Josua 5 - Uwumbɔr aagbaŋ

¹ Amor yaab aabɔrb bi mɔmɔk ka Jɔɔdann Aamɔɔl aawilir wɔb na, ni Kanaann aabɔrb bi mɔmɔk ka kpak Kaasisik ni Aanyusakpem na, nan ŋun Uwumbɔr aah cha Jɔɔdann Aamɔɔl aanyun foor pu aan Israel yaab chuun kitikuun pu ki puur pu na aabɔr. Le ijawaan chuu bi, le bitaakpab yɔl Israel yaab pu.

Israel yaab aah nan geei ŋichakpan Gilgal aatiŋ ni pu na

² Uwumbɔr nan bui Josua ke, “Ban litakpal li pɔɔ na ki ŋa njum, aan ki geei Israel aajab aachakpan.”

³ Nima pu na, Josua nan ŋa Uwumbɔr aah bui u ke u ŋa pu na; u nan geei Israel yaab aajab aachakpan nin chee bi yin nima ke Lichakpangeei Aagongoln na.

^4-6 N‑yoonn mu Israel yaab nan nyan ni Ijipt aatiŋ ni na, bijab mɔmɔk nan gii bichakpan. Baah nan chuun ŋibin imonko ilee nteersakpiin ni ki cha Kanaann aatiŋ ni na, mbijabim bi bi nan ma n‑yoonn ngbaan na, baa nan gii bichakpan. Ni ki kpee na, bijab bi nan ŋeer bi to butɔb, ki nyan ni Ijipt aatiŋ ni na, nan kpoi nsan ni doo a; ba pu? bi nan yii Uwumbɔr aamɔb. Le Uwumbɔr aah nan puu tipuur pu na, waa nan kii ke bi kan kitiŋ ki kpa tiwakor aamoŋmɔpaan ni ŋisubil sakpen na aan u nan puu tii biyaajatiib ke u ga tii timi na.

⁷ Baa nan geei bijab bi nyani Ijipt aatiŋ ni na aajapɔtiib aachakpan nteersakpiin ni; mmaal pɔɔn ngbaan le Josua nan cha bi geei bichakpan.

⁸ Baah nan geei bichakpan doo na, nee aapuwɔb le Israel yaab aanibol ngbaan mɔmɔk nan kal nima le ibuun ti yann.

⁹ Le Uwumbɔr bui Josua ke, “Din wee, m nyan Ijipt yaab aanaagbiir aanimɔɔn ni pu.” Nima pu le bi yin kitiŋ ngbaan ke Gilgal, bi laa beenin yin kitiŋ ngbaan kina la.

¹⁰ Israel yaab aah nan ka Gilgal aateer mu bi gbɔk Jeriko na, le bi nan jin njim mu bi yin mu ke Lakr‑jer na, uŋmal aawiin kipiik ni inaa daal aajook.

¹¹ Naah woln kitaak na, liyaadaal le nan ye njan aawiin mu bi nan pue jin tijikaar ti nyan ni Kanaann aatiŋ ni na, bi nan pun njikaabim, le ki ŋa boroboro u kaa kpa boroboro aanyɔk na mu.

¹² Le mana aajikaar ti nan nyan ni paacham na gii, kaa ki lir ni, le bi koo ji tijikaar ti bi Kanaann aatiŋ ponn ni na.

Josua ni uja u nan joo kijaak aajuk na aabɔr

¹³ Buyoonn Josua nan bi gbɔk Jeriko aatiŋ na, le uja ubaa kpaan nyan sil u chee, unimbiin ni, le ki joo kijaak aajuk. Josua nan buen u chee le ki ti baa u ke, “Aa ye timi aajab ponn ni ubaa, bee aa ye timi aadin la?”

¹⁴ Le uja ngbaan giin bui u ke, “Maa bi lipepel libaa wɔb, m ye Uwumbɔr aajab aaninkpel, le ki si do.” Le Josua gbaan kitiŋ le ki doon u, ki bui ke, “Ndindaan, m ye saatutunn la, aa ban ke m ŋa ba tii si?”

¹⁵ Le Uwumbɔr aajab aaninkpel ngbaan bui u ke, “Chuu takr saanaatak; saah si nin chee na ye chain la.” Le Josua ŋa waah len pu na.