Josua 4 - Uwumbɔr aagbaŋ

Baah nan kuun nteerm aatakpal bil pu na aabɔr

¹ N‑yoonn mu Israel aanibol mɔmɔk puur Jɔɔdann Aamɔɔl doo na, le Uwumbɔr bui Josua ke,

² “Nyan bijab kipiik ni bilee, aa nyan Israel aanibol mɔmɔk ni uja ubaabaa,

³ aan bi pii ŋitakpal kipiik ni ŋilee, Jɔɔdann Aamɔɔl aakaasisik ni, nin chee bitotoorb si na. Tuk bi ke bi di ŋitakpal ngbaan ti bil baah ga doon nin chee kinyeek ngbaan na.”

⁴ Le Josua yin bijab kipiik ni bilee bi u nyan na,

⁵ le ki bui bi ke, “Ni li cha Jɔɔdann Aamɔɔl ni, nin chee bi si tu Nidindaan Uwumbɔr Aakaal Aadakaa na. Ni mɔmɔk yoor litakpal libaabaa nibɔgbin pu, ŋi li si Israel yaab aanibol kipiik ni ŋilee na aasisii.

⁶ N‑yoonn mɔmɔk, ŋitakpal ŋee le ga li teer binib ngbaan, Uwumbɔr aah ŋa pu na. N‑yoonn mu choo na, nimi aabim yaa nan baa nimi ŋitakpal ngbaan aatataa kan,

⁷ ni tuk bi ke bundaal bi nan di Uwumbɔr Aakaal Aadakaa koo sil Jɔɔdann Aamɔɔl ni na, limɔɔl ngbaan aanyun nan sil kaa ki puu. Ŋitakpal ŋee le ga li teer Israel yaab tiwan ni nan ŋa do na, n‑yoonn mɔmɔk.”

⁸ Binib ngbaan nan kii Josua aah tuk bi pu na. Uwumbɔr aah nan bui u pu na mɔmɔk, bi nan yoor ŋitakpal kipiik ni ŋilee Jɔɔdann Aamɔɔl aakaasisik ni, ŋi nan si Israel aanibol kipiik ni ŋilee aasisii la, bi nan tun ŋi buen baah nan ti doon nin chee na, le ki di ŋi bil nima.

⁹ Josua nan yoor ŋitakpal kipiik ni ŋilee, bitotoorb aah nan si Jɔɔdann Aamɔɔl aakaasisik ni nin chee ki tu Uwumbɔr Aakaal Aadakaa na, ki ti di bil. Ŋitakpal ngbaan laa beenin bi nima chee ki nan saa din.

¹⁰ Bitotoorb ngbaan nan si tu Uwumbɔr Aakaal Aadakaa ngbaan Jɔɔdann Aamɔɔl aakaasisik ni, le binib ngbaan ti ŋa Uwumbɔr aah bui ke bi ŋa pu na mɔmɔk doo kina. Kina le Moses nan bui Josua ke bi ŋa. Binib ngbaan nan ŋa mala mala le ki puur limɔɔl ngbaan.

¹¹ N‑yoonn mu bi mɔmɔk nan puur ki bi lidapuul liken na, le bitotoorb bi tu Uwumbɔr Aakaal Aadakaa na loln binib ngbaan pu nsan.

¹² Rubenn, ni Gad, ni Manase aanibol ligeln libaa aajab nan puen puur ki loln biken pu nsan, ki ti gor ke bi to butɔb, Moses aah nan bui bi ke bi ŋa pu na.

¹³ Bijab bi nan ŋeer butɔb na ga nan li pii ŋichur imonko ilee, le ki puur Jɔɔdann Aamɔɔl, Uwumbɔr aanimbiin ni, ki kal nteer mu bi gbɔk Jeriko aatiŋ na chee.

¹⁴ Uwumbɔr aah nan ŋa pu liyaadaal ngbaan na nan cha binib ngbaan bee ke Josua ye unikpaan la. Bi mɔmɔk nan nyuŋni Josua ki ti saa waakundaal, ke baah nan nyuŋni Moses pu na.

¹⁵ Uwumbɔr nan ki bui Josua ke,

¹⁶ “Yin ni bitotoorb bi tu Uwumbɔr Aakaal Aadakaa na ke bi nya ni Jɔɔdann Aamɔɔl ni.”

¹⁷ Le Josua ŋa kina,

¹⁸ le n‑yoonn mu bitotoorb ngbaan nyan ki nan saa n‑gbaan na, le limɔɔl ngbaan ki piin ki puu ki gbiin ke laah ba bi pu na.

¹⁹ Binib ngbaan nan puur Jɔɔdann Aamɔɔl njan aaŋmal aawiin kipiik daal la, le ki kal Gilgal aatiŋ ni, Jeriko aawipuul wɔb.

²⁰ Nima chee le Josua nan di ŋitakpal ŋi bi nan yoor ni Jɔɔdann Aamɔɔl ponn ni na kuun bil.

²¹ U nan bui Israel aanib ngbaan ke, “N‑yoonn mu choo na, nimi aabim yaa nan baa nimi ŋitakpal ngbaan aatataa kan,

²² ni tuk bi ke n‑yoonn mu Israel yaab nan chuun kitikuun pu ki puur Jɔɔdann Aamɔɔl na, le bi nan nyan ni ŋi limɔɔl aakaasisik ni.

²³ Ni ki tuk bi ke Nidindaan Uwumbɔr le nan cha nnyun sil, kaa ki puu Jɔɔdann Aamɔɔl ngbaan ni, le kitiŋ kuur, le ni mɔmɔk chuun ki puur ti doo, ke waah nan cha Limɔɔkal Aanyusakpem foor pu ti chuun kitikuun pu ki puur pu na.

²⁴ Nima pu na, binib mɔmɔk bi bi dulnyaa wee ni na ga bee Uwumbɔr aapɔɔn aah bi pu na, le ni ga li nyuŋni Nidindaan Uwumbɔr ki cha n‑yoonn mu kaa kpa ndoon na.”