngbaan lir kitiŋ. Le bijab ngbaan san koo kitiŋ ngbaan ni, ki ton bi butɔb, le ki nyaŋ kitiŋ ngbaan aanib.

²¹ Bi nan di baajum le ki ku bijab ni bipiib mɔmɔk, ni mbim, ni bininkpiib. Bi nan ku inaa, ni ipiih, ni ibon mu.

²² Josua nan bui bijab bi nan buen ti pekr Jeriko aatiŋ na ke, “Li cha man pateer na aadichal ni, ki ti nyan ni u ni waamaal, naah nan puu ke ni ga ŋa pu na.”

²³ Nima pu na, bi nan nyan ni Rahab, ni ute, ni una, ni uninjatiib, ni waamaal mɔmɔk. Bi nan nyan bi mɔmɔk, ki gaa bi lii, le ki ti di bi kaan gbaŋ bima Israel yaab.

²⁴ Bi nan see kitiŋ ngbaan, le mmii nan gaa tiwan nimɔk nan bi ki ponn ni na, see tiwan ni bi nan di salmaa, ni tikunabr, ni tikumann, ni tikur ŋa ni na, le bi nan yoor buen ti ŋa Uwumbɔr Aabool ni.

²⁵ Josua nan gaa pateer Rahab ni waamaal mɔmɔk lii, ba pu? uma le nan di Josua aah nan tun bipepekr bilee bi Jeriko aatiŋ ni na bɔr waadichal ni. Waamaal laa beenin bi Israel yaab chee ki nan saa din wee.

²⁶ N‑yoonn ngbaan le Josua nan puu tipuur ki sak ke, “Unii u ban ke u ki gir maa Jeriko aatiŋ na, Uwumbɔr ga daa utafal. Umɔk ban u ki gir bil kitiŋ ngbaan aadinyikl na ga kɔŋ waajan aabo. Umɔk ban ke u ki gir kpaa kitiŋ ngbaan aabisamɔi na ga kɔŋ waabigbiln.”

²⁷ Uwumbɔr nan bi Josua chee, le kitiŋ ngbaan ni aanib mɔmɔk ŋun waayimbil pu.