Josua 3 - Uwumbɔr aagbaŋ

Israel yaab aah nan puur Jɔɔdann Aamɔɔl pu na

¹ Naah woln kichakpiik ni na, Josua ni Israel aanib ngbaan mɔmɔk nan fii lichakpitaawoln, le ki nyan Sitim aatiŋ ni, ki buen Jɔɔdann Aamɔɔl chee. Bi nan bi nima chee ki kii nwiin mu bi ga puur li na.

² Iwiin itaa aapuwɔb le Israel yaab aayidam nan fii ki moon binib ngbaan mɔmɔk,

³ le ki bui ke, “N‑yoonn mu ni ti kan bitotoorb yoor Tidindaan Uwumbɔr Aakaal Aadakaa tun na kan, ni fii ki li dii bi man.

⁴ Naa nyi do kpala, nima pu na, bima le ga mɔk nimi nsan. Ubaa taa ŋɔŋ Uwumbɔr Aakaal Aadakaa ngbaan chee, ni li paa u pu, ki li daa u ki pii ŋitaa ŋichur ŋitaa.”

⁵ Le Josua bui binib ngbaan ke, “Toor nibaa man, ba pu? Uwumbɔr ga fe ŋa lijinjiir aatuln nikaasisik ni.”

⁶ Josua nan bui bitotoorb ke bi yoor Uwumbɔr Aakaal Aadakaa aan ki loln binib ngbaan pu nsan, le bi ŋa waah len pu na.

⁷ Uwumbɔr nan bui Josua ke, “Maah ga ŋa tiwan ni din wee na le ga cha Israel aanib ngbaan mɔmɔk piin ki li nyuŋni si ke uyidaan na, bi ga bee ke m bi aa chee ke maah nan bi Moses chee pu na.

⁸ Tuk bitotoorb bi tu Uwumbɔr Aakaal Aadakaa ngbaan na ke bi yaa ti fuu limɔɔl ni kan, bi koo nnyun ngbaan ni, ki sil nnyun ponn ni n‑gbaan.”

⁹ Josua nan ki bui binib ngbaan ke, “Ni dan ki nan pel Nidindaan Uwumbɔr aah ban u len pu na man.

¹⁰ Mbamɔn, naah tur cha pu na, u ga jenn nyan Kanaann yaab, ni Hef yaab, ni Hif yaab, ni Peris yaab, ni Girgas yaab, ni Amor yaab, ni Jebus yaab.

¹¹ N‑yoonn mu Uwumbɔr u yeh dulnyaa wee mɔmɔk na Aakaal Aadakaa na yaa puur limɔɔl ki loln ni pu nsan kan, le ni ga bee ke uma Uwumbɔr u bi kaa kpa ndoon na bi ni chee.

¹² Ni nyan bijab kipiik ni bilee; ni nyan ubaabaa Israel aanibol kipiik ni ŋilee ngbaan ponn ni.

¹³ N‑yoonn mu bitotoorb bi tu Uwumbɔr u yeh dulnyaa wee mɔmɔk na Aakaal Aadakaa na yaa ti di bitaa ŋa nnyun ponn ni kan, Jɔɔdann Aamɔɔl aanyun ngbaan ga sil libubaan ni.”

^14-15 Ni nan ye tijikaar aacheen yoonn la, le limɔɔl ngbaan nan gbii nnyun, nwam mu nyan. N‑yoonn mu binib ngbaan nan fii ki ban bi puur Jɔɔdann Aamɔɔl na, le bitotoorb loln bi pu nsan, ki tu Uwumbɔr Aakaal Aadakaa ngbaan. Bitotoorb ngbaan aataa aah ti koo limɔɔl ngbaan aanyun ni buyoonn na,

¹⁶ le nnyun ngbaan sil, kaa ki puu, le ki ŋa ligoln kitiŋ ki bi yin ki ke Adam na chee; kitiŋ ngbaan nan bi dandar ki bi gbɔk Saretann aatiŋ la. Limɔɔl ngbaan aah puu ki ti lir N‑yaan Aanyusakpem ponn ni nin chee na mɔmɔk kpaln kitikuun la, le binib ngbaan puur Jeriko chee.

¹⁷ Binib ngbaan aah nan chuun kitikuun pu ki puur na, bitotoorb bi nan tu Uwumbɔr Aakaal Aadakaa na nan si limɔɔl ngbaan aakaasisik ni, kitikuun pu, le binib ngbaan mɔmɔk chuun ki ti puur doo.